ਯੈੱਸ ਪੰਜਾਬ
ਨਵੀਂ ਦਿੱਲੀ, 26 ਜਨਵਰੀ, 2021:
ਪਿਛਲੇ 2 ਮਹੀਨਿਆਂ ਤੋਂ ਦਿੱਲੀ ਦੇ ਬਾਰਡਰਾਂ ’ਤੇ ਕਿਸਾਨੀ ਮੰਗਾਂ ਦੇ ਹੱਕ ਵਿੱਚ ਦਿੱਲੀ ਦੇ ਬਾਰਡਰਾਂ ’ਤੇ ਧਰਨਾ ਲਾਈ ਬੈਠੇ ਕਿਸਾਨਾਂ ਵੱਲੋਂ ਅੱਜ ਪੁਲਿਸ ਨਾਲ ਸਹਿਮਤ ਹੋਏ ਰੂਟਾਂ ਵਿੱਚ ਆਪਣੇ ਪੱਧਰ ’ਤੇ ਬਦਲਾਅ ਕਰਦਿਆਂ ਦਿੱਲੀ ਵਿੱਚ ਪ੍ਰਵੇਸ਼ ਕੀਤਾ ਗਿਆ। ਕਿਸਾਨ ਰਾਹ ਵਿੱਚ ਪੁਲਿਸ ਵੱਲੋਂ ਲਗਾਏ ਸਾਰੇ ਬੈਰੀਕੇਡ ਅਤੇ ਹੋਰ ਰੋਕਾਂ ਹਟਾਉਂਦੇ ਹੋਏ, ਲਾਠੀਚਾਰਜ ਅਤੇ ਹੰਝੂ ਗੈਸ ਦਾ ਮੁਕਾਬਲਾ ਕਰਦੇ ਹੋਏ ਲ ਾਲ ਕਿਲੇ ਤਕ ਜਾ ਪੁੱਜੇ।
ਕਿਸਾਨਾਂ ਨੇ ਟਰੈਕਟਰ ਲਿਜਾ ਕੇ ਲਾਲ ਕਿਲੇ ਦੇ ਬਾਹਰ ਖੜ੍ਹੇ ਕਰ ਦਿੱਤੇ ਅਤੇ ਕੁਝ ਸਮਾਂ ਇੰਤਜ਼ਾਰ ਕਰਨ ਤੋਂ ਬਾਅਦ ਲਾਲ ਕਿਲੇ ਦੇ ਅੰਦਰ ਉਸ ਪ੍ਰਾਚੀਰ ’ਤੇ ਜਾ ਪੁੱਜੇ ਜਿੱਥੋਂ ਹਰ ਸਾਲ 15 ਅਗਸਤ ਨੂੰ ਪ੍ਰਧਾਨ ਮੰਤਰੀ ਵੱਲੋਂ ਰਾਸ਼ਟਰੀ ਝੰਡਾ ਫ਼ਹਿਰਾਇਆ ਜਾਂਦਾ ਹੈ।
ਇਸੇ ਦੌਰਾਨ ਕੁਝ ਨੌਜਵਾਨਾਂ ਨੇ ਪੋਲ ’ਤੇ ਚੜ੍ਹਦਿਆਂ ਪਹਿਲਾਂ ਖ਼ਾਲਸਾਈ ਝੰਡਾ ਲਹਿਰਾਇਆ। ਇਸ ਮਗਰੋਂ ਕਿਰਸਾਨੀ ਝੰਡਾ ਵੀ ਪੋਲ ’ਤੇ ਲਹਿਰਾ ਦਿੱਤਾ ਗਿਆ।
ਇਸ ਮਗਰੋਂ ਪੁਲਿਸ ਵੱਲੋਂ ਆਪਣਾ ਇਕ ਮੁਲਾਜ਼ਮ ਪੋਲ ’ਤੇ ਚੜ੍ਹਾ ਕੇ ਦੋਵੇਂ ਝੰਡੇ ਉਤਾਰਣ ਦੀ ਕੋਸ਼ਿਸ਼ ਕੀਤੀ ਗਈ ਪਰ ਆਖ਼ਰੀ ਖ਼ਬਰਾਂ ਮਿਲਣ ਤਕ ਉਹ ਉੱਪਰ ਚੜ੍ਹਣ ਵਿੱਚ ਕਾਮਯਾਬ ਨਹੀਂ ਹੋਇਆ।
ਇਸ ਮਗਰੋਂ ਵੱਡੀ ਗਿਣਤੀ ਵਿੱਚ ਪੁਲਿਸ ਪੋਲ ਵਾਲੇ ਰੈਂਪ ’ਤੇ ਪਹੁੰਚੀ ਅਤੇ ਸੰਘਰਸ਼ਸ਼ੀਲ ਕਿਸਾਨਾਂ ਨੂੰ ਹਟਾਇਆ ਗਿਆ ਪਰ ਖ਼ਬਰ ਲਿਖ਼ੇ ਜਾਣ ਤਕ ਦੋਵੇਂ ਝੰਡੇ ਪੋਲ ’ਤੇ ਝੂਲ ਰਹੇ ਸਨ।
ਇਸੇ ਦੌਰਾਨ ਇਹ ਵੀ ਹੋਇਆ ਹੈ ਕਿ ਲਾਲ ਕਿਲੇ ਦੇ ਕੁਝ ਗੁੰਬਦਾਂ ’ਤੇ ਵੀ ਖ਼ਾਲਸਾਈ ਨਿਸ਼ਾਨ ਫ਼ਹਿਰਾ ਦਿੱਤੇ ਗਏ ਹਨ।