ਯੈੱਸ ਪੰਜਾਬ
ਚੰਡੀਗੜ੍ਹ, 18 ਸਤੰਬਰ, 2021:
ਪੰਜਾਬ ਦੇ ਸਾਬਕਾ ਡੀ.ਜੀ.ਪੀ. ਅਤੇ ਪ੍ਰਦੇਸ਼ ਕਾਂਗਰਸ ਪ੍ਰਧਾਨ ਸ: ਨਵਜੋਤ ਸਿੰਘ ਸਿੱਧੂ ਦੇ ਪ੍ਰਿੰਸੀਪਲ ਚੀਫ਼ ਐਡਵਾਈਜ਼ਰ ਸ੍ਰੀ ਮੁਹੰਮਦ ਮੁਸਤਫ਼ਾ ਨੇ ਸਨਿਚਰਵਾਰ ਪਹਿਲੀ ਵਾਰ ਪੰਜਾਬ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੇ ਖਿਲਾਫ਼ ਤਕੜਾ ਹੱਲਾ ਬੋਲਿਆ ਹੈ।
ਸ੍ਰੀ ਮੁਸਤਫ਼ਾ ਜਿਹੜੇ ਕੈਪਟਨ ਅਮਰਿੰਦਰ ਸਿੰਘ ਦੇ ਨੇੜਲੇ ਸਾਥੀਆਂ ਵਿੱਚ ਗਿਣੇ ਜਾਂਦੇ ਸਨ ਅਤੇ ਜਿਨ੍ਹਾਂ ਦੀ ਪਤਨੀ ਬੇਗਮ ਰਜ਼ੀਆ ਸੁਲਤਾਨਾ ਪੰਜਾਬ ਕੈਬਨਿਟ ਵਿੱਚ ਮੰਤਰੀ ਹਨ, ਨੇ ਅੱਜ ਟਵਿੱਟਰ ਰਾਹੀਂ ਸਨਿਚਰਵਾਰ ਨੂੰ ਚੰਡੀਗੜ੍ਹ ਦੇ ਪੰਜਾਬ ਕਾਂਗਰਸ ਭਵਨ ਵਿੱਚ ਹੋਣ ਵਾਲੀ ਵਿਧਾਇਕ ਦਲ ਦੀ ਮੀਟਿੰਗ ਬਾਰੇ ਆਪਣੇ ਵਿਚਾਰ ਰੱਖੇ ਹਨ।
ਸ੍ਰੀ ਮੁਸਤਫ਼ਾ ਜੋ ਆਪਣੀ ਸੀਨੀਆਰਤਾ ਦੇ ਹਵਾਲੇ ਨਾਲ ਡੀ.ਜੀ.ਪੀ. ਬਣਨ ਦੀ ਦੌੜ ਵਿੱਚ ਸ਼ਾਮਲ ਸਨ, ਨੂੰ ਰਾਜ ਦੇ ਪੁਲਿਸ ਮੁਖ਼ੀ ਬਣੇ ਬਿਨਾਂ ਹੀ ਸੇਵਾਮੁਕਤ ਹੋਣਾ ਪਿਆ ਕਿਉਂਕਿ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਸ੍ਰੀ ਸੁਰੇਸ਼ ਅਰੋੜਾ ਦੀ ਸੇਵਾ ਮੁਕਤੀ ਤੋਂ ਬਾਅਦ ਉਨ੍ਹਾਂ ਦੀ ਜਗ੍ਹਾ ਸ੍ਰੀ ਦਿਨਕਰ ਗੁਪਤਾ ਨੂੰ ਡੀ.ਜੀ.ਪੀ.ਨਿਯੁਕਤ ਕਰ ਦਿੱਤਾ ਸੀ। ਸ੍ਰੀ ਮੁਸਤਫ਼ਾ ਨੇ ਇਸ ਸੰਬੰਧ ਵਿੱਚ ਨੌਕਰੀ ’ਤੇ ਹੁੰਦਿਆਂ ਸਰਕਾਰ ਅਤੇ ਸ੍ਰੀ ਦਿਨਕਰ ਗੁਪਤਾ ਨਾਲ ਇਕ ਲੰਬੀ ਕਾਨੂੰਨੀ ਲੜਾਈ ਲੜੀ ਸੀ ਅਤੇ ਇਸ ਸੰਬੰਧੀ ਇਕ ਮਾਮਲਾ ਅਜੇ ਵੀ ਸੁਪਰੀਮ ਕੋਰਟ ਵਿੱਚ ਲੰਬਿਤ ਹੈ।
ਅੱਜ ਟਵਿੱਟਰ ’ਤੇ ਕੈਪਟਨ ਅਮਰਿੰਦਰ ਸਿੰਘ ਖਿਲਾਫ਼ ਮੋਰਚਾ ਖੋਲ੍ਹਦਿਆਂ ਸ੍ਰੀ ਮੁਸਤਫ਼ਾ ਨੇ ਲਿਖ਼ਿਆ ਕਿ 2017 ਵਿੱਚ ਪੰਜਾਬ ਨੇ ਕਾਂਗਰਸ ਨੂੰ 80 ਵਿਧਾਇਕ ਦਿੱਤੇ ਪਰ ਅਫ਼ਸੋਸ ਕਿ ਕਾਂਗਰਸੀਆਂ ਨੂੰ ਕਾਂਗਰਸ ਦਾ ਮੁੱਖ ਮੰਤਰੀ ਅਜੇ ਤਾਂਈਂ ਨਹੀਂ ਮਿਲਿਆ। ਸਮਾਂ ਆ ਗਿਆ ਹੈ ਕਿ ਸਾਢੇ ਚਾਰ ਸਾਲ ਦੇ ਲੰਬੇ ਅਤੇ ਤਕਲੀਫ਼ਦੇਹ ਇੰਤਜ਼ਾਰ ਤੋਂ ਬਾਅਦ ਆਪਣਾ ਨਵਾਂ ਮੁੱਖ ਮੰਤਰੀ ਚੁਣਨ ਦਾ ਮੌਕਾ ਮਿਲ ਰਿਹਾ ਹੈ ਅਤੇ ਕਾਂਗਰਸ ਨੂੰ ਮੁੜ ਚੁਣ ਕੇ ਕਾਂਗਰਸ ਦਾ ਆਪਣਾ ਮੁੱਖ ਮੰਤਰੀ ਬਣ ਸਕੇ ਜੋ ਪੰਜਾਬ ਅਤੇ ਪੰਜਾਬੀਆਂ ਦੀ ਦਰਦ 5 ਸਾਲ ਲਈ ਰੱਖ ਸਕੇ।
ਇਕ ਹੋਰ ਟਵੀਟ ਰਾਹੀਂ ਸ੍ਰੀ ਮੁਸਤਫ਼ਾ ਨੇ ਇਹ ਵੀ ਕਿਹਾ ਕਿ ਇਹ ਕਾਂਗਰਸ ਦੇ 80 ਵਿੱਚੋਂ 79 ਵਿਧਾਇਕਾਂ ਲਈ ਕਾਂਗਰਸ ਨੂੰ ਅਜ਼ਾਦ ਕਰਾਉਣ ਦੀ ਘੜੀ ਹੈ ਤਾਂ ਜੋ ਪਾਰਟੀ ਦੇ ਸਨਮਾਨ ਨੂੰ ਬਹਾਲ ਕੀਤਾ ਜਾ ਸਕੇ। ਉਹਨਾਂ ਨੇ ਆਪਣੇ ਟਵੀਟ ਰਾਹੀਂ ਸਨਿਚਰਵਾਰ ਦੀ ਸੀ.ਐਲ.ਪੀ.ਮੀਟਿੰਗ ਨੂੰ ਇਕ ਮੌਕੇ ਦੇ ਰੂਪ ਵਿੱਚ ਦਿੱਤੇ ਜਾਣ ਲਈ ਪਾਰਟੀ ਲੀਡਰਸ਼ਿਪ ਦਾ ਧੰਨਵਾਦ ਵੀ ਕੀਤਾ ਹੈ।
ਸ੍ਰੀ ਮੁਸਤਫ਼ਾ ਨੇ ਆਪਣੇ ਇਨ੍ਹਾਂ ਟਵੀਟਸ ਰਾਹੀਂ ਨਾ ਕੇਵਲ ਸੰਕੇਤ ਦਿੱਤਾ ਹੈ ਸਗੋਂ ਚੰਗੀ ਤਰ੍ਹਾਂ ਸਨਿਚਰਵਾਰ ਦੀ ਵਿਧਾਇਕ ਦਲ ਦੀ ਮੀਟਿੰਗ ਦੇ ਏਜੰਡੇ ਦਾ ਖ਼ੁਲਾਸਾ ਕਰ ਦਿੱਤਾ ਹੈ ਜਿਸ ਮੀਟਿੰਗ ਬਾਰੇ ਫ਼ੈਸਲਾ ਖ਼ੁਦ ਹਾਈਕਮਾਨ ਨੇ ਲੈਂਦਿਆਂ ਨਾ ਕੇਵਲ ਇਸ ਦਾ ਦਿਨ, ਸਮਾਂ ਅਤੇ ਸਥਾਨ ਤੈਅ ਕੀਤਾ ਸਗੋਂ ਇਸ ਲਈ ਸਾਰੇ ਵਿਧਾਇਕਾਂ ਨੂੰ ‘ਆਦੇਸ਼’ ਦਿੱਤਾ ਕਿ ਉਹ ਸਾਰੇ ਇਸ ਮੀਟਿੰਗ ਵਿੱਚ ਸ਼ਾਮਲ ਹੋਣ।
ਯੈੱਸ ਪੰਜਾਬ ਦੀਆਂ ਅਹਿਮ ਖ਼ਬਰਾਂ ਦੇ ਅਪਡੇਟਸ ਲਈ ਇੱਥੇ ਕਲਿੱਕ ਕਰਕੇ ਸਾਡੇ ਟੈਲੀਗਰਾਮ ਚੈਨਲ ਨਾਲ ਜੁੜੋ
