ਯੈੱਸ ਪੰਜਾਬ
ਮਨਾਲੀ, 24 ਜੂਨ, 2022:
ਹਿਮਾਚਲ ਵਿੱਚ ਸੈਰ-ਸਪਾਟੇ ਦੇ ਲਿਹਾਜ਼ ਨਾਲ ਅਹਿਮ ਸਥਾਨ ਰੱਖਦੇ ਮਨਾਲੀ ਦੇ ਇਕ ਵੱਡੇ ਹੋਟਲ ਵਿੱਚ ਸ਼ੁੱਕਰਵਾਰ ਸਵੇਰੇ ਗੋਲੀ ਚੱਲ ਗਈ ਜਿਸ ਵਿੱਚ ਦੋ ਪੁਰਸ਼ਾਂ ਦੀ ਮੌਤ ਹੋ ਗਈ ਜਦਕਿ ਇਕ ਔਰਤ ਜ਼ਖ਼ਮੀ ਦੱਸੀ ਜਾ ਰਹੀ ਹੈ, ਜਿਸਨੂੰ ਇਲਾਜ ਲਈ ਹਸਪਤਾਲ ਦਾਖ਼ਲ ਕਰਵਾਇਆ ਗਿਆ ਹੈ।
ਮਾਮਲਾ ਪ੍ਰੇਮ ਸੰਬੰਧਾਂ ਨਾਲ ਜੋੜ ਕੇ ਵੇਖ਼ਿਆ ਜਾ ਰਿਹਾ ਹੈ। ਪ੍ਰਾਪਤ ਵੇਰਵਿਆਂ ਅਨੁਸਾਰ ਹੋਟਲ ਦੇ ਇਕ ਕਮਰੇ ਵਿੱਚ ਇਕ ਔਰਤ ਅਤੇ ਉਸਦਾ ਪ੍ਰੇਮੀ ਹਾਜ਼ਰ ਸੀ ਕਿ ਸਵੇਰੇ ਔਰਤ ਦਾ ਪਤੀ ਵੀ ਹੋਟਲ ਪਹੁੰਚ ਗਿਆ ਅਤੇ ਉਸਨੇ ਦੋਹਾਂ ਨੂੰ ਇਕੋ ਕਮਰੇ ਵਿੱਚ ਵੇਖ਼ ਦੋਹਾਂ ’ਤੇ ਗੋਲੀਆਂ ਦਾਗ ਦਿੱਤੀਆਂ ਅਤੇ ਬਾਅਦ ਵਿੱਚ ਖ਼ੁਦ ਨੂੰ ਵੀ ਗੋਲੀ ਮਾਰ ਲਈ। ਇਸ ਘਟਨਾ ਵਿੱਚ ਪ੍ਰੇਮੀ ਅਤੇ ਪਤੀ ਦੋਹਾਂ ਦੀ ਮੌਤ ਹੋ ਗਈ ਜਦਕਿ ਔਰਤ ਜ਼ਖ਼ਮੀ ਹੋ ਗਈ। ਗੋਲੀ ਔਰਤ ਦੀ ਬਾਂਹ ਵਿੱਚ ਲੱਗੀ ਹੈ।
ਪਤਾ ਲੱਗਾ ਹੈ ਕਿ ਇਹ ਸਾਰੇ ਲੋਕ ਦਿੱਲੀ ਨਾਲ ਸੰਬੰਧਤ ਹਨ। ਦੋ ਔਰਤਾਂ ਮਨਾਲੀ ਦੇ ਸ਼ੁਰੂ ਇਲਾਕੇ ਵਿੱਚ ਸਥਿਤ ‘ਹਿਮਾਲਅਨ ਉਕ’ ਨਾਂਅ ਦੇ ਹੋਟਲ ਨੂੰ ਲੀਜ਼ ’ਤੇ ਲੈ ਕੇ ਚਲਾ ਰਹੀਆਂ ਦੱਸੀਆਂ ਜਾਂਦੀਆਂ ਸਨ।
ਇਹ ਵੀ ਖ਼ਬਰ ਹੈ ਕਿ ਹੋਟਲ ਵਿੱਚ ਰਾਤ ਇਕ ਪਾਰਟੀ ਸੀ ਜਿਸ ਮਗਰੋਂ ਇਕ ਔਰਤ ਆਪਣੇ ਪ੍ਰੇਮੀ ਨਾਲ ਹੋਟਲ ਦੇ ਇਕ ਕਮਰੇ ਵਿੱਚ ਚਲੀ ਗਈ ਪਰ ਸਵੇਰੇ ਉਸਦਾ ਪਤੀ ਹੋਟਲ ਆ ਪੁੱਜਾ ਜਿਸ ’ਤੇ ਉਸਨੇ ਗੁੱਸੇ ਵਿੱਚ ਆ ਕੇ ਦੋਹਾਂ ’ਤੇ ਗੋਲੀਆਂ ਚਲਾਉਣ ਮਗਰੋਂ ਆਪਣੇ ਆਪ ਨੂੂੰ ਗੋਲੀ ਮਾਰ ਲਈ।
ਇਹ ਘਟਨਾ ਸਵੇਰੇ ਲਗਪਗ 7 ਵਜੇ ਵਾਪਰੀ ਅਤੇ ਹੋਟਲ ਸਟਾਫ਼ ਜਦ ਕਮਰੇ ਵਿੱਚ ਪੁੱਜਾ ਤਾਂ ਦੋ ਵਿਅਕਤੀਆਂ ਦੀਆਂ ਲਾਸ਼ਾਂ ਪਈਆਂ ਸਨ ਜਦਕਿ ਔਰਤ ਜ਼ਖ਼ਮੀ ਹਾਲਤ ਵਿੱਚ ਸੀ।
ਪੁਲਿਸ ਇਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ ਅਤੇ ਕਮਰੇ ਦੀ ਜਾਂਚ ਲਈ ਫ਼ਾਰੈਂਸਿਕ ਟੀਮ ਨੂੰ ਬੁਲਾਇਆ ਗਿਆ ਹੈ। ਪੁਲਿਸ ਅਜੇ ਕਿਸੇ ਗੱਲ ਦੀ ਪੁਸ਼ਟੀ ਨਹੀਂ ਕਰ ਰਹੀ ਹੈ।
ਯੈੱਸ ਪੰਜਾਬ ਦੀਆਂ ਅਹਿਮ ਖ਼ਬਰਾਂ ਦੇ ਅਪਡੇਟਸ ਲਈ ਇੱਥੇ ਕਲਿੱਕ ਕਰਕੇ ਸਾਡੇ ਟੈਲੀਗਰਾਮ ਚੈਨਲ ਨਾਲ ਜੁੜੋ
