ਯੈੱਸ ਪੰਜਾਬ
ਬਨੂੜ/ਰਾਜਪੁਰਾ/ਚੰਡੀਗੜ, 26 ਨਵੰਬਰ, 2021 –
ਚਿਤਕਾਰਾ ਯੂਨੀਵਰਸਿਟੀ ਵਿੱਚ ਅੱਜ ਅੰਤਰ-ਰਾਸ਼ਟਰੀ ਪ੍ਰਾਜੈਕਟ ‘‘ਐਜੂਰਿਫ਼ਾਰਮ” ਅਧਿਕਾਰਤ ਤੌਰ ਤੇ ਲਾਂਚ ਕੀਤਾ ਗਿਆ। ਇਸ ਮੌਕੇ ਉਦਘਾਟਨੀ ਸਮਾਗਮ ਅਤੇ ਸਸ਼ਕਤੀਕਰਣ ਕੈਂਪ ਦਾ ਆਯੋਜਿਨ ਕੀਤਾ ਗਿਆ। ਐਜੂਰਿਫ਼ਾਰਮ ਨੂੰ ਯੂਰਪੀਅਨ ਯੂਨੀਅਨ ਦੇ ਐਰਾਸਮਸ ਪ੍ਰੋਗਰਾਮ ਅਧੀਨ 9 ਕਰੋੜ ਦੀ ਗਰਾਂਟ ਦੇ ਨਾਲ ਜਾਰੀ ਕੀਤਾ ਗਿਆ। ਇਸ ਵਿਆਪਕ ਪ੍ਰਾਜੈਕਟ ਵਿੱਚ ਅਜਿਹਾ ਪਾਠਕ੍ਰਮ ਸ਼ਾਮਿਲ ਕੀਤਾ ਗਿਆ ਹੈ, ਜਿਸਦਾ ਉਦੇਸ਼ ਮੌਜੂਦਾ ਅਤੇ ਭਵਿੱਖ ਦੇ ਸੈਕੰਡਰੀ ਅਧਿਆਪਕਾਂ ਨੂੰ ਅਜਿਹੀ ਸਿਖਲਾਈ ਦੇਣਾ ਹੈ ਤਾਂ ਕਿ ਉਹ ਵਿਦਿਆਰਥੀਆਂ ਅੰਦਰਲੀ ਆਲੋਚਨਾਤਮਕ, ਵਿਸ਼ਲੇਸ਼ਣਾਤਮਕ ਅਤੇ ਰਚਨਾਤਮਕ ਪ੍ਰਤਿਭਾ ਨੂੰ ਨਿਖਾਰ ਸਕਣ।
ਐਜੂਰਿਫ਼ਾਰਮ ਪਾਠਕ੍ਰਮ ਦਾ ਉਦੇਸ਼ ਇਸ ਤਰਾਂ ਦੀ ਪ੍ਰਭਾਵੀ ਕੌਮੀ ਰਣਨੀਤੀ ਬਣਾਉਣਾ ਹੈ ਤਾਂ ਕਿ ਉਹ ਭਾਰਤੀ ਅਧਿਕਾਰੀਆਂ ਨੂੰ ਚੌਥੀ ਉਦਯੋਗਿਕ ਕਰਾਂਤੀ ਨਾਲ ਜੁੜੀਆਂ ਹੋਈਆਂ ਚੁਣੌਤੀਆਂ ਦਾ ਸਾਹਮਣਾ ਕਰਨ ਲਈ ਤਿਆਰ ਕਰ ਸਕਣ। ਆਪਣੇ ਮਿਸ਼ਨ ਨੂੰ ਸਫਲ ਬਣਾਉਣ ਲਈ ਐਜੂਰਿਫ਼ਾਰਮ ਦੀ ਟੀਮ ਵਿੱਚ ਭਾਰਤੀ ਅਤੇ ਯੂਰਪੀਅਨ ਯੂਨੀਵਰਸਿਟੀਆਂ ਦੇ ਮਾਹਿਰ ਸ਼ਾਮਿਲ ਹਨ, ਜੋ ਕਿ ਭਾਰਤੀ ਅਤੇ ਯੂਰਪੀਅਨ ਸਕੂਲਾਂ ਨਾਲ ਮਿਲਕੇ ਕੰਮ ਕਰ ਰਹੀ ਹੈ, ਤਾਂ ਕਿ ਚੌਥੀ ਉਦਯੋਗਿਕ ਕਰਾਂਤੀ ਦੀਆਂ ਜ਼ਰੂਰਤਾਂ ਦੇ ਹਿਸਾਬ ਨਾਲ ਨੈਸ਼ਨਲ ਵਰਕ ਫ਼ੋਰਸ ਨੂੰ ਤਿਆਰ ਕੀਤਾ ਜਾ ਸਕੇ।
ਚਿਤਕਾਰਾ ਯੂਨਵਰਸਿਟੀ ਦੇ ਚਾਂਸਲਰ ਡਾ ਅਸ਼ੋਕ ਚਿਤਕਾਰਾ ਅਤੇ ਪ੍ਰੋ ਚਾਂਸਲਰ ਡਾ ਮਧੂ ਚਿਤਕਾਰਾ ਨੇ ਇਸ ਮੌਕੇ ਬੋਲਦਿਆਂ ਆਖਿਆ ਕਿ ਚਿਤਕਾਰਾ ਯੂਨੀਵਰਸਿਟੀ ਇਸ ਵਕਾਰੀ ਪ੍ਰਾਜੈਕਟ ਵਿੱਚ ਮੋਹਰੀ ਯੂਨੀਵਰਸਿਟੀ ਵਜੋਂ ਸ਼ਾਮਿਲ ਹੋਈ, ਜਿਸ ਦੀ ਉਹ ਸਾਰਿਆਂ ਨੂੰ ਵਧਾਈ ਦਿੰਦੇ ਹਨ। ਉਨਾਂ ਕਿਹਾ ਕਿ ਇਸ ਨਾਲ ਚਿਤਕਾਰਾ ਦਾ ਵਿਸ਼ਵ ਪੱਧਰ ਉੱਤੇ ਨਾਮ ਹੋਰ ਉੱਚਾ ਹੋਇਆ ਹੈ।
ਇਸ ਪਰਿਯੋਜਨਾ ਵਿੱਚ ਚਾਰ ਭਾਰਤੀ ਯੂਨੀਵਰਸਿਟੀਆਂ ਜਿਨਾਂ ਵਿੱਚ ਚਿਤਕਾਰਾ ਯੂਨੀਵਰਸਿਟੀ, ਮਹਾਰਾਜਾ ਸਿਆਜੀ ਰਾਓ ਯੂਨੀਵਰਸਿਟੀ ਆਫ਼ ਬੜੌਦਾ, ਸਵਿੱਤਰੀ ਬਾਈ ਫੂਲੇ ਪੂਨੇ ਯੂਨੀਵਰਸਿਟੀ ਅਤੇ ਸ਼ਿਵਾ ਜੀ ਯੂਨੀਵਰਸਿਟੀ ਸ਼ਾਮਿਲ ਹਨ। ਯੂਰਪੀਅਨ ਯੂਨੀਵਰਸਿਟੀਆਂ ਵਿੱਚ ਯੂਨੀਵਰਸਿਟੀ ਆਫ਼ ਲਾਟਵੀਆ, ਯੂਨੀਵਰਸਿਟੀ ਆਫ਼ ਹੈਮਬਰਗ, ਜੇ.ਏ.ਐਮ.ਕੇ. ਯੂਨੀਵਰਸਿਟੀ ਆਫ਼ ਅਲਾਈਡ ਸਾਇੰਸਜ਼ ਅਤੇ ਇਟਾਲੀਅਨ ਯੂਨੀਵਰਸਿਟੀ ਸ਼ਾਮਿਲ ਹਨ। ਇਸ ਤੋਂ ਇਲਾਵਾ ਦੋ ਸੈਕੰਡਰੀ ਸਕੂਲ ਚਿਤਕਾਰਾ ਇੰਟਰਨੈਸ਼ਨਲ ਸਕੂਲ ਅਤੇ ਲਾਈਸੀਓ ਆਰਟਿਸਟੀਕੋ ਕੋਰੀਓਟਿਕੋ ਮਿਊਸੀਕੇਲ ਕੈਂਡੀਅਨ ਬਾਸ ਸਕੂਲ ਸ਼ਾਮਿਲ ਹਨ।
ਫਾਊਂਡਰ ਅਤੇ ਚੀਫ਼ ਲਰਨਰ ਐਲ.ਐਕਸ.ਐਲ. ਆਈਡੀਆਜ਼, ਫੈਸਟੀਵਲ ਡਾਇਰੈਕਟਰ ਆਈ.ਕੇ.ਐਫ਼.ਐਫ਼. ਸਯਦ ਸੁਲਤਾਨ ਅਹਿਮਦ ਅਤੇ ਚਿਤਕਾਰਾ ਇੰਟਰਨੈਸ਼ਨਲ ਸਕੂਲ ਚੰਡੀਗੜ ਅਤੇ ਪੰਚਕੂਲਾ ਦੀ ਡਾਇਰੈਕਟਰ ਡਾ ਨਿਆਤੀ ਚਿਤਕਾਰਾ ਨੇ ‘‘ਐਜੂਕੇਟਰ ਦਾ ਚੇਂਜ ਮੇਕਰ” ਅਤੇ ‘‘ਐਜੂਕੇਸ਼ਨਲ ਰੋਲਰ ਕੋਸਟਰ ਰਾਈਡ ਏਲਾਂਗ ਫ਼ਾਰ ਏ ਸਕਿੱਲ ਇਨਹਾਸਪੈਂਟ ਐਕਸਪੀਰੀਐਂਸ” ਵਿਸ਼ਿਆਂ ਉੱਤੇ ਦਰਸ਼ਕਾਂ ਨੂੰ ਸੰਬੋਧਨ ਕੀਤਾ।
ਸ੍ਰੀ ਅਹਿਮਦ ਨੇ ਵਿਦਿਆਰਥੀਆਂ ਦੇ ਗਿਆਨ ਅਤੇ ਜਾਣਕਾਰੀ ਨੂੰ ਵਧਾਉਣ ਲਈ ਅਧਿਆਪਕਾਂ ਦੀ ਭੂਮਿਕਾ ਤੇ ਚਰਚਾ ਕੀਤੀ। ਉਨਾਂ ਸਿੱਖਿਆ ਖੇਤਰ ਵਿੱਚ ਨਵੀਆਂ ਤਕਨੀਕਾਂ ਦੇ ਮਹੱਤਵ ਅਤੇ ਫ਼ਿਲਮਾਂ ਤੇ ਸਿਨੇਮੇ ਨੂੰ ਨਵੇਂ ਤਰੀਕੇ ਨਾਲ ਸ਼ਾਮਿਲ ਕਰਨ ਦੇ ਲਾਭਾਂ ਬਾਰੇ ਜਾਣਕਾਰੀ ਦਿੱਤੀ।
ਚਿਤਕਾਰਾ ਇੰਟਰਨੈਸ਼ਨਲ ਸਕੂਲ ਚੰਡੀਗੜ ਅਤੇ ਪੰਚਕੂਲਾ ਦੀ ਡਾਇਰੈਕਟਰ ਡਾ ਨਿਆਤੀ ਚਿਤਕਾਰਾ ਨੇ ਇਸ ਮੌਕੇ ਬੋਲਦਿਆਂ ਆਖਿਆ ਕਿ ਇਸ ਤੇਜ਼ ਤਰਾਰ ਉਦਯੋਗਿਕ ਦੁਨੀਆਂ ਵਿੱਚ ਵਿਦਿਆਰਥੀਆਂ ਨੂੰ ਪਰਪੱਕ ਅਤੇ ਸਫਲ ਬਣਾਉਣ ਲਈ ਨਵੇਂ ਵਿਸ਼ਿਆਂ ਅਤੇ ਤਜਰਬਿਆਂ ਦੀ ਜ਼ਰੂਰਤ ਹੈ। ਉਨਾਂ ਕਿਹਾ ਕਿ ਐਜੂਰਿਫ਼ਾਰਮ ਭਵਿੱਖ ਅਤੇ ਅੱਜ ਲਈ ਪ੍ਰਾਸੰਗਿਕ ਪਾਠਕ੍ਰਮ ਤਿਆਰ ਕਰਨ ਦੀ ਦਿਸ਼ਾ ਵਿੱਚ ਲਗਾਤਾਰ ਕਾਰਜਸ਼ੀਲ ਹੈ।
ਇਸ ਮੌਕੇ ਐਜੂਰਿਫ਼ਾਰਮ ਪ੍ਰਾਜੈਕਟ ਦੇ ਤਕਨੀਕੀ ਅਤੇ ਵਿੱਤੀ ਸੈਸ਼ਨ, ਰੇਡੀਓ ਟਾਕ, ਯੂਨੀਵਰਸਿਟੀ ਡੀਨ ਸੈਸ਼ਨ, ਵਿਕਾਸੀ ਸੈਸ਼ਨ ਵੀ ਆਯੋਜਿਤ ਕੀਤੇ ਗਏ। ਇਨਾਂ ਸੈਸ਼ਨਾਂ ਵਿੱਚ ਭਾਰਤੀ ਯੂਨੀਵਰਸਿਟੀਆਂ ਦੇ ਸਿਲੇਬਸ ਨੂੰ ਪ੍ਰਾਜੈਕਟ ਕੀਤਾ ਗਿਆ।
ਯੈੱਸ ਪੰਜਾਬ ਦੀਆਂ ਅਹਿਮ ਖ਼ਬਰਾਂ ਦੇ ਅਪਡੇਟਸ ਲਈ ਇੱਥੇ ਕਲਿੱਕ ਕਰਕੇ ਸਾਡੇ ਟੈਲੀਗਰਾਮ ਚੈਨਲ ਨਾਲ ਜੁੜੋ
