ਯੈੱਸ ਪੰਜਾਬ
ਗੁਰਦਾਸਪੁਰ, 30 ਜੁਲਾਈ, 2021:
ਜ਼ਿਲ੍ਹਾ ਗੁਰਦਾਸਪੁਰ ਦੇ ਕਸਬਾ ਫ਼ਤਹਿਗੜ੍ਹ ਚੂੜੀਆਂ ਵਿਖ਼ੇ ਸ਼ੁੱਕਰਵਾਰ ਚਿੱਟੇ ਦਿਨੀਂ ਵਾਪਰੀ ਇਕ ਵਾਰਦਾਤ ਦੌਰਾਨ ਹਮਲਾਵਰਾਂ ਨੇ ਇਕ ਸ਼ਰਾਬ ਠੇਕੇਦਰ ਦਾ ਗੋਲੀਆਂ ਮਾਰ ਕੇ ਕਤਲ ਕਰ ਦਿੱਤਾ।
ਸ਼ਰਾਬ ਦੇ ਠੇਕੇਦਾਰ ਦੱਸੇ ਜਾ ਰਹੇ ਸਤਨਾਮ ਸਿੰਘ ਪੁੱਤਰ ਜੋਗਿੰਦਰ ਸਿੰਘ ਵਾਸੀ ਫ਼ਤਹਿਗੜ੍ਹ ਚੂੜੀਆਂ ਅੰਦਰ ਭਰੇ ਬਜ਼ਾਰ ਦੋ ਮੋਟਰ ਸਾਈਕਲ ਸਵਾਰਾਂ ਨੇ ਗੋਲੀਆਂ ਚਲਾਈਆਂ। ਘਟਨਾ ਸੀ.ਸੀ.ਟੀ.ਵੀ.ਵਿੱਚ ਕੈਦ ਹੋ ਗਈ ਹੈ।
ਜਿਵੇਂ ਹੀ ਆਪਣੀ ਸੜਕ ਕੰਢੇ ਪਾਰ ਕੀਤੀ ਸਕਾਰਪੀਓ ਗੱਡੀ ਵੱਲ ਸ਼ਰਾਬ ਦਾ ਠੇਕੇਦਾਰ ਵਧਿਆ, ਉਵੇਂ ਹੀ ਸ਼ਾਇਦ ਘਾਤ ਲਗਾ ਕੇ ਇੰਤਜ਼ਾਰ ਕਰ ਰਹੇ ਹਮਲਾਵਰ ਸਾਹਮਣੇ ਪਾਸਿਉਂ ਆਪਣੇ ਮੋਟਰ ਸਾਈਕਲ ’ਤੇ ਆਏ ਅਤੇ ਆਪਣੀ ਗੱਡੀ ਵਿੱਚ ਸਵਾਰ ਹੋਣ ਸਮੇਂ ਹੀ ਸ਼ਰਾਬ ਠੇਕੇਦਾਰ ’ਤੇ ਗੋਲੀਆਂ ਚਲਾ ਦਿੱਤੀਆਂ। ਪਤਾ ਲੱਗਾ ਹੈ ਕਿ ਦੋ ਗੋਲੀਆਂ ਉਸ ਦੇ ਸਿਰ ਵਿੱਚੋਂ ਆਰ ਪਾਰ ਹੋ ਗਈਆਂ। ਉਸਨੂੰ ਹਸਪਤਾਲ ਲਿਜਾਇਆ ਗਿਆ ਪਰ ਤਦ ਤਕ ਉਹ ਦਮ ਤੋੜ ਚੁੱਕਾ ਸੀ।
ਦੋਵੇਂ ਅਣਪਛਾਤੇ ਹਮਲਾਵਰਾਂ ਨੇ ਮੋਟਰ ਸਾਈਕਲ ’ਤੇ ਬੈਠਿਆਂ ਹੀ ਗੋਲੀਆਂ ਚਲਾਈਆਂ ਅਤੇ ਸਟਾਰਟ ਮੋਟਰ ਸਾਈਕਲ ਨੂੰ ਲੈ ਕੇ ਅੱਗੇ ਵਧਦੇ ਹੋਏ ਫ਼ਰਾਰ ਹੋਣ ਵਿੱਚ ਕਾਮਯਾਬ ਹੋ ਗਏ।
ਮਾਮਲੇ ਨੂੰ ਕਿਸੇ ਪੁਰਾਣੀ ਰੰਜਿਸ਼ ਨਾਲ ਜੋੜ ਕੇ ਵੇਖ਼ਿਆ ਜਾ ਰਿਹਾ ਹੈ ਅਤੇ ਖ਼ਬਰ ਇਹ ਵੀ ਹੈ ਕਿ ਮਾਰੇ ਗਏ ਸ਼ਰਾਬ ਦੇ ਠੇਕੇਦਾਰ ਦੇ ਖਿਲਾਫ਼ ਵੀ ਕੁਝ ਮਾਮਲੇ ਦਰਜ ਹਨ।
ਪੁਲਿਸ ਨੇ ਮੌਕੇ ’ਤੇ ਪੁੱਜ ਕੇ ਜਾਂਚ ਸ਼ੁਰੂ ਕੀਤੀ ਅਤੇ ਇਸ ਸੰਬੰਧ ਵਿੱਚ ਕਤਲ ਦਾ ਮੁਕੱਦਮਾ ਅਣਪਛਾਤੇ ਹਮਲਾਵਰਾਂ ਖਿਲਾਫ਼ ਦਰਜ ਕਰ ਲਿਆ ਗਿਆ ਹੈ।
ਯੈੱਸ ਪੰਜਾਬ ਦੀਆਂ ਅਹਿਮ ਖ਼ਬਰਾਂ ਦੇ ਅਪਡੇਟਸ ਲਈ ਇੱਥੇ ਕਲਿੱਕ ਕਰਕੇ ਸਾਡੇ ਟੈਲੀਗਰਾਮ ਚੈਨਲ ਨਾਲ ਜੁੜੋ
