ਯੈੱਸ ਪੰਜਾਬ
ਚੰਡੀਗੜ੍ਹ, 22 ਸਤੰਬਰ, 2021:
ਜੇ ਕਾਂਗਰਸ ਹਾਈਕਮਾਨ ਨੇ ਇਹ ਸਮਝ ਲਿਆ ਹੋਵੇ ਕਿ ‘ਮਹਾਰਾਜੇ’ ਦਾ ਤਖਤਾ ਪਲਟ ਕਰਕੇ ਇਕ ‘ਆਮ ਆਦਮੀ’ ਨੂੰ ਮੁੱਖ ਮੰਤਰੀ ਬਣਾਉਣ ਨਾਲ ਕਾਂਗਰਸ ਦਾ ਅੰਦਰੂਨੀ ਕਲੇਸ਼ ਖ਼ਤਮ ਹੋ ਗਿਆ ਹੈ ਤਾਂ ਇਹ ਸ਼ਾਇਦ ਇਕ ਵੱਡੀ ਭੁੱਲ ਹੋਵੇਗੀ।
ਮਿਸ਼ਨ ਤਖ਼ਤਾ ਪਲਟ ਪੂਰਾ ਹੋ ਗਿਐ, ਇਸ ਵਿੱਚ ਕੋਈ ਸ਼ੱਕ ਨਹੀਂ ਪਰ ਰਾਜ ਕਾਂਗਰਸ ਅੰਦਰ ਸਭ ਕੁਝ ਸੁਲਝਾ ਲਿਆ ਗਿਆ ਹੈ ਅਤੇ 2022 ਚੋਣਾਂ ਲਈ ਪਾਰਟੀ ਇਕਜੁੱਟ ਹੈ ਅਤੇ ਇਕਮੁੱਠ ਹੋ ਕੇ ਪਿੜ ਵਿੱਚ ਨਿੱਤਰੇਗੀ, ਇਸ ਵਿੱਚ ਕਾਫ਼ੀ ਸ਼ੱਕ ਹੈ।
ਹਾਂ, ਰੋਲ ਜ਼ਰੂਰ ਬਦਲ ਗਏ ਹਨ। ਅਜੇ ਸ਼ੁੱਕਰਵਾਰ ਤਾਈਂ ਇਕ ਧੜਾ ਸਰਕਾਰ ਦੇ ਵਿੱਚ ਹੋ ਕੇ ਵੀ ਸਰਕਾਰੋਂ ਬਾਹਰ ਬਹਿ ਕੇ ਆਪਣੀ ਹੀ ਸਰਕਾਰ ’ਤੇ ਨਿੱਤ ਦਿਹਾੜੇ ਸਵਾਲ ਖੜ੍ਹੇ ਕਰਕੇ ਆਪਣੀ ਹੀ ਸਰਕਾਰ ਨੂੰ ਠਿੱਬੀ ਲਾਉਣ ਵਿੱਚ ਹੀ ਆਪਣੀ ਜਿੱਤ ਸਮਝਦਾ ਸੀ ਪਰ ਅੱਜ ਸਾਹਮਣੇ ਆਏ ਇਕ ਟਵੀਟ ਨੇ ਇਹ ਸੰਕੇਤ ਦੇ ਦਿੱਤਾ ਹੈ ਕਿ ਹੁਣ ਵਾਰ ਦੂਜੇ ਬੰਨਿਉਂ ਹੋਣਗੇ। ਆਪਣੀ ਹੀ ਸਰਕਾਰ ਹੁਣ ਦੂਜਾ ਧੜਾ ਕਟਹਿਰੇ ਵਿੱਚ ਖੜ੍ਹੀ ਕਰੇਗਾ।
ਜਿੱਥੇ ਅੱਜ ਦੁਪਹਿਰ ਹੋਣ ਤੋਂ ਪਹਿਲਾਂ ਹੀ ਮੁੱਖ ਮੰਤਰੀ ਸ: ਚਰਨਜੀਤ ਸਿੰਘ ਚੰਨੀ ਅਤੇ ਪ੍ਰਦੇਸ਼ ਕਾਂਗਰਸ ਪ੍ਰਧਾਨ ਸ: ਨਵਜੋਤ ਸਿੰਘ ਸਿੱਧੂ ਦੇ ਸੱਤਾ ’ਤੇ ਕਾਬਜ਼ ਧੜੇ ਨੇ ਆਪਣੀ ਪਲੇਠੀ ਅੰਮ੍ਰਿਤਸਰ ਫ਼ੇਰੀ ਦੌਰਾਨ ਹੀ ਕੈਪਟਨ ਪੱਖੀ ਆਗੂ ਅਤੇ ਉਨ੍ਹਾਂ ਦੇ ਹੀ ਮੁੱਖ ਮੰਤਰੀ ਹੁੰਦਿਆਂ ਥਾਪੇ ਨਗਰ ਸੁਧਾਰ ਟਰਸਟ ਅੰਮ੍ਰਿਤਸਰ ਦੇ ਚੇਅਰਮੈਨ ਸ੍ਰੀ ਦਿਨੇਸ਼ ਬਾਸੀ ਦਾ ‘ਵਢਾਂਗਾ’ ਕਰ ਦਿੱਤਾ ਅਤੇ ਉਨ੍ਹਾਂ ਦੀ ਜਗ੍ਹਾ ਸ:ਸਿੱਧੂ ਦੇ ਕਰੀਬੀ ਮੰਨੇ ਜਾਂਦੇ ਕੌਂਸਲਰ ਦਮਨਦੀਪ ਸਿੰਘ ਨੂੰ ਨਗਰ ਸੁਧਾਰ ਟਰੱਸਟ ਦਾ ਨਵਾਂ ਚੇਅਰਮੈਨ ਨਿਯੁਕਤ ਕਰ ਦਿੱਤਾ, ਉੱਥੇ ਨਿਉਂਦਾ ਪਾਉਣ ਦਾ ਸਿਲਸਿਲਾ ਦੂਜੇ ਧੜੇ ਨੇ ਆਰੰਭਦਿਆਂ ਭਾਜੀ ਮੋੜੀ ਹੈ।
ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੇ ਮੀਡੀਆ ਸਲਾਹਕਾਰ ਰਹੇ ਸ੍ਰੀ ਰਵੀਨ ਠੁਕਰਾਲ ਦੇ ਟਵੀਟ ਨੇ ਇਹ ਸਪਸ਼ਟ ਕਰ ਦਿੱਤਾ ਹੈ ਕਿ ਜੇ ਕਾਂਗਰਸੀ ਜਾਂ ਫ਼ਿਰ ਕਾਂਗਰਸ ਪੱਖੀ ਹੋ ਕੇ ਵੀ ਆਪਣੀ ਹੀ ਸਰਕਾਰ ਦੇ ਵਿਰੁੱਧ ਟਵਿੱਟਰ ਅਤੇ ਫ਼ੇਸਬੁੱਕ ’ਤੇ ਟਿੱਪਣੀਆਂ ਦੀ ਪ੍ਰਚਲਨ ਨੂੰ ਹਾਈ ਕਮਾਨ ਪ੍ਰਵਾਨ ਹੀ ਕਰਦੀ ਹੈ ਤਾਂ ਫ਼ਿਰ ਅਸੀਂ ਵੀ ਟਵਿੱਟਰ ਟਵਿੱਟਰ ਖ਼ੇਡਾਂਗੇ।
ਸ: ਚੰਨੀ ਦੀ ਸ: ਸਿੱਧੂ ਸਮਰਥਿਤ ਸਰਕਾਰ ਦੇ ਹੋਂਦ ਵਿੱਚ ਆਉਣ ਤੋਂ ਬਾਅਦ ਸ੍ਰੀ ਰਵੀਨ ਠੁਕਰਾਲ ਦਾ ਪਹਿਲਾ ਟਵੀਟ ਸ: ਸਿੱਧੂ ਦੀ ਟਵਿੱਟਰ ’ਤੇ ਪਾਈ ਉਸੇ ਫ਼ੋਟੋ ਨੂੰ ‘ਟੈਗ’ ਕਰਕੇ ਆਇਆ ਹੈ ਜੋ ਸ: ਸਿੱਧੂ ਨੇ ਆਪ ਹੀ ਮੰਗਲਵਾਰ ਨੂੰ ਦਿੱਲੀ ਲਈ ਰਵਾਨਾ ਹੋਣ ਤੋਂ ਪਹਿਲਾਂ ਟਵਿੱਟਰ ’ਤੇ ਪਾਈ ਸੀ। ਇਸ ਤਸਵੀਰ ਵਿੱਚ ਦਿੱਲੀ ਰਵਾਨਾ ਹੋਣ ਤੋਂ ਪਹਿਲਾਂ ਮੁੱਖ ਮੰਤਰੀ ਸ: ਚਰਨਜੀਤ ਸਿੰਘ ਚੰਨੀ, ਉਪ ਮੁੱਖ ਮੰਤਰੀ ਸ: ਸੁਖ਼ਜਿੰਦਰ ਸਿੰਘ ਰੰਧਾਵਾ ਅਤੇ ਪ੍ਰਦੇਸ਼ ਕਾਂਗਰਸ ਪ੍ਰਧਾਨ ਸ: ਨਵਜੋਤ ਸਿੰਘ ਸਿੱਧੂ ਨਜ਼ਰ ਆ ਰਹੇ ਹਨ।
ਉਕਤ ਤਸਵੀਰ ਨੂੰ ਟੈਗ ਕਰਕੇ ਸ੍ਰੀ ਰਵੀਨ ਠੁਕਰਾਲ ਨੇ ਦੋ ਟਵੀਟ ਛੱਡੇ ਹਨ ਜਿਨ੍ਹਾਂ ਵਿੱਚ ਉਹਨਾਂ ਲਿਖ਼ਿਆ ਹੈ, ‘ਵਾਹ.. .. ਕਿਆ ਗਰੀਬਾਂ ਦੀ ਸਰਕਾਰ ਹੈ’। ਚਾਰ ਵਿਅਕਤੀਆਂ ਦੇ ਦਿੱਲੀ ਜਾਣ ਲਈ 16 ਸੀਟਰ ਲੀਅਰਜੈਟ ਵਰਤਿਆ ਗਿਆ ਜਦਕਿ 5 ਸੀਟਾਂ ਵਾਲਾ ਸਰਕਾਰੀ ਚਾਪਰ ਉਪਲਬਧ ਸੀ। ਮੈਨੂੰ ਹੁਣ ਇੰਜ ਜਾਪਣ ਲੱਗਾ ਹੈ ਕਿ ਮੈਨੂੰ ਸਾਢੇ ਚਾਰ ਸਾਲ ਇਹ ਭੁਲੇਖ਼ਾ ਹੀ ਰਿਹਾ ਕਿ ਪੰਜਾਬ ਕਿਸੇ ਵਿੱਤੀ ਤੰਗੀ ਵਿੱਚੋਂ ਲੰਘ ਰਿਹਾ ਹੈ। ਹੈਰਾਨ ਹਾਂ ਇਸ ‘ਲਗਜ਼ਰੀ’ ਲਈ ਕੌਣ ਅਦਾਇਗੀ ਕਰ ਰਿਹਾ ਹੈ। ਰਾਜ ਸਰਕਾਰ, ਜਾਂ ਪੰਜਾਬ ਪ੍ਰਦੇਸ਼ ਕਾਂਗਰਸ ਕਮੇਟੀ। ਇਹ ਗੱਲ ਤਾਂ ਪੱਕੀ ਹੈ ਕਿ ਇਸ ਜਹਾਜ਼ ਲਈ ਅਦਾਇਗੀ ਨਵਜੋਤ ਸਿੰਘ ਸਿੱਧੂ, ਚਰਨਜੀਤ ਸਿੰਘ ਚੰਨੀ, ਸੁਖਜਿੰਦਰ ਸਿੰਘ ਰੰਧਾਵਾ ਜਾਂ ਉ.ਪੀ.ਸੋਨੀ ਵਿੱਚੋਂ ਕਿਸੇ ਨੇ ਤਾਂ ਨਹੀਂ ਕੀਤੀ ਹੋਣੀ। ਮੇਰਾ ਅੰਦਾਜ਼ਾ ਹੈ ਕਿ ਅੰਤ ਨੂੰ ਇਨ੍ਹਾਂ ਦੀ ਖੁਸ਼ੀ ਦਾ ਭਾਰ ਆਮ ਆਦਮੀ ’ਤੇ ਹੀ ਪੈਣਾ ਹੈ।’
Wonder who’s paying for such luxury – the state govt or @INCPunjab? Can’t be @sherryontopp or @CHARANJITCHANNI or @Sukhjinder_INC or #OPSoni for sure. Though eventually I guess it’s the common man who’ll end up footing the bill for their pleasures! 2/2
— Raveen Thukral (@RT_Media_Capt) September 21, 2021
ਯੈੱਸ ਪੰਜਾਬ ਦੀਆਂ ਅਹਿਮ ਖ਼ਬਰਾਂ ਦੇ ਅਪਡੇਟਸ ਲਈ ਇੱਥੇ ਕਲਿੱਕ ਕਰਕੇ ਸਾਡੇ ਟੈਲੀਗਰਾਮ ਚੈਨਲ ਨਾਲ ਜੁੜੋ
