ਯੈੱਸ ਪੰਜਾਬ
ਨਵੀਂ ਦਿੱਲੀ, 21 ਨਵੰਬਰ, 2020 –
ਸੰਗਤ ਤੱਕ ਬਿਨਾ ਕਿਸੇ ਸੁਆਰਥ ਦੇ ਸੇਵਾਵਾਂ ਪਹੁੰਚਾਉਣ ਲਈ ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਹਮੇਸ਼ਾ ਅੱਗੇ ਰਹਿੰਦੀ ਹੈ। ਇਸ ਲਈ ਸਮੇਂ-ਸਮੇਂ ’ਤੇ ਲੋੜੀਂਦੇ ਕਦਮ ਚੁੱਕੇ ਜਾਂਦੇ ਹਨ। ਇਸੇ ਕੜੀ ਵਿਚ ਹੁਣ ਤੀਜਾ ਬਾਲਾ ਪ੍ਰੀਤਮ ਦਵਾਖਾਨਾ ਖੋਲ੍ਹਣ ਦੀ ਤਿਆਰੀ ਹੋ ਰਹੀ ਹੈ।
ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਸ. ਮਨਜਿੰਦਰ ਸਿੰਘ ਸਿਰਸਾ ਨੇ ਦੱਸਿਆ ਕਿ ਕਨਾਟ ਪਲੇਸ ਅਤੇ ਨਾਰਥ ਦਿੱਲੀ ਦੇ ਗੁਰਦੁਆਰਿਆਂ ਵਿਖੇ ਦਵਾਖਾਨਾ ਖੋਲ੍ਹਣ ਤੋਂ ਬਾਅਦ ਤੀਜਾ ਦਵਾਖਾਨਾ ਪੱਛਮਪੁਰੀ ਵਿਖੇ ਖੋਲ੍ਹਣਾ ਤੈਅ ਕੀਤਾ ਗਿਆ ਹੈ। ਇਸ ਲਈ ਥਾਂ ਵੀ ਫ਼ਾਇਨਲ ਕਰ ਲਈ ਗਈ ਹੈ।
ਖੇਤਰ ਦੇ ਸਿੰਘ ਸਭਾ ਗੁਰਦੁਆਰੇ ਵਿਚ ਹੀ ਇਹ ਦਵਾਖਾਨਾ ਖੋਲ੍ਹਿਆ ਜਾਵੇਗਾ। ਇਸ ਦੇ ਖੁਲ੍ਹ ਜਾਣ ਤੋਂ ਪੱਛਮਪੁਰੀ ਅਤੇ ਉਸ ਦੇ ਆਲੇ-ਦੁਆਲੇ ਦੇ ਖੇਤਰ ਦੇ ਲੋਕ ਇਸ ਲਾਭ ਚੁਕ ਸਕਣਗੇ। ਉਨ੍ਹਾਂ ਨੂੰ ਮਾਰਕਿਟ ਰੇਟ ਤੋਂ ਘੱਟ ਦਾਮ ’ਤੇ ਦਵਾਈਆਂ ਮੁਹੱਈਆ ਹੋ ਸਕਣਗੀਆਂ। ਉਨ੍ਹਾਂ ਨੇ ਕਿਹਾ ਕਿ ਹੁਣ ਤੱਕ ਜੋ ਦਵਾਖਾਨੇ ਖੋਲ੍ਹੇ ਜਾ ਚੁਕੇ ਹਨ ਉੱਥੇ ਚੰਗੇ ਨਤੀਜੇ ਦੇਖਣ ਨੂੰ ਮਿਲ ਰਹੇ ਹਨ ਅਤੇ ਹੌਲੀ-ਹੌਲੀ ਹੋਰਨਾਂ ਥਾਵਾਂ ’ਤੇ ਵੀ ਦਵਾਖਾਨੇ ਖੋਲ੍ਹਣ ਦੀ ਤਿਆਰੀ ਕਰ ਰਹੇ ਹਨ।
ਬਿਨ੍ਹਾਂ ਮੁਨਾਫ਼ੇ ਦੇ ਦਿੱਤੀ ਜਾਂਦੀ ਹੈ ਦਵਾਈਆਂ:
ਸ. ਸਿਰਸਾ ਨੇ ਕਿਹਾ ਕਿ ਮਹਾਮਾਰੀ ਦੇ ਚੱਲਦੇ ਹਰ ਕੋਈ ਆਰਥਿਕ ਤੰਗੀ ਤੋਂ ਜੂਝ ਰਿਹਾ ਹੈ ਜਦੋਂ ਕਿ ਇਸ ਦੌਰ ਵਿਚ ਲੋਕਾਂ ਨੂੰ ਦਵਾਈਆਂ ਦੀ ਲੋੜ ਵੀ ਸਭ ਤੋਂ ਵੱਧ ਹੋ ਰਹੀ ਹੈ। ਇਸੇ ਨੂੰ ਹੀ ਦੇਖਦੇ ਹੋਏ 29 ਅਗਸਤ 2020 ਨੂੰ ਬੰਗਲਾ ਸਾਹਿਬ ਵਿਖੇ ਪਹਿਲਾ ਬਾਲਾ ਪ੍ਰੀਤਮ ਦਵਾਖਾਨਾ ਖੋਲ੍ਹਿਆ ਗਿਆ ਸੀ।
ਉਨ੍ਹਾਂ ਕਿਹਾ ਕਿ ਇਸ ਦਵਾਖਾਨੇ ’ਤੇ ਫ਼ਾਰਮੇਸੀ ਤੋਂ ਸਿੱਧੀ ਦਵਾਈਆਂ ਆਉਣਗੀਆਂ ਅਤੇ ਜਿਸ ਰੇਟ ’ਤੇ ਆਉਣਗੀਆਂ ਉਸੇ ਰੇਟ ’ਤੇ ਅੱਗੇ ਸੰਗਤ ਨੂੰ ਪ੍ਰਦਾਨ ਕੀਤੀ ਜਾਵੇਗੀ। ਇੱਕ ਰੁਪਏ ਵੀ ਮੁਨਾਫ਼ਾ ਨਹੀਂ ਰੱਖਿਆ ਜਾਵੇਗਾ। ਉਨ੍ਹਾਂ ਦੱਸਿਆ ਕਿ ਸੰਗਤ ਨੂੰ 20 ਤੋਂ 90 ਫ਼ੀਸਦ ਤੱਕ ਸਸਤੀ ਦਵਾਈਆਂ ਮਿਲਣਗੀਆਂ। ਭਾਵੇਂ ਜਨਰਿਕ ਹੋਵੇ, ਬ੍ਰਾਂਡੇਡ ਜਾਂ ਪੇਟੇਂਟ ਹਰ ਤਰੀਕੇ ਦੀ ਦਵਾਈਆਂ ਲੋਕਾਂ ਨੂੰ ਮਿਲਣਗੀਆਂ।
ਦਵਾਖਾਨੇ ਨੂੰ ਸੰਗਤ ਦਾ ਮਿਲ ਰਿਹਾ ਵੱਡਾ ਹੁਲਾਰਾ:
ਦਵਾਖਾਨੇ ਨੂੰ ਸੰਗਤ ਦਾ ਵੱਡਾ ਹੁਲਾਰਾ ਮਿਲ ਰਿਹਾ ਹੈ। ਸੰਗਤ ਇਸ ਦਾ ਚੰਗਾ ਲਾਭ ਵੀ ਉਠਾ ਰਹੀ ਹੈ। ਅੰਦਾਜ਼ਾ ਇਸ ਤੋਂ ਲਗਾਇਆ ਜਾ ਸਕਦਾ ਹੈ ਕਿ 4 ਨਵੰਬਰ ਨੂੰ ਨਾਨਕ ਪਿਆਓ ਗੁਰਦੁਆਰਾ ਸਾਹਿਬ ਵਿਖੇ ਖੋਲੇ ਗਏ ਬਾਲਾ ਪ੍ਰੀਤਮ ਦਵਾਖਾਨੇ ਤੋਂ ਹੁਣ ਤੱਕ 2 ਹਜ਼ਾਰ ਤੋਂ ਵੱਧ ਲੋਕ ਦਵਾਈਆਂ ਲੈ ਚੁਕੇ ਹਨ।
ਜਦੋਂ ਕਿ ਦੋਹਾਂ ਦਵਾਖਾਨਿਆਂ ਤੋਂ ਹੁਣ ਤੱਕ 1 ਕਰੋੜ ਤੋਂ ਵੱਧ ਦੀਆਂ ਦਵਾਈਆਂ ਵਿਕ ਚੁਕੀਆਂ ਹਨ ਥੋੜੇ ਹੀ ਸਮੇਂ ਵਿਚ ਇਹ ਅਜਿਹੇ ਅੰਕੜੇ ਬਣਾ ਲੈਣ ਤੋਂ ਜ਼ਾਹਿਰ ਹੁੰਦਾ ਹੈ ਕਿ ਇਹ ਦਵਾਖਾਨਾ ਸੰਗਤ ਲਈ ਲਾਭਕਾਰੀ ਸਾਬਤ ਹੋ ਰਹੇ ਹਨ।