ਯੈੱਸ ਪੰਜਾਬ
ਨਵੀਂ ਦਿੱਲੀ, 18 ਦਸੰਬਰ, 2020:
ਦਿੱਲੀ ਵਿੱਚ ਚੱਲ ਰਹੇ ਕਿਸਾਨਾਂ ਦੇ ਧਰਨਿਆਂ ਨੇ ਕਈ ਇਤਿਹਾਸ ਸਿਰਜੇ ਹਨ। ਕਈ ਨਿਵੇਕਲੀਆਂ ਪਹਿਲਾਂ ਹੋਈਆਂ ਹਨ।
ਸ਼ੁੱਕਰਵਾਰ ਦੀ ਸਵੇਰ ਮੋਰਚੇ ਨੇ ਇਕ ਹੋਰ ਨਵਾਂ ਇਤਿਹਾਸ ਸਿਰਜਿਆ ਹੈ। ਸਵੇਰ ਸਾਰ ਸ਼ੰਭੂ ਅਤੇ ਟਿਕਰੀ ਬਾਰਡਰਾਂ ’ਤੇ ਡਟੇ ਕਿਸਾਨਾਂ ਦੇ ਹੱਥ ਵਿੱਚ ‘ਟਰਾਲੀ ਟਾਈਮਜ਼’ ਨਾਂਅ ਦਾ ਇਕ ਨਵਾਂ ਚਾਰ ਸਫ਼ਿਆਂ ਦਾ ਅਖ਼ਬਾਰ ਆਇਆ। ਤਿੰਨ ਸਫ਼ੇ ਅੰਗਰੇਜ਼ੀ ਅਤੇ ਇਕ ਸਫ਼ਾ ਹਿੰਦੀ ਵਿੱਚ ਹੈ। ਤਸਵੀਰਾਂ ਹਨ, ਕਾਰਟੂਨ ਹਨ, ਲਿਖ਼ਤਾਂ ਹਨ, ਖ਼ਬਰਾਂ ਹਨ ਅਤੇ ਸੰਪਾਦਕੀ ਹੈ।
ਮਾਸਟਹੈੱਡ ਵਿੱਚ ‘ਅੰਦੋਲਨ ਦੀ ਆਪਣੀ ਆਵਾਜ਼’ ਹੋਣ ਦਾ ਐਲਾਨ ਕਰਦੇ ਇਸ ਅਖ਼ਬਾਰ ਦਾ ਡਾ: ਉਦੋਕੇ ਵੱਲੋਂ ਲਿਖ਼ਿਆ ਪਹਿਲਾ ਸੰਪਾਦਕੀ, ‘ਜੁੜਾਂਗੇ, ਲੜਾਂਗੇ, ਜਿੱਤਾਂਗੇ’ ਦਾ ਦਾਅਵਾ ਕਰਦਾ ਹੈ। ਹੋਰ ਬਹੁਤ ਸਾਰੀਆਂ ਰਚਨਾਵਾਂ ਹਨ। ਅੰਦੋਲਨ ਨਾਲ ਜੁੜੀਆਂ, ਗੰਭੀਰ ਪਰ ਦਿਲਚਸਪ।
ਕਵਿਤਾਵਾਂ ਨਾਲੋਂ ਅਗਾਂਹ ਜਾਂਦਿਆਂ ਕਿਸਾਨਾਂ ਦੇ ਹੱਕ ਵਿੱਚ ਹਾਅ ਦਾ ਨਾਅਰਾ ਮਾਰਦੇ ਹੋਏ ਪਦਮਸ਼੍ਰੀ ਸਨਮਾਨ ਮੋੜ ਦੇਣ ਦਾ ਐਲਾਨ ਕਰਨ ਵਾਲੇ ਕਵੀ ਸੁਰਜੀਤ ਪਾਤਰ ਦੀ ਅੰਤਲੇ ਸਫ਼ੇ ’ਤੇ ਛਪੀ ਕਵਿਤਾ ‘ਇਹ ਮੇਲਾ’ ਨਾਲ ਕਿਸਾਨ ਅੰਦੋਲਨ ਦਾ ਇਹ ਅਖ਼ਬਾਰ ਸੰਪੂਰਨਤਾ ਵੱਲ ਵਧਦਾ ਹੈ।
ਖ਼ਬਰ ਹੈ ਕਿ ਸਿੰਘੂ ਬਾਰਡਰ ’ਤੇ ਨਰਿੰਦਰ ਭਿੰਡਰ ਨਾਂਅ ਦੇ ਇਕ ਕਿਸਾਨ ਦੀ ਟਰਾਲੀ ਵਿੱਚ ਹੀ ਇਸ ਦਾ ਸੰਕਲਪ ਸਿਰਜਿਆ ਗਿਆ। ਲੇਖ਼ਕ ਸੁਰਮੀਤ ਮਾਵੀ ਅਤੇ ਫ਼ੋਟੋਗ੍ਰਾਫ਼ਰ ਗੁਰਦੀਪ ਸਿੰਘ ਧਾਲੀਵਾਲ ਦੇ ਇਸ ਉੱਦਮ ਨੇ ਕਿਸਾਨ ਅੰਦੋਲਨ ਦੀ ਨਵੇਂ ਅਤੇ ਨਿਵੇਕਲੇ ਢੰਗ ਨਾਲ ਬਾਤ ਪਾਈ ਹੈ।
ਟਰਾਲੀ ਟਾਈਮਜ਼ ਦਾ ਪਹਿਲਾ ਅੰਕ ਪੜ੍ਹਣ ਲਈ ਇੱਥੇ ਕਲਿੱਕ ਕਰੋ