ਯੈੱਸ ਪੰਜਾਬ
ਸਿੰਘੂ ਬਾਰਡਰ, 15 ਅਕਤੂਬਰ, 2021:
ਸਿੰਘੂ ਬਾਰਡਰ ’ਤੇ ਸ਼ੁੱਕਰਵਾਰ ਸਵੇਰੇ ਇਕ ਸਨਸਨੀਖੇਜ਼ ਮਾਮਲਾ ਸਾਹਮਣੇ ਆਇਆ ਹੈ। ਇਕ ਵਿਅਕਤੀ ਦੀ ਹੱਥ ਵੱਢੀ ਹੋਈ ਲਾਸ਼ ਅੱਜ ਸਵੇਰੇ ਮੋਰਚੇ ਦੇ ਮੰਚ ਕੋਲ ਲਟਕਦੀ ਪਾਈ ਗਈ ਹੈ। ਇਸ ਵਿਅਕਤੀ ਦਾ ਕਤਲ ਬੜੀ ਬੇਰਹਿਮੀ ਨਾਲ ਕੀਤਾ ਗਿਆ ਹੈ।
ਜਿਸ ਵਿਅਕਤੀ ਦੀ ਲਾਸ਼ ਅੱਜ ਸਵੇਰੇ 6 ਵਜੇ ਦੇ ਲਗਪਗ ਬੈਰੀਕੇਡ ਨਾਲ ਟੰਗੀ ਵੇਖ਼ੀ ਗਈ ਉਸ ਦੇ ਸਰੀਰ ’ਤੇ ਤੇਜ਼ ਧਾਰ ਹਥਿਆਰਾਂ ਦੇ ਨਿਸ਼ਾਨ ਪਾਏ ਗਏ ਹਨ।
ਕਾਫ਼ੀ ਦੇਰ ਬਾਅਦ ਇਸ ਵਿਅਕਤੀ ਦੀ ਪਛਾਣ ਸਾਹਮਣੇ ਆਈ। ਇਹ 35 ਸਾਲਾ ਵਿਅਕਤੀ ਤਰਨ ਤਾਰਨ ਦੇ ਪਿੰਡ ਚੀਮਾ ਖ਼ੁਰਦ ਦਾ ਲਖ਼ਬੀਰ ਸਿੰਘ ਦੱਸਿਆ ਜਾ ਰਿਹਾ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਲਖ਼ਬੀਰ ਸਿੰਘ ਮੋਰਚੇ ਵਿੱਚ ਹੀ ਸ਼ਾਮਲ ਸੀ।
ਇਸ ਸੰਬੰਧੀ ਨਿਹੰਗ ਸਿੰਘਾਂ ਵੱਲੋਂ ਜਾਰੀ ਇਕ ਵੀਡੀਓ ਸਾਹਮਣੇ ਆਇਆ ਹੈ ਜਿਸ ਵਿੱਚ ਇਹ ਕਿਹਾ ਗਿਆ ਹੈ ਕਿ ਇਹ ਵਿਅਕਤੀ ਨਿਹੰਗ ਬਾਣੇ ਵਿੱਚ ਹੀ ਉਨ੍ਹਾਂ ਦੇ ਕੈਂਪ ਅੰਦਰ ਦਾਖ਼ਲ ਹੋਇਆ ਸੀ। ਗੁਰੂ ਗ੍ਰੰਥ ਸਾਹਿਬ ਦੀ ਬੇਅਦਬੀ ਕਰ ਰਿਹਾ ਸੀ ਅਤੇ ਇਸਨੂੰ ਫ਼ੜ ਕੇ ਨਿਹੰਗਾਂ ਨੇ ਸੋਧਾ ਲਾਇਆ ਹੈ। ਵੀਡੀਓ ਵਿੱਚ ਜਾਣਕਾਰੀ ਦੇ ਰਹੇ ਨਿਹੰਗ ਨੇ ਇਹ ਵੀ ਜਾਣਕਾਰੀ ਦਿੱਤੀ ਗਈ ਕਿ ‘ਇਸ ਪਾਪੀ ਨੇ ਬਾਬਾ ਬਲਵਿੰਦਰ ਸਿੱਘ ਜੀ ਦੇ ਇੱਥੇ ਲਿਆ ਕੇ ਪ੍ਰਕਾਸ਼ ਕੀਤੇ ਗੁਰੂ ਗ੍ਰੰਥ ਸਾਹਿਬ ਦੀ ਬੇਅਦਬੀ ਕੀਤੀ ਜਿਸ ਮਗਰੋਂ ‘ਫ਼ੌਜਾਂ’ ਨੇ ਇਸ ਦਾ ਗੁੱਟ ਅਤੇ ਲੱਤ ਵੱਢ ਦਿੱਤੀ ਹੈ।’ ਕੋਲ ਹੀ ਮੰਜੇ ’ਤੇ ਪਿਆ ਇਹ ਵਿਅਕਤੀ ਜਿਸਨੂੰ ਪੁੱਛਗਿੱਛ ਕੀਤੀ ਜਾ ਰਹੀ ਹੈ, ਆਪਣੀ ਗ਼ਲਤੀ ਕਬੂਲ ਕਰਦਾ ਨਜ਼ਰ ਆਉਂਦਾ ਹੈ।
ਵੀਡੀਓ ਵਿੱਚ ਨਿਹੰਗ ਉਸ ਵਿਅਕ ਤੀ ਤੋਂ ਵੀ ਪੁੱਛ ਗਿੱਛ ਕਰਦੇ ਨਜ਼ਰ ਆਉਂਦੇ ਹਨ ਜਿਸ ਦਾ ਮਤਲਬ ਹੈ ਕਿ ਉਹ ਪਹਿਲਾਂ ਸੱਟਾ ਮਾਰੇ ਜਾਣ ਦੇ ਬਾਅਦ ਤਕ ਜ਼ਿੰਦਾ ਸੀ ਪਰ ਬਾਅਦ ਵਿੱਚ ਜ਼ਖ਼ਮਾਂ ਦੀ ਤਾਬ ਨਾ ਝੱਲਦਾ ਹੋਇਆ ਦਮ ਤੋੜ ਗਿਆ ਜਿਸ ਮਗਰੋਂ ਉਸਦੀ ਲਾਸ਼ ਬੈਰੀਕੇਡ ਨਾਲ ਟੰਗੀ ਗਈ ਹੋਵੇਗੀ।
ਇਸ ਤੋਂ ਬਾਅਦ ਸਾਹਮਣੇ ਆਏ ਇਕ ਹੋਰ ਵੀਡੀਓ ਵਿੱਚ ਇਹ ਵੀ ਕਿਹਾ ਗਿਆ ਕਿ ਇਹ ਪਹਿਲੀ ਘਟਨਾ ਹੈ ਜਦ ਨਿਹੰਗਾਂ ਦੇ ਕੈਂਪ ਵਿੱਚ ਕਿਸੇ ਨੇ ਬੇਅਦਬੀ ਦੀ ਕੋਸ਼ਿਸ਼ ਕੀਤੀ ਹੋਵੇ ਪਰ ਉਸਨੂੰ ਸੋਧਾ ਲਾ ਦਿੱਤਾ ਗਿਆ ਹੈ।
ਇਹ ਵੀ ਖ਼ਬਰ ਹੈ ਕਿ ਇਕ ਪਾਸੇ ਕਿਸਾਨ ਆਗੂ ਅਤੇ ਇਕ ਪਾਸੇ ਪੁਲਿਸ ਅਤੇ ਪ੍ਰਸ਼ਾਸਨ ਮੀਟਿੰਗਾਂ ਕਰ ਰਹੇ ਹਨ ਅਤੇ ਐਫ.ਆਈ.ਆਰ. ਦਰਜ ਕਰਨ ਦੀ ਤਿਆਰੀ ਹੈ।ੇ
ਯੈੱਸ ਪੰਜਾਬ ਦੀਆਂ ਅਹਿਮ ਖ਼ਬਰਾਂ ਦੇ ਅਪਡੇਟਸ ਲਈ ਇੱਥੇ ਕਲਿੱਕ ਕਰਕੇ ਸਾਡੇ ਟੈਲੀਗਰਾਮ ਚੈਨਲ ਨਾਲ ਜੁੜੋ