ਮੁਸ਼ਕਲ ਬਹੁਤ ਹੈ ਨੌਕਰੀ ਮਸਾਂ ਮਿਲਦੀ,
ਮਿਲਦੀ ਜਦੋਂ ਤਾਂ ਚੜ੍ਹੇ ਫਿਰ ਚਾਅ ਬੇਲੀ।
ਲੱਗਾ ਜਿਨ੍ਹਾਂ ਲਈ ਹਾਲੇ ਨਹੀਂ ਵਾਰ ਹੁੰਦਾ,
ਕਹਿੰਦੇ ਲੱਗ ਗਿਆ ਏਸ ਦਾ ਦਾਅ ਬੇਲੀ।
ਕਈ ਤਾਂ ਇਹ ਵੀ ਕਹਿਣ ਨੂੰ ਪੁੱਜ ਜਾਂਦੇ,
ਲੱਗਾ ਪੋਸਟ ਦਾ ਕਿੰਨਾ ਦੱਸ ਭਾਅ ਬੇਲੀ।
ਸੁਣਨ ਵਾਲੇ ਨੂੰ ਆਉਂਦਾ ਹੈ ਕਦੇ ਹਾਸਾ,
ਕਦੇ ਆਵੇ ਫਿਰ ਸੁਣਦਿਆਂ ਤਾਅ ਬੇਲੀ।
ਏਨੀ ਮੁਸ਼ਕਲ ਇਹ ਨੌਕਰੀ ਮਿਲੀ ਹੁੰਦੀ,
ਰੱਖਣਾ ਚਾਹੀਦਾ ਇਹਦਾ ਈ ਮਾਣ ਬੇਲੀ।
ਚੰਦ ਕੁ ਨੋਟਾਂ ਦੇ ਖਾਤਰ ਜੋ ਜਾਣ ਪਕੜੇ,
ਕਰਦੇ ਪਾਪੀ ਉਹ ਮਾਣ ਦਾ ਘਾਣ ਬੇਲੀ।
-ਤੀਸ ਮਾਰ ਖਾਂ
23 ਮਾਰਚ , 2025
