ਯੈੱਸ ਪੰਜਾਬ
ਬਟਾਲਾ, 22 ਸਤੰਬਰ, 2021:
ਸਿਆਸਤ ਕੀ ਕੀ ਰੰਗ ਵਿਖਾਉਂਦੀ ਹੈ ਅਤੇ ਕੀ ਕੀ ਰੰਗ ਵਿਖ਼ਾ ਸਕਦੀ ਹੈ, ਇਹ ਸਮਝਣ ਦਾ ਪੰਜਾਬੀਆਂ ਲਈ ਇਹ ਬੜਾ ਅਹਿਮ ਮੌਕਾ ਹੈ।
ਬਟਾਲਾ ਵਿੱਚ ਦੋ ਭਲਵਾਨਾਂ ਦੇ ਭੇੜ ’ਚ ਉਨ੍ਹਾਂ ਦੇ ਨਜ਼ਦੀਕੀਆਂ ਦੀ ਜਿਵੇਂ ਚੁੱਕ ਥੱਲ ਹੋ ਰਹੀ ਹੈ, ਉਹ ਆਪਣੇ ਆਪ ਵਿੱਚ ਇਕ ਮਿਸਾਲ ਹੈ।
ਰਾਜ ਅੰਦਰ ਕੈਪਟਨ ਸਰਕਾਰ ਬਣੀ ਤਾਂ ‘ਮਾਝਾ ਬ੍ਰਿਗੇਡ’ ਦੇ ਅਹਿਮ ਮੈਂਬਰ ਅਤੇ ਕੈਬਨਿਟ ਮੰਤਰੀ ਸ: ਤ੍ਰਿਪਤ ਰਜਿੰਦਰ ਸਿੰਘ ਬਾਜਵਾ ਮੁੱਖ ਮੰਤਰੀ ਦੀ ਸੱਜੀ ਬਾਂਹ ਮੰਨੇ ਜਾਂਦੇ ਸਨ।
ਸੱਜੀ ਬਾਂਹ ਕੋਲ ਬੜੇ ਅਧਿਕਾਰ ਹੁੰਦੇ ਹਨ, ਸੋ ਤ੍ਰਿਪਤ ਰਜਿੰਦਰ ਸਿੰਘ ਬਾਜਵਾ ਨੇ ਆਪਣੇ ਨਜ਼ਦੀਕੀ ਸ੍ਰੀ ਕਸਤੂਰੀ ਲਾਲ ਸੇਠ ਨੂੰ ਨਗਰ ਸੁਧਾਰ ਟਰਸਟ ਬਟਾਲਾ ਦੇ ਚੇਅਰਮੈਨ ਲੁਆ ਦਿੱਤਾ।
ਸਮੇਂ ਨੇ ਕਰਵਟ ਲਈ ਅਤੇ ਸ: ਤ੍ਰਿਪਤ ਰਜਿੰਦਰ ਸਿੰਘ ਬਾਜਵਾ ਅਤੇ ਕੈਪਟਨ ਅਮਰਿੰਦਰ ਸਿੰਘ ਵਿਚਾਲੇ ਦੂਰੀਆਂ ਵਧਦੀਆਂ ਗਈਆਂ।
ਦੂਜੇ ਬੰਨੇ ਕਾਂਗਰਸ ਦੇ ਅੰਦਰ ਸਮੀਕਰਨ ਕੁਝ ਐਸੇ ਬਦਲੇ ਕਿ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨਾਲ ਸਾਲਾਂ ਤੋਂ ਵਿਗੜੇ ਸੰਬੰਧਾਂ ਨੂੰ ਲਾਂਭੇ ਰੱਖ ਰਾਜ ਸਭਾ ਮੈਂਬਰ ਸ: ਪ੍ਰਤਾਪ ਸਿੰਘ ਬਾਜਵਾ ਕੈਪਟਨ ਦੇ ਸਿਸਵਾਂ ਫ਼ਾਰਮ ਹਾਊਸ ਜਾ ਪੁੱਜੇ। ਸਾਲਾਂ ਦੀ ਵਿਗੜੀ ‘ਰਿਪੇਅਰ’ ਕਰਨ ਅਤੇ ਸ: ਤ੍ਰਿਪਤ ਰਜਿੰਦਰ ਸਿੰਘ ਬਾਜਵਾ ਨੂੰ ਮੁੱਖ ਮੰਤਰੀ ਦੀ ‘ਪਾਵਰ’ ਦਾ ਅਹਿਸਾਸ ਕਰਾਉਂਦਿਆਂ ਸ: ਤ੍ਰਿਪਤ ਰਜਿੰਦਰ ਸਿੰਘ ਬਾਜਵਾ ਦਾ ਨੇੜਲੇ ਸਾਥੀ ਸ੍ਰੀ ਕਸਤੂਰੀ ਲਾਲ ਸੇਠ ਨੂੰ ਅਚਾਨਕ ਹੀ ਨਗਰ ਸੁਧਾਰ ਟਰੱਸਟ ਦੇ ਚੇਅਰਮੈਨ ਵਜੋਂ ਹਟਾ ਦਿੱਤਾ ਗਿਆ ਅਤੇ ਉਨ੍ਹਾਂ ਦੀ ਥਾਵੇਂ ਸ:ਪ੍ਰਤਾਪ ਸਿੰਘ ਬਾਜਵਾ ਦੇ ਵਿਸ਼ਵਾਸ ਪਾਤਰ ਸ: ਪਰਮਜੀਤ ਸਿੰਘ ਪੰਮਾ ਨੂੰ ਚੇਅਰਮੈਨ ਨਿਯੁਕਤ ਕਰ ਦਿੱਤਾ ਗਿਆ।
ਸ:ਤ੍ਰਿਪਤ ਰਜਿੰਦਰ ਸਿੰਘ ਬਾਜਵਾ ਦੀ ਕੈਪਟਨ ਅਮਰਿੰਦਰ ਸਿੰਘ ਨਾਲ ਵਿਗੜਣ ਅਤੇ ਆਪਣੀ ਨਵੀਂ ਨਵੀਂ ਨੇੜਤਾ ਦੇ ਹਵਾਲੇ ਨਾਲ ਸ:ਪ੍ਰਤਾਪ ਸਿੰਘ ਬਾਜਵਾ ਨੇ ਨਾ ਕੇਵਲ ਆਪ ਜਾ ਕੇ ਸ: ਪਰਮਜੀਤ ਸਿੰਘ ਪੰਮਾ ਨੂੰ ਚੇਅਰਮੈਨ ਦੀ ਕੁਰਸੀ ’ਤੇ ਬਿਠਾਇਆ ਸਗੋਂ ਪੰਜਾਬ ਵਿਧਾਨ ਸਭਾ ਚੋਣ ਲੜਨ ਦਾ ਐਲਾਨ ਕਰ ਚੁੱਕੇ ਸ: ਪ੍ਰਤਾਪ ਸਿੰਘ ਬਾਜਵਾ ਨੇ ਬਟਾਲਾ ਵਿਖ਼ੇ ਰਾਜਸੀ ਸਰਗਰਮੀਆਂ ਵੀ ਸ਼ੁਰੂ ਕਰ ਦਿੱਤੀਆਂ।
ਸਮੇਂ ਨੇ ਇਕ ਵਾਰ ਫ਼ਿਰ ਕਰਵਟ ਲਈ ਅਤੇ ਬਾਗੀ ਧੜੇ ਨੇ ਹਾਈਕਮਾਨ ਦੀ ਮਦਦ ਨਾਲ ਕੈਪਟਨ ਅਮਰਿੰਦਰ ਸਿੰਘ ਦਾ ਤਖ਼ਤਾ ਪਲਟ ਦਿੱਤਾ ਜਿਸ ਮਗਰੋਂ ਮੁੜ ਤਾਕਤ ਵਿੱਚ ਆਏ ਸ:ਤ੍ਰਿਪਤ ਰਜਿੰਦਰ ਸਿੰਘ ਬਾਜਵਾ ਨੇ ਮਹਿਜ਼ 22 ਦਿਨਾਂ ਬਾਅਦ ਅੱਜ ਪਲਟਵਾਰ ਕਰਦਿਆਂ ਸ:ਪਰਮਜੀਤ ਸਿੰਘ ਪੰਮਾ ਨੂੰ ਚਲਦਿਆਂ ਕਰਕੇ ਉਨ੍ਹਾਂ ਦੀ ਥਾਂਵੇਂ ਸ੍ਰੀ ਕਸਤੂਰੀ ਲਾਲ ਸੇਠ ਨੂੰ ਮੁੜ ਨਗਰ ਸੁਧਾਰ ਟਰਸਟ ਦਾ ਪ੍ਰਧਾਨ ਬਣਵਾ ਕੇ ਆਪਣੀ ਤਾਕਤ ਦਾ ਮੁਜ਼ਾਹਰਾ ਕੀਤਾ ਹੈ।
ਯੈੱਸ ਪੰਜਾਬ ਦੀਆਂ ਅਹਿਮ ਖ਼ਬਰਾਂ ਦੇ ਅਪਡੇਟਸ ਲਈ ਇੱਥੇ ਕਲਿੱਕ ਕਰਕੇ ਸਾਡੇ ਟੈਲੀਗਰਾਮ ਚੈਨਲ ਨਾਲ ਜੁੜੋ