ਯੈੱਸ ਪੰਜਾਬ
ਅੰਮ੍ਰਿਤਸਰ, 17 ਜਨਵਰੀ, 2021:
ਅੰਮ੍ਰਿਤਸਰ ਪੁਲਿਸ ਨੇ ਅੱਜ ਇਕ ਨਾਕਾਬੰਦੀ ਦੌਰਾਨ ਨਾਮਵਰ ਗੈਂਗਸਟਰ ਸੰਨੀ ਯਾਮਾ ਨੂੰ ਉਸਦੇ ਚਾਰ ਸਾਥੀਆਂ ਸਣੇ ਗ੍ਰਿਫ਼ਤਾਰ ਕੀਤਾ ਹੈ।
ਫ਼ੜੇ ਗਏ ਵਿਅਕਤੀਆਂ ਦੀ ਪਛਾਣ ਰਣਜੀਤ ਸਿੰਘ ੳਰਫ਼ ਸੰਨੀ ਯਾਮਾ, ਦਲਜੀਤ ਸਿੰਘ, ਨਰਿੰਦਰ ਸਿੰਘ, ਗੁਰਪ੍ਰੀਤ ਸਿੰਘ ਅਤੇ ਚੰਨ ਵਜੋਂ ਹੋਈ ਹੈ।
ਥਾਣਾ ਵੱਲ੍ਹਾ ਦੀ ਪੁਲਿਸ ਅਨੁਸਾਰ ਅਪਰਬਾਰੀ ਦੋਆਬ ਨਹਿਰ ’ਤੇ ਸਨਿਚਰਵਾਰ ਰਾਤ ਲਾਏ ਇਕ ਨਾਕੇ ਦੌਰਾਨ ਇਕ ਬਿਨਾਂ ਨੰਬਰ ਦੀ ਨਵੀਂ ਇਨੋਵਾ ਗੱਡੀ ਨੂੰ ਰੋਕਿਆ ਗਿਆ ਤਾਂ ਇਸ ਵਿੱਚ ਉਕਤ ਸਾਰੇ ਸਵਾਰ ਸਵਾਰ ਸਨ। ਇਨ੍ਹਾਂ ਵਿੱਚੋਂ ਸੰਨੀ ਯਾਮਾ ਤੋਂ ਇਕ ਜਰਮਨੀ ਦਾ ਬਣਿਆ ਰਿਵਾਲਵਰ ਅਤੇ ਵੱਡੀ ਗਿਣਤੀ ਵਿੱਚ ਕਾਰਤੂਸ ਬਰਾਮਦ ਹੋਏ।
ਪੁਲਿਸ ਅਨੁਸਾਰ ਸੂਚਨਾ ਸੀ ਕਿ ਬਦਮਾਸ਼ਾਂ ਦਾ ਇਕ ਗਿਰੋਹ ਇਕ ਇਨੋਵਾ ਵਿੱਚ ਗੋਲਡਨ ਗੇਟ ਤੋਂ ਵੱਲਾ ਵੱਲ ਕਿਸੇ ਵਾਰਦਾਤ ਨੂੰ ਅੰਜਾਮ ਦੇਣ ਜਾਵੇਗਾ ਜਿਸ ਦੇ ਆਧਾਰ ’ਤੇ ਨਾਕਾਬੰਦੀ ਕੀਤੀ ਗਈ ਸੀ।
ਪੁਲਿਸ ਅਨੁਸਾਰ ਇਨੋਵਾ ਨੂੰ ਰੁਕਣ ਦਾ ਇਸ਼ਾਰਾ ਕੀਤਾ ਗਿਆ ਤਾਂ ਗੱੜੀ ਭਜਾਉਣ ਦੀ ਕੋਸ਼ਿਸ਼ ਕੀਤੀ ਗਈ ਜੋ ਪੁਲਿਸ ਕਰਮੀਆਂ ਵੱਲੋਂ ਨਾਕੇ ’ਤੇ ਰੱਖ਼ਿਆ ਬੈਰੀਕੇਡ ਗੱਡੀ ਦੇ ਅੱਗੇ ਕਰ ਦੇਣ ਨਾਲ ਅਸਫ਼ਲ ਹੋ ਗਈ।
ਸੰਨੀ ਯਾਮਾ ਜਿਸ ਦੇ ਖ਼ਿਲਾਫ਼ ਵੱਖ ਵੱਖ ਥਾਣਿਆਂ ਵਿੱਚ ਦਰਜਨ ਅਪਰਾਧਕ ਮਾਮਲੇ ਦਰਜ ਹਨ ਨੇ ਪੁਲਿਸ ਨੂੰ ਦੱਸਿਆ ਕਿ ਉਸ ਤੋਂ ਬਰਾਮਦ ਕੀਤਾ ਗਿਆ ਰਿਵਾਲਵਰ ਉਸਨੇ ਸੁਖ਼ਪ੍ਰੀਤ ਵਾਸੀ ਘਨਪੁਰ ਕਾਲੇ ਤੋਂ ਲਿਆ ਹੈ। ਪੁਲਿਸ ਨੇ ਸੁਖ਼ਪ੍ਰੀਤ ਦੇ ਖਿਲਾਫ਼ ਵੀ ਮਾਮਲਾ ਦਰਜ ਕਰ ਲਿਆ ਹੈ।
ਥਾਣਾ ਵੱਲਾ ਦੇ ਇੰਚਾਰਜ ਸੰਜੀਵ ਸ਼ਰਮਾ ਨੇ ਦੱਸਿਆ ਕਿ ਇਨੋਵਾ ਗੱਡੀ ਦਾ ਰਿਕਾਰਡ ਜਾਂਚਿਆ ਜਾ ਰਿਹਾ ਹੈ ਅਤੇ ਇਹ ਵੀ ਜਾਂਚ ਕੀਤੀ ਜਾ ਰਹੀ ਹੈ ਕਿ ਇਹ ਲੋਕ ਕਿਸ ਵਾਰਦਾਤ ਨੂੰ ਅੰਜਾਮ ਦੇਣ ਵਾਲੇ ਸਨ। ਪੁਲਿਸ ਨੇ ਦੋਸ਼ੀਆਂ ਅਦਾਲਤ ਵਿੱਚ ਪੇਸ਼ ਕੀਤਾ ਜਿਸ ਨੇ ਇਨ੍ਹਾਂ ਨੂੰ 5 ਦਿਨ ਦੇ ਪੁਲਿਸ ਰਿਮਾਂਡ ’ਤੇ ਭੇਜਿਆ ਹੈ।