ਯੈੱਸ ਪੰਜਾਬ
ਜਲੰਧਰ/ਕਪੂਰਥਲਾ, 26 ਮਈ, 2022:
ਮੰਚ ਉਪਰ ਸੱਭਿਆਚਾਰਕ ਸਮਾਗਮਾਂ ਵਿਚ ਵੱਖੋ-ਵੱਖ ਕਲਾਵਾਂ ਦਾ ਬਿਹਤਰ ਪ੍ਰਦਰਸ਼ਨ ਕਰਨ ਵਾਲੇ ਵਿਦਿਆਰਥੀਆਂ ਨੂੰ ਆਈ.ਕੇ.ਗੁਜਰਾਲ ਪੰਜਾਬ ਟੈਕਨੀਕਲ ਯੂਨੀਵਰਸਿਟੀ (ਆਈ.ਕੇ.ਜੀ ਪੀ.ਟੀ.ਯੂ) ਵਿਸ਼ੇਸ਼ ਲਾਭ ਦੇਵੇਗੀ। ਇਹ ਲਾਭ ਉਹਨਾਂ ਦੀ ਅਕਾਦਮਿਕ ਤਰੱਕੀ ਨਾਲ ਜੁੜੇ ਹੋਵਣਗੇ। ਸ਼ੁਰੂਆਤੀ ਦੌਰ ਵਿਚ ਯੂਨੀਵਰਸਿਟੀ ਇਹ ਲਾਭ ਆਪਣੇ ਮੁਖ ਕੈਂਪਸ ਤੇ ਬਾਕੀ ਕੈਂਪਸ ਦੇ ਵਿਦਿਆਰਥੀਆਂ ਨੂੰ ਦੇਵੇਗੀ।
ਇਸ ਤੋਂ ਇਲਾਵਾ ਯੂਨੀਵਰਸਿਟੀ ਵੱਖੋ-ਵੱਖ ਕਿਉਜ ਪ੍ਰੋਗਰਾਮ ਵਿਚ ਮਾਸਟਰ ਕੁਇਜ ਟੀਮ ਨੂੰ ਪੜ੍ਹਾਈ ਲਈ ਵਿਸ਼ੇਸ਼ ਐਪ ਖਰੀਦਣ ਜਾਂ ਕਿਤਾਬਾਂ ਖਰੀਦਣ ਵਾਸਤੇ ਮਾਲੀ ਮੱਦਦ ਵੀ ਕਰੇਗੀ। ਬਿਹਤਰ ਪੇਟਿੰਗ ਕਰਨ ਵਾਲੇ ਵਿਦਿਆਰਥੀਆਂ ਦੀਆਂ ਯੂਨੀਵਰਸਿਟੀ ਵਿਖੇ ਵਿਸ਼ੇਸ਼ ਆਰਟ ਗੈਲਰੀ ਸਥਾਪਿਤ ਹੋਣਗੀਆਂ।
ਵਿਦਿਆਰਥੀ ਹਿੱਤ ਲਈ ਇਹ ਉਪਰਾਲੇ ਯੂਨੀਵਰਸਿਟੀ ਦੇ ਉਪ-ਕੁਲਪਤੀ ਰਾਹੁਲ ਭੰਡਾਰੀ, ਆਈ.ਏ.ਐਸ, ਜੋ ਕਿ ਪ੍ਰਮੁੱਖ ਸਕੱਤਰ ਤਕਨੀਕੀ ਸਿਖਿਆ ਪੰਜਾਬ ਵੀ ਹਨ, ਵੱਲੋਂ ਆਈ.ਕੇ.ਜੀ ਪੀ.ਟੀ.ਯੂ ਵਿਚ ਸ਼ੁਰੂ ਕਰਵਾਏ ਗਏ ਹਨ। ਸ਼੍ਰੀ ਰਾਹੁਲ ਭੰਡਾਰੀ, ਆਈ.ਏ.ਐਸ ਵੀਰਵਾਰ ਨੂੰ ਯੂਨੀਵਰਸਿਟੀ ਦੇ ਵਿਸ਼ੇਸ਼ ਸੱਭਿਆਚਾਰਕ ਸਮਾਗਮ ਆਗਾਜ਼ ਵਿਚ ਮੁੱਖ ਮਹਿਮਾਨ ਵੱਜੋਂ ਸ਼ਿਰਕਤ ਕਰ ਰਹੇ ਸਨ।
ਉਹਨਾਂ ਮੰਚ ਤੋਂ ਵਿਦਿਆਰਥੀਆਂ ਦਾ ਮਨੋਬਲ ਵਧਾਉਂਦੇ ਹੋਏ ਕਿਹਾ ਕਿ ਆਪਣੇ ਦੇਸ਼ ਦੇ ਵੱਖੋ-ਵੱਖ ਰਾਜਾਂ ਦੇ ਸੱਭਿਆਚਾਰ, ਖਾਣੇ ਨੂੰ ਨੇੜੇ ਤੋਂ ਦੇਖਣਾ-ਜਾਣਨਾ ਜਿਥੇ ਸੱਭਿਆਚਾਰਕ ਸਾਂਝ ਲਈਂ ਜਰੂਰੀ ਹੈ, ਓਥੇ ਹੀ ਵਿਦਿਆਰਥੀਆਂ ਨੂੰ ਪੜ੍ਹਾਈ ਦੇ ਨਾਲ-ਨਾਲ ਤਾਜਗੀ ਵੀ ਦਿੰਦਾ ਹੈ। ਉਹਨਾਂ ਯੂਨੀਵਰਸਿਟੀ ਡੀਨ ਅਕਾਦਮਿਕ ਦਫਤਰ ਅਤੇ ਫੈਕਲਟੀ ਨੂੰ ਵਿਦਿਆਰਥੀ ਹਿੱਤ ਵਿਚ ਜੋਨ ਵਿਚ ਵੰਡ ਕਰਦੇ ਹੋਏ ਹਰ ਮਹੀਨੇ ਇੱਕ ਵੱਡਾ ਸੱਭਿਆਚਾਰਕ ਪ੍ਰੋਗਰਾਮ ਕਰਵਾਉਣ ਲਈ ਆਖਿਆ। ਪ੍ਰੋਗਰਾਮ ਦਾ ਆਯੋਜਨ ਯੂਨੀਵਰਸਿਟੀ ਦੇ ਡਿਪਾਰਟਮੈਂਟ ਯੂਥ ਅਫੈਰਸ ਅਤੇ ਸਟੂਡੈਂਟ ਕਾਉਂਸਿਲ ਵੱਲੋਂ ਮਿਲਕੇ ਕੀਤਾ ਗਿਆ।
ਪ੍ਰੋਗਰਾਮ ਦੀ ਸ਼ੁਰੂਆਤ ਸ਼ਮਾ ਰੌਸ਼ਨ ਗਣਪਤੀ ਵੰਦਨਾ ਅਤੇ ਫਿਰ ਪਵਿੱਤਰ ਸ਼ਬਦ ਗਈਆਂ ਨਾਲ ਹੋਈ। ਸਮਾਰੋਹ ਵਿਚ ਕਲਚਰਲ ਪ੍ਰੋਗਰਾਮਾਂ ਨਾਲ ਜੁੜੀ ਨਾਮੀ ਸੰਸਥਾ ਇੰਟੱਚ (ਇੰਟੈਕ) ਦਾ ਵਿਸ਼ੇਸ਼ ਸਹਿਯੋਗ ਰਿਹਾ। ਸਵਾਗਤੀ ਸ਼ਬਦ ਡੀਨ ਅਕਾਦਮਿਕ ਪ੍ਰੋ (ਡਾ) ਵਿਕਾਸ ਚਾਵਲਾ ਵੱਲੋਂ ਰਖੇ ਗਏ, ਜਦੋਂਕਿ ਧੰਨਵਾਦ ਪ੍ਰਸਤਾਵ ਪ੍ਰੋ ਅਵਤਾਰ ਸਿੰਘ ਬੁੱਟਰ ਵੱਲੋਂ ਪੜਿਆ ਗਿਆ। ਮੰਚ ਉਪਰੋਂ ਯੂਨੀਵਰਸਿਟੀ ਦੇ ਮੋਹਾਲੀ ਕੈਂਪਸ ਦੀਆਂ ਵਿਦਿਆਰਥਣਾਂ ਵੱਲੋਂ ਭੰਗੜਾ ਪੇਸ਼ ਕੀਤਾ ਗਿਆ, ਜਦੋਂਕਿ ਮੁੱਖ ਕੈਂਪਸ ਦੀਆਂ ਵਿਦਿਆਰਥਣਾਂ ਵੱਲੋਂ ਗਿੱਧਾ ਪੇਸ਼ ਕੀਤਾ ਗਿਆ। ਗੁਜਰਾਤੀ ਨਾਚ ਗਰਬਾ, ਹਿਮਾਚਲੀ ਡਾਂਸ ਨਾਟੀ ਦੀ ਸਫਲ ਪੇਸ਼ਕਾਰੀ ਵੀ ਵਿਦਿਆਰਥੀਆਂ ਵੱਲੋਂ ਕੀਤੀ ਗਈ।
ਮੰਚ ਸੰਚਾਲਨ ਸਹਾਇਕ ਪ੍ਰੋਫੈਸਰ ਡਾ. ਸਰਬਜੀਤ ਸਿੰਘ ਮਾਨ, ਵਿਦਿਆਰਥਣ ਮਾਨਸੀ ਝਾ, ਅਤਮਜੀਵਨਜੋਤ ਕੌਰ, ਰੋਸੈਂਮੀਤ ਕੌਰ, ਵਿਦਿਆਰਥੀ ਹਾਰਦਿਕ ਬਜਾਜ ਵੱਲੋਂ ਮਿਲਕੇ ਕੀਤਾ ਗਿਆ। ਇਸ ਮੌਕੇ ਇੰਟੱਚ (ਇੰਟੈਕ) ਵੱਲੋਂ ਡਾ. ਸੁਖਦੇਵ ਸਿੰਘ ਅਤੇ ਕਪੂਰਥਲਾ ਦੇ ਕਨਵੀਨਰ ਐਡਵੋਕੇਟ ਕੰਵਲਜੀਤ ਸਿੰਘ ਵਾਲਿਆ ਵਿਸ਼ੇਸ ਤੌਰ ਤੇ ਮੌਜੂਦ ਰਹੇ।
ਉਹਨਾਂ ਮੰਚ ਤੋਂ ਵਿਦਿਆਰਥੀਆਂ ਦੀ ਹੌਂਸਲਾ ਅਫਜਾਈ ਵੀ ਕੀਤੀ। ਸਮਾਗਮ ਮੌਕੇ ਯੂਨੀਵਰਸਿਟੀ ਰਜਿਸਟਰਾਰ ਡਾ. ਐਸ.ਕੇ.ਮਿਸ਼ਰਾ, ਡੀਨ ਯਾਦਵਿੰਦਰ ਸਿੰਘ ਬਰਾੜ, ਪ੍ਰੋ (ਡਾ) ਨੀਲ ਕੰਠ ਗਰੋਵਰ, ਕੰਟਰੋਲਰ ਪ੍ਰੀਖਿਆਵਾਂ ਡਾ. ਪਰਮਜੀਤ ਸਿੰਘ ਅਤੇ ਹੋਰ ਫੈਕਲਟੀ ਮੇਂਬਰ ਤੇ ਅਧਿਕਾਰੀ ਵਿਸ਼ੇਸ਼ ਤੌਰ ਤੇ ਮੌਜੂਦ ਰਹੇ।
ਯੈੱਸ ਪੰਜਾਬ ਦੀਆਂ ਅਹਿਮ ਖ਼ਬਰਾਂ ਦੇ ਅਪਡੇਟਸ ਲਈ ਇੱਥੇ ਕਲਿੱਕ ਕਰਕੇ ਸਾਡੇ ਟੈਲੀਗਰਾਮ ਚੈਨਲ ਨਾਲ ਜੁੜੋ