ਯੈੱਸ ਪੰਜਾਬ
ਚੰਡੀਗੜ੍ਹ, 9 ਜੂਨ, 2019:
ਪੰਜਾਬੀ ਗਾਇਕ, ਗੀਤਕਾਰ ਅਤੇ ਰੈਪਰ ਕਰਨ ਔਜਲਾ ’ਤੇ ਕੈਨੇਡਾ ਵਿਚ ਗੋਲੀਆਂ ਨਾਲ ਹਮਲਾ ਹੋਣ ਦੀ ਖ਼ਬਰ ਹੈ। ਪਤਾ ਲੱਗਾ ਹੈ ਕਿ ਸਰੀ ਵਿਚ 8 ਜੂਨ ਦੀ ਰਾਤ ਹੋਏ ਇਸ ਹਮਲੇ ਵੇਲੇ ਕਰਨ ਔਜਲਾ ਦੇ ਨਾਲ ਰੇਹਾਨ ਰਿਕਾਰਡਜ਼ ਦੇ ਮਾਲਕ ਅਤੇ ਕੈਨੇਡਾ ਵਾਸੀ ਐਨ.ਆਰ.ਆਈ. ਸੰਦੀਪ ਰੇਹਾਨ ਤੇ ਗਾਇਕ ਦੀਪ ਜੰਡੂ ਵੀ ਸਨ। ਇਸ ਹਮਲੇ ’ਚ ਕਰਨ ਔਜਲਾ ਦੇ ਜ਼ਖ਼ਮੀ ਹੋਣ ਦੀ ਖ਼ਬਰ ਹੈ। ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਇਕ ਦਿਨ ਵਿਚ ਹੀ ਇਨ੍ਹਾਂ ’ਤੇ ਦੋ ਵਾਰ ਗੋਲੀਆਂ ਚਲਾਈਆਂ ਗਈਆਂ।
ਹਾਲਾਂਕਿ ਅਜੇ ਤਾਂਈਂ ਹਮਲੇ ਦੀ ਪੁਸ਼ਟੀ ਉਕਤ ਤਿੰਨਾਂ ਵੱਲੋਂ ਜਾਂ ਉਨ੍ਹਾਂ ਦੇ ਕਿਸੇ ਵੀ ਪਰਿਵਾਰਕ ਮੈਂਬਰਾਂ ਜਾਂ ਵਪਾਰਕ ਪ੍ਰਤੀਨਿਧਾਂ ਵੱਲੋਂ ਨਹੀਂ ਕੀਤੀ ਗਈ ਪਰ ਇਸ ਹਮਲੇ ਦੀ ਜ਼ਿੰਮੇਵਾਰੀ ਪੰਜਾਬ ਦੇ ਸੁਖ਼ਪੀਤ ਬੁੱਢਾ ਗੈਂਗ ਨੇ ਲਈ ਹੈ। ਦਵਿੰਦਰ ਬੰਬੀਹਾ ਗਰੁੱਪ ਦੇ ਫ਼ੇਸ ਬੁੱਕ ਪੇਜ ’ਤੇ ਕੁਝ ਹੀ ਸਮਾਂ ਪਹਿਲਾਂ ਪਾਈ ਗਈ ਇਕ ਪੋਸਟ ਵਿਚ ਇਸ ਹਮਲੇ ਦੀ ਜ਼ਿੰਮੇਵਾਰੀ ਲੈਂਦਿਆਂ ਕਿਹਾ ਗਿਆ ਹੈ ਕਿ
ਵਾਹਿਗੁਰੂ ਜੀ ਕਾ ਖਾਲਸਾ ਵਹਿਗੁਰੂ ਜੀ ਕੀ ਫਤਹਿ hope ਕੇ ਤੁਸੀ ਸਾਰੇ ਠੀਕ ਹੋਵੋਗੇ ਮੈ ਥੋਨੂੰ ਦੱਸਣਾ ਚਾਓਂਦਾ ਹਾਂ ਕੀ ਜੋ sandeep rehaan and Karan aujla (Rehan records) ਦਾ ਆਪਨੇ ਵੀਰ ਸੁਖਪ੍ਰੀਤ ਬੁੱਢਾ ਨਾਲ ਜੋ ਰੋਲਾ ਚਲ ਰਿਹਾ ਸੀ ਇਹਨਾਂ ਨੇ ਪੰਜਾਬ ਵਿਚ ਤਾਂ ਲੋਕਾਂ ਤੇ ਪ੍ਰਭਾਵ ਪਾਉਣ ਦੀ ਖਾਤਰ Z+ security ਲੇ ਲਈ ਸੀ ਪਰ ਉਹ security ਇਹਨਾਂ ਨਾਲ ਕੈਨੇਡਾ ਤੱਕ ਨਹੀਂ ਗਈ ਫੇਰ ਆਪਣੇ ਵੀਰ ਸੁਖਪ੍ਰੀਤ ਬੁੱਢਾ ਨੇ ਇਹਨਾਂ ਨੂੰ ਸਬਕ ਸਿਖੋਣ ਦੀ ਖਾਤਰ ਕੈਨੇਡਾ ਵਿਚ ਹੀ ਇੱਕ ਦਿਨ ਵਿੱਚ 2 ਵਾਰ ਗੋਲੀਆਂ ਮਰਵਾ ਦਿੱਤੀਆ
ਜ਼ਿਕਰਯੋਗ ਹੈ ਕਿ ਕੈਨੇਡਾ ਤੋਂ ਪੰਜਾਬ ਆਏ ਸੰਦੀਪ ਰੇਹਾਨ ਨੂੰ ਇੰਟਰਨੈਟ ਕਾਲਿੰਗ ਕਰਕੇ 20 ਲੱਖ ਰੁਪਏ ਦੀ ਫ਼ਿਰੌਤੀ 16 ਮਾਰਚ ਨੂੰ ਮੰਗੀ ਗਈ ਸੀ ਪਰ ਰੇਹਾਨ ਵੱਲੋਂ ਇਸ ਦੀ ਸ਼ਿਕਾਇਤ ਪੁਲਿਸ ਨੂੰ ਕੀਤੇ ਜਾਣ ਮਗਰੋਂ ਉਸਨੂੰ ਇਕ ਵਾਇਸ ਮੈਸੇਜ ਘੱਲਿਆ ਗਿਆ ਸੀ ਜਿਸ ਵਿਚ ਗੈਂਗਸਟਰਾਂ ਵੱਲੋਂ ਸਪਸ਼ਟ ਤੌਰ ’ਤੇ ਕਿਹਾ ਗਿਆ ਸੀ ਕਿ ‘ਕਿੰਨੇ ਦਿਨ ਪੁਲਿਸ ਤੈਨੂੂੰ ਬਚਾਊਗੀ, ਅਸੀਂ ਇੰਡੀਆ ਜਾਂ ਕੈਨੇਡਾ ਕਿਤੇ ਨਹੀਂ ਰਹਿਣ ਦੇਵਾਂਗੇ’।
ਜ਼ਿਕਰਯੋਗ ਹੈ ਕਿ ਇਸ ਦੌਰਾਨ ਰੇਹਾਨ ਨੂੰ ਪੁਲਿਸ ਸੁਰੱਖਿਆ ਮੁਹੱਈਆ ਕਰਵਾਈ ਗਈ ਸੀ। ਇਸ ਤੋਂ ਇਲਾਵਾ ਇਹ ਧਮਕੀ ਵੀ ਦਿੱਤੀ ਗਈ ਸੀ ਕਿ ਫ਼ਿਰੌਤੀ ਨਾ ਦਿੱਤੀ ਗਈ ਤਾਂ ਅਤੇ ਪੁਲਿਸ ’ਤੇ ਟੇਕ ਰੱਖੀ ਤਾਂ ਦੂਣੇ ਪੈਸਿਆਂ ਦੀ ਮੰਗ ਕੀਤੀ ਜਾਵੇਗੀ।
ਜ਼ਿਕਰਯੋਗ ਹੈ ਕਿ ਸੁਖ਼ਪ੍ਰੀਤ ਬੁੱਢਾ ਕਥਿਤ ਤੌਰ ’ਤੇ ਗਾਇਕ ਪਰਮੀਸ਼ ਵਰਮਾ ’ਤੇ ਗੈਂਗਸਟਰ ਦਿਲਪ੍ਰੀਤ ਬਾਬਾ ਵੱਲੋਂ ਕੀਤੇ ਹਮਲੇ ਸਮੇਂ ਵੀ ਨਾਲ ਸੀ। ਇਸ ਹਮਲੇ ਵਿਚ ਲੱਕੀ ਅਤੇ ਆਕਾਸ਼ ਵੀ ਸ਼ਾਮਿਲ ਦੱਸੇ ਜਾਂਦੇ ਸਨ।
ਯਾਦ ਰਹੇ ਕਿ ਇਸ ਤੋਂ ਇਲਾਵਾ ਗਾਇਕ ਅਤੇ ਫ਼ਿਲਮ ਗਿੱਪੀ ਗਰੇਵਾਲ ਨੂੰ ਵੀ ਗੈਂਗਸਟਰਾਂ ਵੱਲੋਂ ਧਮਕੀਆਂ ਮਿਲਣਦਾ ਮਾਮਲਾ ਸਾਹਮਣੇ ਆਇਆ ਸੀ।