ਯੈੱਸ ਪੰਜਾਬ
ਜਲੰਧਰ, 23 ਮਾਈ, 2022 –
ਅੱਜ ਸਥਾਨਕ ਸੁਰਜੀਤ ਹਾਕੀ ਸੁਸਾਇਟੀ ਦੇ ਸੀਨੀਅਰ ਫਾਉਂਡਰ ਮੈਂਬਰ ਤੇ ਮੀਤ ਪ੍ਰਧਾਨ ਬਲਦੇਵ ਸਿੰਘ ਰੰਧਾਵਾ, ਜਿਹਨਾਂ ਦੀ ਤਬੀਅਤ ਕਾਫੀ ਸਮੇਂ ਤੋਂ ਨਾਸਾਜ ਚਲੀ ਆ ਰਹੀ ਹੈ, ਦਾ ਹਾਲ ਚਾਲ ਪੁੱਛਣ ਗਏ ਸੀਨੀਅਰ ਮੈਂਬਰਾਂ ਕ੍ਰਮਵਾਰ ਸੁਰਿੰਦਰ ਸਿੰਘ ਭਾਪਾ ਤੇ ਇਕਬਾਲ ਸਿੰਘ ਸੰਧੂ ਨਾਲ ਗੱਲਬਾਤ ਕਰਦੇ ਹੋਏ ਉਹਨਾਂ ਕਿਹਾ ਕਿ ਸੁਰਜੀਤ ਹਾਕੀ ਸੁਸਾਇਟੀ ਦੇਸ਼ ਦੀ ਇਕ ਸਿਰਮੌਰ ਸੰਸਥਾ ਹੈ ਅਤੇ ਇਸ ਸੁਸਾਇਟੀ ਨਾਲ ਲੰਬੇ ਸਮੇਂ ਤਕ ਜੁੜ੍ਹੇ ਰਹਿਣਾ ਉਹਨਾਂ ਲਈ ਮਾਣ ਵਾਲੀ ਗੱਲ ਹੈ ।
ਉਹਨਾਂ ਕਿਹਾ ਕਿ ਸੁਸਾਇਟੀ ਵੱਲੋਂ ਜੋ ਪਿਛਲੇ 38 ਸਾਲਾਂ ਤੋਂ ਸੁਰਜੀਤ ਹਾਕੀ ਟੂਰਨਾਂਮੈਂਟ ਕਰਵਾਉਣ ਦੇ ਨਾਲ ਨਾਲ ਸੁਰਜੀਤ ਹਾਕੀ ਅਕੈਡਮੀ ਦਾ ਸੁਰੂ ਕਰਨਾ ਸੁਸਾਇਟੀ ਦਾ ਇਕ ਚੰਗਾ ਉਪਰਾਲਾ ਹੈ । ਉਹਨਾਂ ਅੱਗੇ ਕਿਹਾ ਕਿ ਛੋਟੇ ਬੱਚਿਆਂ ਨੂੰ ਖੇਡ ਕੰਪੀਟੀਸ਼ਨ ਦੇਣ ਲਈ ਸੁਸਾਇਟੀ ਵੱਲੋਂ ਚਾਲੂ ਕੀਤੀ ਗਈ ਸੁਰਜੀਤ ਹਾਕੀ ਲੀਗ ਨੂੰ ਸਾਲ ਵਿੱਚ ਦੋ ਵਾਰ ਕਰਵਾਉਣ ਦਾ ਵੀ ਸੁਝਾਅ ਦਿੱਤਾ ਗਿਆ ।
ਖੇਡਾਂ ਦੇ ਖੇਤਰ ਵਿਚ ‘ ਭਾਊ ‘ ਦੇ ਨਾਮ ਨਾਲ ਜਾਣੇ ਜਾਂਦੇ ਬਲਦੇਵ ਸਿੰਘ ਰੰਧਾਵਾ, ਕਮਾਂਡੈਂਟ (ਸੇਵਾਮੁਕਤ) ਬੀ.ਐੱਸ.ਐੱਫ.ਜੋ ਅਥਲੈਟਿਕਸ ਵਿਚ ਕੌਮੀ ਰਿਕਾਰਡ ਹੋਲਡਰ ਹਨ, ਨੇ ਸੁਰਜੀਤ ਹਾਕੀ ਸੁਸਾਇਟੀ ਨਾਲ ਜੁੜੀਆਂ ਯਾਦਾਂ ਵੀ ਮੈਂਬਰਾਂ ਨਾਲ ਸਾਂਝੀਆਂ ਕੀਤੀਆਂ ।
ਇਸ ਮੌਕੇ ਉਪਰ ਉਹਨਾਂ ਦੇ ਬੇਟੇ ਤੇ ਆਮ ਆਦਮੀ ਪਾਰਟੀ ਦੇ ਸਟੇਟ ਜੁਆਇੰਟ ਸਕੱਤਰ ਰਮਨੀਕ ਸਿੰਘ ਰੰਧਾਵਾ ਵੀ ਹਾਜਿਰ ਸਨ । ਇਸੇ ਦੌਰਾਨ ਸੁਸਾਇਟੀ ਦੇ ਪ੍ਰਧਾਨ ਤੇ ਡੀ.ਸੀ. ਜਲੰਧਰ ਘਣਸ਼ਿਆਮ ਥੋਰੀ, ਸੁਸਾਇਟੀ ਦੇ ਫਾਉਂਡਰ ਤੇ ਸੀਨੀਅਰ ਮੈਂਬਰਾਂ ਕ੍ਰਮਵਾਰ ਲਖਵਿੰਦਰ ਪਾਲ ਸਿੰਘ ਖੈਰਾ, ਰਾਮ ਪ੍ਰਤਾਪ ਸਿੰਘ, ਲੇਖ ਰਾਜ ਨਈਅਰ, ਗੁਰਵਿੰਦਰ ਸਿੰਘ ਗੁੱਲੂ, ਗੌਰਵ ਅਗਰਵਾਲ ਅਤੇ ਰਣਬੀਰ ਸਿੰਘ ਟੁੱਟ ਨੇ ਬਲਦੇਵ ਸਿੰਘ ਭਾਊ ਦੀ ਜਲਦ ਸਿਹਤਯਾਬੀ ਲਈ ਸ਼ੁੱਭ ਕਾਮਨਾਵਾਂ ਭੇਜੀਆਂ ਹਨ ।
ਯੈੱਸ ਪੰਜਾਬ ਦੀਆਂ ਅਹਿਮ ਖ਼ਬਰਾਂ ਦੇ ਅਪਡੇਟਸ ਲਈ ਇੱਥੇ ਕਲਿੱਕ ਕਰਕੇ ਸਾਡੇ ਟੈਲੀਗਰਾਮ ਚੈਨਲ ਨਾਲ ਜੁੜੋ