ਯੈੱਸ ਪੰਜਾਬ
ਮੁੰਬਈ 19 ਨਵੰਬਰ, 2020:
ਬਾਲੀਵੁੱਡ ਸੁਪਰਸਟਰਾ ਅਕਸ਼ੇ ਕੁਮਾਰ ਨੇ ਇਕ ਯੂਟਿਊਬਰ ’ਤੇ 500 ਕਰੋੜ ਰੁਪਏ ਦਾ ਮਾਨਹਾਨੀ ਦਾ ਦਾਅਵਾ ਠੋਕਿਆ ਹੈ।
ਇਹ ਦਾਅਵਾ ਉਨ੍ਹਾਂ ਬਾਰੇ ਨਿਰਅਧਾਰ ‘ਫ਼ੇਕ ਨਿਊਜ਼’ ਚਲਾਉਣ ਦੇ ਸੰਬੰਧ ਵਿੱਚ ਕੀਤਾ ਗਿਆ ਹੈ। ਯੂਟਿਊਬਰ ਨੇ ਆਪਣੇ ਵੀਡੀਓ ਵਿੱਚ ਅਕਸ਼ੈ ਕੁਮਾਰ ਦਾ ਕਈ ਵਾਰ ਹਵਾਲਾ ਦਿੱਤਾ ਸੀ।
ਰਸ਼ੀਦ ਸਿੱਦੀਕੀ ਨਾਂਅ ਦੇ ਇਸ ਯੂਟਿਊਬਰ ਨੇ ਸੁਸ਼ਾਂਤ ਸਿੰਘ ਰਾਜਪੂਤ ਦੀ ਮੌਤ ਦੇ ਮਾਮਲੇ ਵਿੱਚ ਬਣਾਏ ਗਏ ਯੂ ਟਿਊਬ ਵੀਡੀਓ ਵਿੱਚ ਅਕਸ਼ੇ ਕੁਮਾਰ ਦਾ ਨਾਂਅ ਲਿਆਂਦਾ ਸੀ। ਉਸਨੇ ਅਕਸ਼ੈ ਕੁਮਾਰ ’ਤੇ ਸੁਸ਼ਾਂਤ ਦੀ ਮੌਤ ਤੋਂ ਬਾਅਦ ਕਈ ਗੰਭੀਰ ਦੋਸ਼ ਲਗਾਏ ਸਨ। ਸਿੱਦੀਕੀ ਨੇ ਕਿਹਾ ਸੀ ਕਿ ਅਕਸ਼ੈ ਸੁਸ਼ਾਂਤ ਰਾਜਪੂਤ ਨੂੰ ‘ਐਮ.ਐਸ. ਧੋਨੀ: ਦੀ ਅਨਟੋਲਡ ਸਟੋਰੀ’ ਜਿਹੀਆਂ ਵੱਡੀਆਂ ਫ਼ਿਲਮਾਂ ਮਿਲਣ ਕਰਕੇ ਨਾਖ਼ੁਸ਼ ਸੀ ਅਤੇ ਉਸਨੇ ਇਸ ਸੰਬੰਧ ਵਿੱਚ ਅਦਿਤਿਆ ਠਾਕਰੇ ਅਤੇ ਮੁੰਬਈ ਪੁਲਿਸ ਨਾਲ ਕਈ ਮੀਟਿੰਗਾਂ ਕੀਤੀਆਂ ਸਨ।
ਸਿੱਦੀਕੀ ਨੇ ਅਕਸ਼ੈ ਕੁਮਾਰ ਦਾ ਨਾਂਅ ਸੁਸ਼ਾਂਤ ਦੀ ਦੋਸਤ ਅਤੇ ਐਕਟਰੈਸ ਰੀਆ ਚੱਕਰਵਰਤੀ ਨਾਲ ਵੀ ਜੋੜਿਆ ਅਤੇ ਦਾਅਵਾ ਕੀਤਾ ਕਿ ਅਕਸ਼ੈ ਨੇ ਰੀਆ ਨੂੰ ਕੈਨੇਡਾ ਭੱਜ ਜਾਣ ਵਿੱਚ ਮਦਦ ਕੀਤੀ ਸੀ।
ਬਿਹਾਰ ਦੇ ਰਹਿਣ ਵਾਲੇ ਸਿਵਿਲ ਇੰਜੀਨੀਅਰ ਸਿੱਦੀਕੀ ’ਤੇ ਮਾਨਹਾਨੀ, ਜਨਤਕ ਤੌਰ ’ਤੇ ਸ਼ਰਾਰਤ ਕਰਨ ਅਤੇ ਇਰਾਦਨ ਇੱਜ਼ਤ ਹੱਤਕ ਕਰਨ ਦੇ ਦੋਸ਼ ਲਗਾਏ ਜਾਣ ਦੀ ਖ਼ਬਰ ਹੈ।
ਯਾਦ ਰਹੇ ਕਿ ਸਿੱਦੀਕੀ ਪਹਿਲਾਂ ਵੀ ‘ਫ਼ੇਕ ਨਿਊਜ਼’ ਫ਼ੈਲਾਉਣ ਦੇ ਮਾਮਲੇ ਵਿੱਚ ਗ੍ਰਿਫ਼ਤਾਰ ਹੋ ਚੁੱਕੇ ਹਨ। ਉਹਨਾਂ ਨੇ ਮਹਾਰਾਸ਼ਟਰ ਦੇ ਮੁੱਖ ਮੰਤਰੀ ਉੱਧਵ ਠਾਕਰੇ ਅਤੇ ਉਨ੍ਹਾਂ ਦੇ ਬੇਟੇ ਤੇ ਮੰਤਰੀ ਅਦਿਤਿਆ ਠਾਕਰੇ ਦਾ ਨਾਂਅ ਵੀ ਇਸ ਮਾਮਲੇ ਵਿੱਚ ਉਛਾਲਿਆ ਸੀ।
ਉਸ ਖਿਲਾਫ਼ ਸ਼ਿਕਾਇਤ ਵਿੱਚ ਕਿਹਾ ਗਿਆ ਹੈ ਕਿ ਯੂਟਿਊਬਰ ਨੇ ਲੋਕਾਂਨੂੰ ਗੁਮਰਾਹ ਕਰਨ ਅਤੇ ‘ਫ਼ੇਕ ਨਿਊਜ਼’ ਫ਼ੈਲਾਉਣ ਲਈ ਡਿਜੀਟਲ ਮੀਡੀਆ ਦਾ ਸਹਾਰਾ ਲਿਆ ਹੈ।
ਸਮਝਿਆ ਜਾਂਦਾ ਹੈ ਕਿ ਸੁਸ਼ਾਂਤ ਦੀ ਮੌਤ ਤੋਂ ਬਾਅਦ ਸਿੱਦੀਕੀ ਵੱਲੋਂ ਪਾਏ ਗਏ ਵੀਡੀਉਜ਼ ਤੋਂ ਬਾਅਦ ਉਸਨੇ ਚਾਰ ਮਹੀਨਿਆਂ ਵਿੱਚ ਹੀ ਲਗਪਗ 15 ਲੱਖ ਰੁਪਏ ਕਮਾਏ ਅਤੇ ਉਸਦੇ ਸਬਸ੍ਰਾਈਕਬਰਜ਼ ਦੀ ਗਿਣਤੀ ਵੀ 2 ਲੱਖ ਤੋਂ ਵਧ ਕੇ 3 ਲੱਖ ਹੋ ਗਈ।
ਵਰਨਣਯੋਗ ਹੈ ਕਿ ਸੁਸ਼ਾਂਤ ਲੰਘੀ 14 ਜੂਨ ਨੂੰ ਆਪਣੇ ਮੁਬਈ ਸਥਿਤ ਅਪਾਰਟਮੈਂਟ ਵਿੱਚ ਭੇਤਭਰੀ ਹਾਲਤ ਵਿੱਚ ਪਾਇਆ ਗਿਆ ਸੀ ਜਿਸ ਮਗਰੋਂ ਮੁੰਬਈ ਪੁਲਿਸ ਨੇ ਮੁੱਢਲੀ ਜਾਂਚ ਦੌਰਾਨ ਉਸ ਵੱਲੋਂ ਖੁਦਕੁਸ਼ੀ ਕੀਤੇ ਜਾਣ ਦਾ ਮਾਮਲਾ ਦਰਜ ਕੀਤਾ ਸੀ ਪਰ ਬਾਅਦ ਵਿੱਚ ਇਹ ਮਾਮਲਾ ਸੀ.ਬੀ.ਆਈ.ਦੇ ਹਵਾਲੇ ਕਰ ਦਿੱਤਾ ਗਿਆ ਸੀ। ਇਸ ਮਗਰੋਂ ਇਸ ਮਾਮਲੇ ਵਿੱਚ ‘ਨਾਰਕੌਟਿਕਸ ਕੰਟਰੋਲ ਬਿਉਰੋ’ ਅਤੇ ‘ਈ.ਡੀ.’ ਨੂੰ ਵੀ ਸੌਂਪ ਦਿੱਤੀ ਗਈ ਸੀ।