ਯੈੱਸ ਪੰਜਾਬ
ਜਲੰਧਰ, 15 ਮਈ, 2021:
ਜਲੰਧਰ ਛਾਉਣੀ ਦੇ ਨਾਲ ਲੱਗਦੇ ਥਾਣਾ ਰਾਮਾ ਮੰਡੀ ਅਧੀਨ ਆਉਂਦੇ ਉਪਕਾਰ ਨਗਰ ਵਿੱਚ ਆਪਣੇ ਪਤੀ ਨਾਲ ਪੇਕੇ ਘਰ ਆਈ ਇਕ 24 ਸਾਲਾ ਔਰਤ ਅਤੇ ਉਸਦੇ 26 ਸਾਲਾ ਪਤੀ ਵੱਲੋਂ ਕੋਈ ਜ਼ਹਿਰੀਲਾ ਪਦਾਰਥ ਖ਼ਾ ਕੇ ਆਤਮ ਹੱਤਿਆ ਕਰ ਦਿੱਤੀ ਗਈ ਹੈ।
ਮ੍ਰਿਤਕਾਂ ਦੀ ਪਛਾਣ ਸਾਗਰ ਵਾਸੀ ਸੂਰਾਨੱਸੀ ਅਤੇ ਰਾਧਾ ਵਜੋਂ ਹੋਈ ਹੈ। ਸਾਗਰ ਸੂਰਾਨੱਸੀ ਇਲਾਕੇ ਵਿੱਚ ਹੀ ਵੀ.ਆਈ.ਪੀ.ਸੈਲੂਨ ਚਲਾਉਂਦਾ ਸੀ।
ਮ੍ਰਿਤਕਾ ਰਾਧਾ ਦੇ ਭਰਾ ਨੇ ਦੱਸਿਆ ਕਿ ਉਸਦੀ ਭੈਣ ਅਤੇ ਜੀਜਾ ਰਾਤ ਘਰ ਆਏ ਸਨ ਪਰ ਸਵੇਰੇ 4.30 ਵਜੇ ਉਨ੍ਹਾਂ ਦੀ ਭੈਣ ਨੇ ਦੱਸਿਆ ਕਿ ਉਸਦੇ ਪੇਟ ਵਿੱਚ ਦਰਦ ਹੋ ਰਿਹਾ ਹੈ। ਦਰਦ ਵਧਣ ’ਤੇ ਉਸਨੂੰ ਹਸਪਤਾਲ ਲਿਜਾਇਆ ਗਿਆ ਜਿੱਥੇ ਡਾਕਟਰਾਂ ਨੇ ਉਸਨੂੰ ਮ੍ਰਿਤਕ ਐਲਾਨ ਦਿੱਤਾ।
ਇਸੇ ਦੌਰਾਨ ਸਾਗਰ ਦੀ ਵੀ ਤਬੀਅਤ ਵਿਗੜ ਗਈ ਅਤੇ ਉਸਨੂੰ ਹਸਪਤਾਲ ਲਿਜਾਣ ’ਤੇ ਡਾਕਟਰਾਂ ਨੇ ਉਸਨੂੰ ਵੀ ਮ੍ਰਿਤਕ ਕਰਾਰ ਦੇ ਦਿੱਤਾ।
ਰਾਧਾ ਦੇ ਭਰਾ ਨੇ ਦਾਅਵਾ ਕੀਤਾ ਕਿ ਉਸ ਦੀ ਭੈਣ ਅਤੇ ਜੀਜਾ ਦੇ ਸੰਬੰਧ ਤਾਂ ਠੀਕ ਸਨ ਪਰ ਰਾਧਾ ਦੇ ਸੱਸ ਅਤੇ ਸਹੁਰਾ ਨਾਲ ਦੋਹਾਂ ਦੀ ਨਹੀਂ ਸੀ ਬਣਦੀ। ਦੋ ਸਾਲ ਉਹ ਅੱਡ ਵੀ ਰਹੇ ਸਨ ਪਰ ਬਾਅਦ ਵਿੱਚ ਫ਼ਿਰ ਸਾਂਝੇ ਘਰ ਵਿੱਚ ਰਹਿਣ ਲੱਗੇ ਸਨ।
ਸਾਗਰ ਅਤੇ ਰਾਧਾ ਦਾ ਦਾ ਵਿਆਹ ਚਾਰ ਸਾਲ ਪਹਿਲਾਂ ਹੋਇਆ ਸੀ ਅਤੇ ਦੋਹਾਂ ਦਾ ਕੋਈ ਬੱਚਾ ਨਹੀਂ ਸੀ। ਰਾਧਾ ਦੇ ਭਰਾ ਨੇ ਕਿਹਾ ਕਿ ਉਨ੍ਹਾਂ ਨੇ ਆਪਣੇ ਜੀਜੇ ਸਾਗਰ ਦੀ ਉਹ ਰਿਕਾਰਡਿੰਗ ਵੀ ਪੁਲਿਸ ਨੂੂੰ ਸੌਂਪੀ ਹੈ ਜਿਸ ਵਿੱਚ ਉਸਨੇ ਕਿਹਾ ਹੈ ਕਿ ਉਹ ਆਪਣੇ ਮਾਤਾ ਪਿਤਾ ਤੋਂ ਤੰਗ ਆ ਕੇ ਜਾਨ ਦੇ ਰਿਹਾ ਹੈ।
ਉਨ੍ਹਾਂ ਕਿਹਾ ਕਿ ਰਾਤ ਦੋਹਾਂ ਵਿੱਚ ਕੋਈ ਗੱਲਬਾਤ ਨਹੀਂ ਸੀ ਪਰ ਸਵੇਰੇ ਉੱਠਦਿਆਂ ਹੀ ਇਹ ਸਾਰਾ ਕੁਝ ਵਾਪਰ ਗਿਆ।
ਰਾਮਾ ਮੰਡੀ ਥਾਣੇ ਦੇ ਮੁਖ਼ੀ ਸੁਲੱਖਣ ਸਿੰਘ ਦੀ ਅਗਵਾਈ ਵਿੱਚ ਪੁਲਿਸ ਵੱਲੋਂ ਮਾਮਲੇ ਦੀ ਜਾਂਚ ਕੀਤੀ ਜਾ ਰਹੀ ਹੈ।
ਯੈੱਸ ਪੰਜਾਬ ਦੀਆਂ ਅਹਿਮ ਖ਼ਬਰਾਂ ਦੇ ਅਪਡੇਟਸ ਲਈ ਇੱਥੇ ਕਲਿੱਕ ਕਰਕੇ ਸਾਡੇ ਟੈਲੀਗਰਾਮ ਚੈਨਲ ਨਾਲ ਜੁੜੋ
