ਯੈੱਸ ਪੰਜਾਬ
ਜਲੰਧਰ, 5 ਜੁਲਾਈ, 2022 –
ਮਹਾਂਨਗਰ ਵਿਖੇ ਹੈਂਡ ਟੂਲਜ਼ ਦੇ ਵਪਾਰ ਵਿੱਚ ਟੈਕਸ ਦੀ ਜਾਂਚ ਲਈ ਜੀ.ਐਸ.ਟੀ. ਵਿਭਾਗ ਜਲੰਧਰ 1 ਦੀ ਟੀਮ ਵੱਲੋਂ ਸ਼ਹਿਰ ਵਿਖੇ ਵੱਡੇ ਨਿਰਯਾਤਕ ਮੈਸਰਜ ਉਯਾਸ਼ ਇੰਟਰਪ੍ਰਾਈਜ਼ਜ਼ ਵਿਖੇ ਦਬਿਸ਼ ਦਿੱਤੀ ਗਈ, ਜਿਸ ਦੌਰਾਨ ਟੀਮ ਵੱਲੋਂ ਸਟਾਕ ਦੀ ਗਿਣਤੀ ਤੋਂ ਇਲਾਵਾ ਵਿਕਰੀ ਅਤੇ ਖ਼ਰੀਦ ਸਬੰਧੀ ਦਸਤਾਵੇਜ਼ ਆਦਿ ਕਬਜ਼ੇ ਵਿੱਚ ਲਏ ਗਏ ।
ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਸਹਾਇਕ ਕਮਿਸ਼ਨਰ ਜਲੰਧਰ-1 ਅਮਨ ਗੁਪਤਾ ਨੇ ਦੱਸਿਆ ਕਿ ਕਰ ਕਮਿਸ਼ਨਰ, ਪੰਜਾਬ ਕਮਲ ਕਿਸ਼ੋਰ ਯਾਦਵ ਅਤੇ ਡਿਪਟੀ ਕਮਿਸ਼ਨਰ, ਜਲੰਧਰ ਮੰਡਲ ਪਰਮਜੀਤ ਸਿੰਘ ਦੇ ਦਿਸ਼ਾ-ਨਿਰਦੇਸ਼ ‘ਤੇ ਉਕਾਂਰ ਨਾਥ, ਪਰਮਜੀਤ ਸਿੰਘ, ਜਗਮਾਲ ਸਿੰਘ ਅਤੇ ਨਵਜੋਤ ਸ਼ਰਮਾ, ਰਾਜ ਕਰ ਅਫ਼ਸਰ ਦੀ ਟੀਮ ਸਮੇਤ ਸਹਾਇਕ ਸਟਾਫ਼ ਵੱਲੋਂ ਇਸ ਕਾਰਵਾਈ ਨੂੰ ਨੇਪਰੇ ਚੜ੍ਹਾਇਆ ਗਿਆ ।
ਉਨ੍ਹਾਂ ਦੱਸਿਆ ਕਿ ਫਰਮ ਵੱਲੋਂ ਕੀਤੇ ਜਾ ਰਹੇ ਨਿਰਯਾਤ ਅਤੇ ਦੂਸਰੇ ਰਾਜਾਂ ਤੋਂ ਕੀਤੀ ਜਾ ਰਹੀ ਖ਼ਰੀਦ ਦੀ ਪੜਤਾਲ ਤੋਂ ਇਲਾਵਾ ਆਪਣੇ ਹਿਸਾਬ-ਕਿਤਾਬ ਵਿੱਚ ਦਿਖਾਏ ਗਏ ਸਟਾਕ ਦੀ ਭੌਤਿਕ ਜਾਂਚ ਲਈ ਇਹ ਦਬਿਸ਼ ਕੀਤੀ ਗਈ ਹੈ। ਉਨ੍ਹਾਂ ਦੱਸਿਆ ਕਿ ਦਬਿਸ਼ ਦੌਰਾਨ ਵਿਕਰੀ ਅਤੇ ਖ਼ਰੀਦ ਸਬੰਧੀ ਦਸਤਾਵੇਜ਼ ਆਦਿ ਕਬਜ਼ੇ ਵਿੱਚ ਲਏ ਗਏ ਹਨ, ਜਿਨ੍ਹਾਂ
ਦੀ ਜਾਂਚ ਪੜਤਾਲ ਕੀਤੀ ਜਾਵੇਗੀ ਅਤੇ ਜਲਦੀ ਹੀ ਫਰਮ ਦੀ ਦੇਣਦਾਰੀ ਤੈਅ ਕੀਤੀ ਜਾਵੇਗੀ । ਉਨ੍ਹਾਂ ਕਿਹਾ ਕਿ ਇਸ ਪੜਤਾਲ ਵਿੱਚ ਕਿਸੇ ਵੀ ਤਰ੍ਹਾਂ ਦੀ ਢਿੱਲ ਨਹੀਂ ਵਰਤੀ ਜਾਵੇਗੀ ਅਤੇ ਕਾਨੂੰਨ ਮੁਤਾਬਕ ਬਣਦੀ ਕਾਰਵਾਈ ਅਮਲ ਵਿੱਚ ਲਿਆਂਦੀ ਜਾਵੇਗੀ।
ਯੈੱਸ ਪੰਜਾਬ ਦੀਆਂ ਅਹਿਮ ਖ਼ਬਰਾਂ ਦੇ ਅਪਡੇਟਸ ਲਈ ਇੱਥੇ ਕਲਿੱਕ ਕਰਕੇ ਸਾਡੇ ਟੈਲੀਗਰਾਮ ਚੈਨਲ ਨਾਲ ਜੁੜੋ