ਯੈੱਸ ਪੰਜਾਬ
ਮਿਸ਼ੀਗਨ, 11 ਜਨਵਰੀ, 2022 –
ਨਾਦ ਪ੍ਰਗਾਸੁ (ਯੂ.ਐੱਸ.ਏ.) ਸ਼ਬਦ ਸਿਧਾਂਤ ਨੂੰ ਸਮਰਪਿਤ ਖੋਜ ਸੰਸਥਾ ਹੈ। ਸੰਸਥਾ ਵੱਲੋਂ ਗੁਰਦੁਆਰਾ ਮਾਤਾ ਤ੍ਰਿਪਤਾ ਜੀ (ਪਲਿਮਥ-ਮਿਸ਼ੀਗਨ) ਵਿਖੇ ਫ਼ਾਰਸੀ ਜ਼ੁਬਾਨ ਦੀ ਸਿਖਲਾਈ ਹਿਤ ਕਲਾਸਾਂ ਦਾ ਆਰੰਭ ਕੀਤਾ ਗਿਆ। ਤਿੰਨ ਮਹੀਨੇ ਚੱਲਣ ਵਾਲੇ ਇਸ ਕੋਰਸ ਵਿਚ ਫ਼ਾਰਸੀ ਦੀ ਮੁੱਢਲੀ ਜਾਣਕਾਰੀ ਦੇ ਨਾਲ-ਨਾਲ ਜ਼ਫਰਨਾਮਾ (ਗੁਰੂ ਗੋਬਿੰਦ ਸਿੰਘ ਜੀ) ਅਤੇ ਭਾਈ ਨੰਦ ਲਾਲ ਗੋਯਾ ਦੀ ਫ਼ਾਰਸੀ ਕਵਿਤਾ ਦੇ ਪ੍ਰਮੁੱਖ ਹਿੱਸਿਆਂ ਨਾਲ ਜਾਣ ਪਹਿਚਾਣ ਕਰਵਾਈ ਜਾਏਗੀ।
ਇਸ ਪ੍ਰੋਗਰਾਮ ਦਾ ਆਰੰਭ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਵਿਚ ਦਰਜ ਤਿਲੰਗ ਰਾਗ ਵਿਚ ਆਉਂਦੇ ਫ਼ਾਰਸੀ ਸ਼ਬਦ (ਯਕ ਅਰਜ ਗੁਫਤਮ ਪੇਸਿ ਤੋ ਦਰ ਗੋਸ ਕੁਨ ਕਰਤਾਰ ॥) ਦੇ ਮਧੁਰ ਗਾਇਨ ਨਾਲ ਹੋਇਆ। ਜਸਨੂਰ ਕੌਰ ਅਤੇ ਗੁਨੀਤ ਕੌਰ ਦੀਆਂ ਸੁਬਕ ਰਿਆਜ਼ੀ ਅਵਾਜ਼ਾਂ ਦੀ ਮਾਸੂਮੀ ਨੇ ਨਾਮ-ਰਸੀ ਤਰੰਗਾਂ ਦੇ ਵਿਸਮਾਦ ਨਾਲ, ਸੰਗਤ ਨੂੰ ਫ਼ਾਰਸੀ ਭਾਸ਼ਾ ਨਾਲ ਆਪਣੇ ਸੁੱਚੇ ਰਿਸ਼ਤੇ ਦੀ ਯਾਦ ਤਾਜ਼ਾ ਕਰਵਾਈ।
ਨਾਦ ਪ੍ਰਗਾਸੁ, ਸ੍ਰੀ ਅੰਮ੍ਰਿਤਸਰ ਤੋਂ ਪਹੁੰਚੇ ਪ੍ਰੋ. ਜਗਦੀਸ਼ ਸਿੰਘ ਨੇ ਸ਼ਬਦ ਦਾਰਸ਼ਨਿਕਤਾ ਦੇ ਨੁਕਤੇ ਤੋਂ ਫ਼ਾਰਸੀ ਭਾਸ਼ਾ ਨਾਲ ਰਿਸ਼ਤੇ ਦਾ ਦ੍ਰਿਸ਼ਟੀਕੋਣ ਉਜਾਗਰ ਕੀਤਾ। ਸ਼ਬਦ ਦਾਰਸ਼ਨਿਕਤਾ ਨਾਮ-ਰਸੀ ਵਿਸ਼ਵ-ਵਿਆਪਕਤਾ ਦੇ ਸਬੰਧਾਂ ਨੂੰ ਸ਼ਬਦ-ਬ੍ਰਹਿਮੰਡਤਾ ਦੀ ਪਾਰਦਰਸ਼ਤਾ ਨਾਲ ਜੋੜਦੀ ਹੈ। ਉਹਨਾਂ ਦੱਸਿਆ ਕਿ ਫ਼ਾਰਸੀ ਭਾਸ਼ਾ ਵਿਚਲੀ ਨਾਮ ਰਸਿਕਤਾ ਨੂੰ ਸ਼ਬਦ-ਬ੍ਰਹਿਮੰਡਤਾ ਨਾਲ ਜੋੜ, ਸਾਮੀ ਪਰੰਪਰਾਵਾਂ (ਯਹੂਦੀ, ਈਸਾਈ, ਇਸਲਾਮ) ਦੇ ਤਹਿਜ਼ੀਬੀ ਮਾਡਲ ਨਾਲ ਸੰਵਾਦ ਰਚਾਇਆ ਜਾ ਸਕਦਾ ਹੈ।
ਇਹ ਸੰਵਾਦ ਸਿੱਖ ਸਮਾਜ ਦੀ ਵਿਸ਼ਵ ਨੂੰ ਵੱਡੀ ਦੇਣ ਹੋ ਸਕਦਾ ਹੈ ਕਿਉਂਕਿ ਸਾਮੀ ਪਰੰਪਰਾ ਵਿਚਲੇ ਤਣਾਅ ਸਮਕਾਲੀ ਵਿਸ਼ਵ ਨੂੰ ਅਸਾਵੇਂਪਣ `ਚ ਧੱਕ ਰਹੇ ਹਨ। ਪ੍ਰੋ. ਸਾਹਿਬ ਨੇ ਫ਼ਾਰਸੀ ਨਾਲ ਸਿੱਖ ਸਬੰਧਾਂ ਨੂੰ ਉਜਾਗਰ ਕਰਦੇ ਹੋਏ ਸਾਹਿਤ, ਕੋਸ਼ਕਾਰੀ, ਇਤਿਹਾਸ-ਸ੍ਰੋਤ, ਅਨੁਵਾਦ, ਵਿਆਖਿਆ ਆਦਿ ਸਬੰਧੀ ਵਿਸਥਾਰ ਪੂਰਵਕ ਅੰਕੜੇ ਪੇਸ਼ ਕੀਤੇ। ਇਹ ਖੋਜ ਸਰਵੇਖਣ ਅਤੇ ਵਰਗੀਕਰਨ ਨਵੇਂ ਖੋਜੀਆਂ ਲਈ ਬਹੁਤ ਸਹਾਇਕ ਸਿੱਧ ਹੋਵੇਗਾ।
ਜ਼ਫਰਨਾਮਾ (ਗੁਰੂ ਗੋਬਿੰਦ ਸਿੰਘ ਜੀ) ਅਤੇ ਭਾਈ ਨੰਦ ਲਾਲ ਗੋਯਾ ਦੀ ਸ਼ਾਇਰੀ ਦੇ ਅਨੁਵਾਦ ਅਤੇ ਸਟੀਕ ਸਬੰਧੀ ਖੋਜ ਭਰਪੂਰ ਦੁਰਲਭ ਜਾਣਕਾਰੀ ਸ੍ਰੋਤਿਆਂ ਲਈ ਬਹੁਤ ਅਕਰਸ਼ਨ ਦਾ ਕਾਰਨ ਬਣੀ। ਉਨ੍ਹਾਂ ਕਿਹਾ ਕਿ ਸਿੱਖ ਧਰਮ, ਇਤਿਹਾਸ, ਸਾਹਿਤ ਅਤੇ ਸਭਿਆਚਾਰ ਦੀ ਸਮਝ ਤੇ ਫੈਲਾਅ ਲਈ ਫ਼ਾਰਸੀ ਭਾਸ਼ਾ ਨਾਲ ਜੁੜਨਾ ਸਮੇਂ ਦੀ ਲੋੜ ਹੈ।
ਉਨ੍ਹਾਂ ਇਸ ਗੱਲ ਉੱਤੇ ਜ਼ੋਰ ਦਿੱਤਾ ਕਿ ਸਿੱਖ ਸਮਾਜ ਸ਼ਬਦ ਦਾਰਸ਼ਨਿਕਤਾ ਦੀਆਂ ਵਿਸ਼ਵੀ-ਜ਼ਿੰਮੇਵਾਰੀਆਂ ਦੀ ਬੇਰੁਖ਼ੀ ਤੇ ਅਵੇਸਲੇਪਨ ਕਾਰਨ ਹੀ ਅੰਦਰੂਨੀ ਟਕਰਾਵਾਂ `ਚ ਉਲਝ ਆਉਣ ਵਾਲੀਆਂ ਪੀੜ੍ਹੀਆਂ ਦਾ ਰਾਹ ਧੰੁਦਲਾ ਕਰ ਰਿਹਾ ਹੈ। ਫ਼ਾਰਸੀ ਭਾਸ਼ਾ ਰਾਹੀਂ ਅਸੀਂ ਮੁੜ ਆਪਣੇ ਵਿਸ਼ਵ-ਵਿਆਪੀ ਮਾਡਲ ਨੂੰ ਜੀਵੰਤ ਕਰ ਸਕਾਂਗੇ।
ਹਰਜੋਤ ਕੌਰ ਨੇ ਨਫ਼ੀਸ ਅੰਦਾਜ਼ ਵਿਚ ਮੰਚ ਸੰਚਾਲਨ ਕਰਦਿਆਂ ਆਪਣੀ ਖੂਬਸੂਰਤ ਆਵਾਜ਼ ਵਿਚ ਭਾਈ ਨੰਦ ਲਾਲ ਗੋਯਾ ਦੀ ਗਜ਼ਲ “ਹਵਾਏ ਬੰਦਗੀ ਆਵੁਰਦ ਦਰ ਵਜੂਦ ਮਰਾ ਵਗਰਨਿ: ਜ਼ੋਕਿ ਚੁਨੀ ਆਮਦਨ ਨ ਬੂਦ ਮਰਾ” ਪੇਸ਼ ਕੀਤੀ। ਗੁਰਦੁਆਰਾ ਮਾਤਾ ਤ੍ਰਿਪਤਾ ਜੀ (ਪਲਿਮਥ-ਮਿਸ਼ੀਗਨ) ਕਮੇਟੀ ਦੇ ਅਹਿਮ ਮੈਂਬਰ ਰਮਨ ਕੌਰ ਨੇ ਸੰਗਤਾਂ ਦਾ ਧੰਨਵਾਦ ਕੀਤਾ ਅਤੇ ਗੁਰੂ ਘਰਾਂ ਵਿਚ ਖੋਜ ਤੇ ਸਿਰਜਣਾਤਮਕ ਗਤਵਿਧੀਆਂ ਨੂੰ ਉਤਸ਼ਾਹਿਤ ਕਰਨ ਦਾ ਸੁਨੇਹਾ ਵੀ ਦਿੱਤਾ।
ਇਸ ਪ੍ਰੋਗਰਾਮ ਦਾ ਸਿੱਧਾ ਪ੍ਰਸਾਰਨ ਸੋਸ਼ਲ ਮੀਡੀਆ ਪਲੇਟਫਾਰਮ (ਯੂ ਟਿਊਬ) ਉਪਰ ਕੀਤਾ ਗਿਆ ਅਤੇ ਇਸ ਵਿਚ ਅਮਰੀਕਾ ਦੇ ਵੱਖ ਵੱਖ ਰਾਜਾਂ ਤੋਂ ਇਲਾਵਾ ਕਨੇਡਾ, ਜਰਮਨ, ਇਜ਼ਰਾਇਲ, ਭਾਰਤ ਅਤੇ ਇੰਗਲੈਂਡ ਤੋਂ ਵਿਦਿਆਰਥੀਆਂ ਨੇ ਸ਼ਿਰਕਤ ਕੀਤੀ। ਪੰਥ ਦੇ ਪ੍ਰਸਿੱਧ ਕਥਾਵਾਚਕ ਭਾਈ ਪਿੰਦਰਪਾਲ ਸਿੰਘ ਜੀ ਦੀਆਂ ਸ਼ੁਭਇਛਾਵਾਂ ਵੀ ਇਸ ਪ੍ਰੋਗਰਾਮ ਨਾਲ ਜੁੜੀਆਂ ਸਨ।
ਨਾਦ ਪ੍ਰਗਾਸੁ (ਯੂ.ਐਸ.ਏ.) ਦੇ ਡਾਇਰੈਕਟਰ ਅਮਨਦੀਪ ਸਿੰਘ ਨੇ ਦੱਸਿਆ ਕਿ ਫ਼ਾਰਸੀ ਦੀਆਂ ਇਹ ਹਫ਼ਤਾਵਰੀ ਕਲਾਸਾਂ, ਨਾਦ ਪ੍ਰਗਾਸੁ (ਯੂ.ਐਸ.ਏ.) ਵੱਲੋਂ ਫੀਸ ਰਹਿਤ ਰੱਖੀਆਂ ਗਈਆਂ ਹਨ। ਉਨ੍ਹਾਂ ਦੱਸਿਆ ਕਿ ਵਿਦਿਆਰਥੀ ਭਰਵੇਂ ਉਤਸ਼ਾਹੀ ਹੁੰਗਾਰੇ ਨਾਲ ਇਸ ਪਹਿਲੀ ਕਲਾਸ ਵਿਚ ਸ਼ਾਮਿਲ ਹੋਏ।
ਯੈੱਸ ਪੰਜਾਬ ਦੀਆਂ ਅਹਿਮ ਖ਼ਬਰਾਂ ਦੇ ਅਪਡੇਟਸ ਲਈ ਇੱਥੇ ਕਲਿੱਕ ਕਰਕੇ ਸਾਡੇ ਟੈਲੀਗਰਾਮ ਚੈਨਲ ਨਾਲ ਜੁੜੋ
