ਯੈੱਸ ਪੰਜਾਬ
ਚੰਡੀਗੜ੍ਹ, 22 ਮਈ, 2020:
ਬਿੱਗ ਬਾਸ 13 ਵਿਚ ਭਾਗ ਲੈ ਕੇ ਕੌਮੀ ਪੱਧਰ ’ਤੇ ਚਰਚਾ ਵਿਚ ਆਈ ਪੰਜਾਬੀ ਗਾਇਕ ਅਤੇ ਮਾਡਲ ਸ਼ਹਿਨਾਜ਼ ਗਿੱਲ ਦੇ ਪਿਤਾ ਸੰਤੋਖ਼ ਸਿੰਘ ਸੁੱਖ ਨੇ ਆਪਣੇ ਉੱਤੇ ਲੱਗੇ ਬਲਾਤਕਾਰ ਦੇ ਦੋਸ਼ਾਂ ਨੂੰ ਰੱਦ ਕਰਦਿਆਂ ਕਿਹਾ ਹੈ ਕਿ ਉਨ੍ਹਾਂ ਕੋਲ ਇਸ ਸ਼ਿਕਾਇਤ ਦੇ ਖਿਲਾਫ਼ ਸਾਰੇ ਸੀ.ਸੀ.ਟੀ.ਵੀ. ਫੁੱਟੇਜ ਸਬੂਤ ਮੌਜੂਦ ਹਨ।
ਸੰਤੋਖ਼ ਸਿੰਘ ਸੁੱਖ ਦਾ ਦਾਅਵਾ ਹੈ ਕਿ ਜਿਸ ਦਿਨ ਦਾ ਹਵਾਲਾ ਦੇ ਕੇ ਉਸ ਖਿਲਾਫ਼ ਸ਼ਿਕਾਇਤ ਦਰਜ ਕਰਵਾਈ ਗਈ ਹੈ, ਉਸ ਦਿਨ ਉਹ ਆਪਣੇ ਘਰ ਹੀ ਸੀ ਅਤੇ ਉਸ ਕੋਲ ਇਸ ਸੰਬੰਧੀ ਸੀ.ਸੀ.ਟੀ.ਵੀ.ਫੁੱਟੇਜ ਮੌਜੂਦ ਹੈ ਜਿਸ ਤੋਂ ਉਹ ਸਾਬਿਤ ਕਰ ਸਕਦਾ ਹੈ ਕਿ ਉਹ ਉਕਤ ਦਿਨ ਘਰੋਂ ਬਾਹਰ ਹੀ ਨਹੀਂ ਗਿਆ।
ਸੰਤੋਖ਼ ਸਿੰਘ ਸੁੱਖ ਨੇ ਇਸ ਗੱਲ ਦਾ ਵੀ ਖੰਡਨ ਕੀਤਾ ਹੈ ਕਿ ਉਹ ਉਸ ਖਿਲਾਫ਼ ਐਫ਼.ਆਈ.ਆਰ. ਦਰਜ ਹੋਣ ਮਗਰੋਂ ਫ਼ਰਾਰ ਹੈ। ਸੁੱਖ ਦਾ ਕਹਿਣਾ ਹੈ ਕਿ ਉਸ ਕੋਲ ਆਪਣੀ ਬੇਗੁਨਾਹੀ ਸਾਬਿਤ ਕਰਨ ਲਈ ਸੀ.ਸੀ.ਟੀ.ਵੀ.ਫੁੱਟੇਜ ਮੌਜੂਦ ਹੈ।
ਇਸ ਦੇ ਨਾਲ ਸੁੱਖ ਨੇ ਇਹ ਵੀ ਦਾਅਵਾ ਕੀਤਾ ਹੈ ਕਿ ਜਿਸ ਰੋਹੀ ਪੁਲ ਕੋਲ ਸ਼ਿਕਾਇਤਕਰਤਾ ਨੇ ਉਸਦਾ ਕਾਰ ਵਿਚ ਬਲਾਤਕਾਰ ਕੀਤੇ ਜਾਣ ਸੰਬੰਧੀ ਦੋਸ਼ ਲਗਾਇਆ ਹੈ, ਉਹ ਵੀ ਸੀ.ਸੀ.ਟੀ.ਵੀ. ਕੈਮਰਿਆਂ ਦੀ ਨਜ਼ਰ ਹੇਠ ਆਉਂਦਾ ਹੈ ਅਤੇ ਫੁੱਟੇਜ ਚੈੱਕ ਕੀਤਿਆਂ ਦੁੱਧ ਦਾ ਦੁੱਧ ਅਤੇ ਪਾਣੀ ਦਾ ਪਾਣੀ ਹੋ ਜਾਵੇਗਾ।
ਜ਼ਿਕਰਯੋਗ ਹੈ ਪੰਜਾਬ ਪੁਲਿਸ ਨੇ ਬਿਆਸ ਦੇ ਰਹਿਣ ਵਾਲੇ ਸੰਤੋਖ਼ ਸਿੰਘ ਸੁੱਖ ਦੇ ਖਿਲਾਫ਼ ਜਲੰਧਰ ਦੀ ਰਹਿਣ ਵਾਲੀ ਇਕ 40 ਸਾਲਾ ਔਰਤ ਨੇ ਦੋਸ਼ ਲਗਾਇਆ ਸੀ ਕਿ ਉਹ ਆਪਣੇ ਦੋਸਤ ਲੱਕੀ ਸੰਧੂ ਨੂੰ ਸੰਤੋਖ਼ ਸਿੰਘ ਸੁੱਖ ਰਾਹੀਂ ਮਿਲਣ ਪਹੁੰਚੀ ਤਾਂ ਸੁੱਖ ਉਸਨੂੰ ਉਸਦੇ ਦੋਸਤ ਨਾਲ ਮਿਲਾਉਣ ਦੇ ਬਹਾਨੇ ਆਪਣੀ ਕਾਰ ਵਿਚ ਲੈ ਗਿਆ ਅਤੇ ਰੋਹੀ ਪੁਲ ਕੋਲ ਉਸਨੇ ਕਾਰ ਵਿਚ ਹੀ ਉਸ ਨਾਲ ਪਿਸਤੌਲ ਦੀ ਨੋਕ ’ਤੇ ਬਲਾਤਕਾਰ ਕੀਤਾ। ਉਸਨੇ ਦੋਸ਼ ਲਗਾਇਆ ਸੀ ਕਿ ਇਸ ਮਗਰੋਂ ਸੁੱਖ ਨੇ ਉਸ ਨੂੰ ਧਮਕੀ ਵੀ ਦਿੱਤੀ ਕਿ ਜੇ ਉਸਨੇ ਇਸ ਬਾਰੇ ਕੋਈ ਸ਼ਿਕਾਇਤ ਕੀਤੀ ਤਾਂ ਉਸਨੂੰ ਜਾਨੋਂ ਮਾਰ ਦੇਵੇਗਾ।
14 ਮਈ ਦੀ ਇਸ ਘਟਨਾ ਦੀ ਉਸਨੇ ਮੰਗਲਵਾਰ ਨੂੰ ਸ਼ਿਕਾਇਤ ਕੀਤੀ ਜਿਸ ’ਤੇ ਪੁਲਿਸ ਨੇ ਪੰਜਾਬ ਰਾਜ ਮਹਿਲਾ ਕਮਿਸ਼ਨ ਦੇ ਦਖ਼ਲ ਤੋਂ ਬਾਅਦ 19 ਮਈ ਨੂੰ ਬਿਆਸ ਪੁਲਿਸ ਥਾਣੇ ਵਿਚ ਕੇਸ ਦਰਜ ਕੀਤਾ ਗਿਆ ਸੀ।