ਯੈੱਸ ਪੰਜਾਬ
ਜਲੰਧਰ, 30 ਮਾਰਚ, 2021:
ਪੰਜਾਬ ਦੇ ਨਾਮਵਰ ਗਾਇਕ ਦਿਲਜਾਨ ਦੀ ਸੜਕ ਹਾਦਸੇ ਵਿੱਚ ਮੌਤ ਹੋ ਗਈ ਹੈ। ਦਿਲਜਾਨ ਭਾਰਤ ਅਤੇ ਪਾਕਿਸਤਾਨ ਦੇ ਗਾਇਕਾਂ ਦੇ ਮੁਕਾਬਲਾਮਈ ਅੰਦਾਜ਼ ਵਿੱਚ ਬਣਾਏ ਗਏ ਰਿਐਲਟੀ ਸ਼ੋਅ ‘ਸੁਰ ਕਸ਼ੇਤਰਾ’ ਦਾ ਭਾਰਤ ਵੱਲੋਂ ਜੇਤੂ ਅਤੇ ਫ਼ਾਈਨਲ ਦਾ ਰਨਰ ਅੱਪ ਰਿਹਾ ਸੀ।
2012 ਵਿੱਚ ਉਕਤ ਮੁਕਾਬਲੇ ਵਿੱਚ ਜੇਤੂ ਰਹਿਣ ਤੋਂ ਬਾਅਦ ਦੇਸ਼ ਵਿਦੇਸ਼ ਵਿੱਚ ਚਰਚਾ ਵੱਚ ਆਏ ਦਿਲਜਾਨ ਨੇ ਸੰਗੀਤ ਜਗਤ ਵਿੱਚ ਵੱਡਾ ਨਾਂਅ ਬਣਾ ਲਿਆ ਸੀ ਪਰ ਕੁਦਰਤ ਨੂੰ ਸ਼ਾਇਦ ਕੁਝ ਹੋਰ ਹੀ ਮਨਜ਼ੂਰ ਸੀ।
ਦਿਲਜਾਨ ਦੀ ਉਸ ਵੇਲੇ ਬੜੀ ਚਰਚਾ ਹੋਈ ਸੀ ਜਦ ਉਕਤ ਰਿਐਲਟੀ ਸ਼ੋਅ ਦੌਰਾਨ ਹੀ ਆਸ਼ ਭੌਂਸਲੇ ਉਸਦੀ ਗਾਇਕੀ ਤੋਂ ਕਾਫ਼ੀ ਪ੍ਰਭਾਵਿਤ ਹੋਈ ਸੀ।
ਸੋਮਵਾਰ ਤੜਕੇ ਉਸਦੀ ਕਾਰ ਜਲੰਧਰ-ਅੰਮ੍ਰਿਤਸਰ ਰੋਡ ’ਤੇ ਜੰਡਿਆਲਾ ਗੁਰੂ ਪੁਲ ਨੇੜੇ ਉਸ ਵੇਲੇ ਡਿਵਾਈਡਰ ਨਾਲ ਟਕਰਾ ਗਈ ਜਦ ਉਹ ਅੰਮ੍ਰਿਤਸਰ ਤੋਂ ਕਰਤਾਰਪੁਰ ਪਰਤ ਰਿਹਾ ਸੀ। ਉਸਦੀ ਮੌਕੇ ’ਤੇ ਹੀ ਮੌਤ ਹੋ ਗਈ। ਹਾਦਸੇ ਵੇਲੇ ਦਿਲਜਾਨ ਕਾਰ ਵਿੱਚ ਇਕੱਲਾ ਹੀ ਸੀ। ਰਾਹਗੀਰਾਂ ਨੇ ਪੁਲਿਸ ਨੂੰ ਸੂਚਿਤ ਕੀਤਾ ਜਿਸ ਮਗਰੋਂ ਉਸਦੀ ਮ੍ਰਿਤਕ ਦੇਹ ਪੋਸਟ ਮਾਰਟਮ ਲਈ ਭੇਜੀ ਗਈ ਹੈ।
ਕਰਤਾਰਪੁਰ ਦੇ ਮਦਨ ਮਦਾਰ ਉਰਫ਼ ਮਦਨ ਕਰਤਾਰਵੀ ਦਾ ਬੇਟਾ ਦਿਲਜਾਨ ਸ਼ੁਰੂ ਤੋਂ ਹੀ ਇਕ ਗਾਇਕ ਬਣਨਾ ਚਾਹੁੰਦਾ ਸੀ ਅਤੇ ਸੁਰ ਕਸ਼ੇਤਰਾ ਵਿੱਚ ਕੌਮਾਂਤਰੀ ਪੱਧਰ ’ਤੇ ਨਾਮਣਾ ਖੱਟਣ ਤੋਂ ਪਹਿਲਾਂ ਉਸਨੇ 2006-07 ਵਿੱਚ ਐਮ.ਐਚ. 1 ਚੈਨਲ ਦੇ ਸੰਗੀਤਕ ਰਿਐਲਟੀ ਸ਼ੋਅ ‘ਆਵਾਜ਼ ਪੰਜਾਬ ਦੀ’ ਵਿੱਚ ਵੀ ਰਨਰ ਅੱਪ ਰਿਹਾ ਸੀ। ਉਸਦੇ ਪਿਤਾ ਮਦਨ ਕਰਤਾਰਵੀ ਉਸਤਾਦ ਪੂਰਨ ਸ਼ਾਹਕੋਟੀ ਦੇ ਸ਼ਗਿਰਦ ਹਨ।
ਪਤਾ ਲੱਗਾ ਹੈ ਕਿ ਦਿਲਜਾਨ ਦਾ ਇਕ ਨਵਾਂ ਗੀਤ 2 ਅਪ੍ਰੈਲ ਨੂੰ ਰਿਲੀਜ਼ ਹੋਣ ਜਾ ਰਿਹਾ ਸੀ ਅਤੇ ਉਹ ਇਸੇ ਦੀ ਤਿਆਰੀ ਦੇ ਸਿਲਸਿਲੇ ਵਿੱਚ ਕਿਸੇ ਮੀਟਿੰਗ ਲਈ ਅੰਮ੍ਰਿਤਸਰ ਗਿਆ ਸੀ।