ਯੈੱਸ ਪੰਜਾਬ
ਤਰਨ ਤਾਰਨ, 18 ਜਨਵਰੀ, 2021:
ਪੰਜਾਬ ਵਿੱਚ ਅੱਜ ਵਾਪਰੀ ਇਕ ਵੱਡੀ ਘਟਨਾ ਵਿੱਚ ਪੁਲਿਸ ਅਤੇ ਬਦਮਾਸ਼ਾਂ ਵਿਚਾਲੇ ਮੁਠਭੇੜ ਹੋ ਗਈ ਜਿਸ ਵਿੱਚ ਇਕ ਬਦਮਾਸ਼ ਪੁਲਿਸ ਫ਼ਾਇਰਿੰਗ ਵਿੱਚ ਢੇਰ ਹੋ ਗਿਆ ਜਦ ਕਿ ਚਾਰ ਹੋਰ ਜ਼ਖ਼ਮੀ ਹੋ ਗਏ। ਇਸ ਮੁਠਭੇੜ ਵਿੱਚ ਦੋ ਪੁਲਿਸ ਮੁਲਾਜ਼ਮ ਵੀ ਜ਼ਖ਼ਮੀ ਹੋਏ ਦੱਸੇ ਗਏ ਹਨ।
ਜ਼ਿਕਰਯੋਗ ਹੈ ਕਿ ਇਸ ਤੋਂ ਪਹਿਲਾਂ 3 ਬਦਮਾਸ਼ਾਂ ਦੇ ਮਾਰੇ ਜਾਣ ਦੀ ਖ਼ਬਰ ਆ ਰਹੀ ਸੀ ਪਰ ਬਾਅਦ ਵਿੱਚ ਐਸ.ਐਸ.ਪੀ.ਸ੍ਰੀ ਧਰੁਮਨ ਐਚ. ਨਿੰਬਲੇ ਵੱਲੋਂ ਦਿੱਤੀ ਗਈ ਜਾਣਕਾਰੀ ਅਨੁਸਾਰ ਇਕ ਬਦਮਾਸ਼ ਦੀ ਮੌਤ ਹੋਈ ਹੈ ਅਤੇ 34 ਜ਼ਖ਼ਮੀ ਹੋਏ ਹਨ।
ਘਟਨਾ ਪੱਟੀ ਨੇੜੇ ਕੈਰੋਂ ਰੋਡ ’ਤੇ ਸਥਿਤ ਮਾਹੀ ਰਿਜ਼ੌਰਟ ਵਿੱਚ ਵਾਪਰੀ ਜਿੱਥੇ ਇਕ ਵਿਆਹ ਸਮਾਗਮ ਚੱਲ ਰਿਹਾ ਸੀ। ਮੈਰਿਜ ਪੈਲੇਸ ਵਿੱਚ ਅਜੇ ਕੁੜੀ ਵੱਲੋਂ ਹੀ ਮੇਲੀ ਆਏ ਸਨ ਅਤੇ ਬਰਾਤ ਅਜੇ ਢੁੱਕਣੀ ਸੀ।
ਜਾਣਕਾਰੀ ਅਨੁਸਾਰ ਬੀਤੀ ਰਾਤ ਤੋਂ ਹੀ ਇਹ 5 ਬਦਮਾਸ਼ਾਂ ਦਾ ਗਿਰੋਹ ਲੁੱਟ ਦੀਆਂ ਵਾਰਦਾਤਾਂ ਨੂੰ ਅੰਜਾਮ ਦੇ ਰਿਹਾ ਸੀ। ਉਨ੍ਹਾਂ ਵੱਲੋਂ ਕੁਝ ਪੈਟਰੋਲ ਪੰਪ ਅਤੇ ਇਕ ਮੈਡੀਕਲ ਸਟੋਰ ਲੁੱਟੇ ਜਾਣ ਦੀ ਵੀ ਖ਼ਬਰ ਹੈ ਜਦਕਿ ਕਥਿਤ ਤੌਰ ’ਤੇ ਇਸੇ ਗਿਰੋਹ ਵੱਲੋਂ ਜੰਡਿਆਲਾ ਬਾਈਪਾਸ ਦੇ ਕੋਲ ਇਕ ਵਿਅਕਤੀ ’ਤੇ ਫ਼ਾਇਰਿੰਗ ਕਰਕੇੇ ਉਸਦੀ ਸਵਿਫ਼ਟ ਗੱਡੀ ਖ਼ੋਹ ਲਈ ਗਈ। ਇਹ ਵਿਅਕਤੀ ਮੱਲਾ ਤੋਂ ਬਾਬਾ ਬੁੱਢਾ ਸਾਹਿਬ ਜਾ ਰਿਹਾ ਸੀ।
ਇਸ ਬਾਰੇ ਸੂਚਨਾ ਮਿਲਣ ’ਤੇ ਪੁਲਿਸ ਨੇ ਨਾਕਾਬੰਦੀ ਸ਼ੁਰੂ ਕੀਤੀ ਅਤੇ ਸ਼ੱਕ ਪੈਣ ’ਤੇ ਪੁਲਿਸ ਲੁਟੇਰਿਆਂ ਮਗਰ ਹੋ ਗਈ ਜਿਨ੍ਹਾਂ ਨੇ ਗੱਡੀ ਅੱਗੇ ਅੱਗੇ ਭਜਾ ਲਈ। ਇਸੇ ਦੌਰਾਨ ਇਨ੍ਹਾਂ ਨੇ ਆਪਣੀ ਬਰੈਜ਼ਾ ਗੱਡੀ ਉਕਤ ਮੈਰਿਜ ਪੈਲੇਸ ਵਿੱਚ ਵਾੜ ਲਈ ਜਿਸ ਮਗਰੋਂ ਪੁਲਿਸ ਵੀ ਮੈਰਿਜ ਪੈਲੇਸ ਅੰਦਰ ਆ ਗਈ।
ਪਤਾ ਲੱਗਾ ਹੈ ਕਿ ਮੈਰਿਜ ਪੈਲੇਸ ਦੇ ਅੰਦਰ ਲੁਕ ਕੇ ਬਦਮਾਸ਼ਾਂ ਨੇ ਪੁਲਿਸ ’ਤੇ ਗੋਲੀਬਾਰੀ ਸ਼ੁਰੂ ਕਰ ਦਿੱਤੀ ਜਿਸ ਮਗਰੋਂ ਪੁਲਿਸ ਨੇ ਵੀ ਜਵਾਬੀ ਫ਼ਾਇਰੰਗ ਕੀਤੀ। ਇਸ ਦੌਰਾਨ ਇਕ ਬਦਮਾਸ਼ ਢੇਰ ਹੋ ਗਿਆ ਜਦਕਿ 4 ਹੋਰ ਜ਼ਖ਼ਮੀ ਹੋ ਗਏ।
ਇਸ ਦੌਰਾਨ ਪੁਲਿਸ ਵੱਲੋਂ ਲੜਕੀ ਵਾਲੇ ਪੱਖ ਨੂੂੰ ਮੈਰਿਜ ਪੈਲੇਸ ਤੋਂ ਬਾਹਰ ਕਰ ਦਿੱਤਾ ਗਿਆ ਜਦਕਿ ਬਰਾਤ ਅਜੇ ਤਾਂਈਂ ਪਹੁੰਚੀ ਹੀ ਨਹੀਂ ਸੀ। ਕਾਰਵਾਈ ਦੌਰਾਨ ਪੁਲਿਸ ਨੇ ਪੈਲੇਸ ਦੇ ਅੰਦਰ ਕਿਸੇ ਦੇ ਵੀ ਦਾਖ਼ਲੇ ਦੀ ਮਨਾਹੀ ਕਰ ਦਿੱਤੀ ਸੀ।
