ਯੈੱਸ ਪੰਜਾਬ
ਬਨੂੜ/ਰਾਜਪੁਰਾ/ਚੰਡੀਗੜ੍ਹ, 3 ਅਕਤੂਬਰ, 2022 –
ਚਿਤਕਾਰਾ ਯੂਨੀਵਰਸਿਟੀ ਦੇ ਨਵੇਂ ਅਤਿ-ਆਧੁਨਿਕ ਮਨੋਵਿਗਿਆਨ ਪ੍ਰੋਗਰਾਮ ਦਾ ਅੱਜ ਉਦਘਾਟਨ ਕੀਤਾ ਗਿਆ। ਇਸ ਮੌਕੇ ਨਾਮਵਰ ਅਦਾਕਾਰਾ, ਨਿਰਦੇਸ਼ਕ, ਲੇਖਕ, ਚਿੱਤਰਕਾਰ, ਫੋਟੋਗ੍ਰਾਫ਼ਰ ਦੀਪਤੀ ਨਵਲ, ਮਸ਼ਹੂਰ ਮਨੋਵਿਗਿਆਨੀ ਸ੍ਰੀਮਤੀ ਮੈਗਡੇਲੀਨ ਜੇਯਾਰਥਨਮ ਅਤੇ ਹੱਥ ਲਿਖਤ ਵਿਸਲੇਸ਼ਕ ਰਾਜੇਸ਼ ਕੋਠਾਰੀ ਨੇ ਪ੍ਰਮੁੱਖ ਤੌਰ ਤੇ ਸ਼ਿਰਕਤ ਕੀਤੀ।
ਸਮਾਰੋਹ ਦਾ ਆਗਾਜ਼ ਚਿਤਕਾਰਾ ਯੂਨੀਵਰਸਿਟੀ ਦੀ ਪ੍ਰੋ ਚਾਂਸਲਰ ਡਾ ਮਧੂ ਚਿਤਕਾਰਾ ਨੇ ਸ਼ਮਾ ਰੌਸ਼ਨ ਕਰਕੇ ਕੀਤਾ। ਕਲੀਨਿਕਲ ਸਾਈਕੋਲਾਜੀ ਪ੍ਰੋਗਰਾਮ (ਬੈਚੁਲਰ ਆਫ਼ ਸਾਇੰਸ ਅਤੇ ਮਾਸਟਰਜ਼ ਆਫ਼ ਸਾਇੰਸ) ਨੂੰ ਮਨੋਵਿਗਿਆਨ ਦੇ ਖੇਤਰ ਵਿੱਚ ਹੋ ਰਹੀ ਪ੍ਰਗਤੀ ਦੇ ਨਾਲ ਤਾਲਮੇਲ ਰੱਖਦੇ ਹੋਏ ਡਿਜ਼ਾਇਨ ਕੀਤਾ ਗਿਆ ਹੈ। ਮਨੋਵਿਗਿਆਨ ਵਿੱਚ ਵਿਸ਼ੇਸ਼ਕਿ੍ਰਤ ਜਾਣਕਾਰੀ ਹਾਸਿਲ ਕਰਨ ਦੇ ਮੰਤਵ ਨਾਲ ਸ਼ੁਰੂ ਕੀਤਾ ਗਿਆ ਇਹ ਪ੍ਰੋਗਰਾਮ ਵਿਦਿਆਰਥੀਆਂ ਦੀ ਕਲੀਨਿਕਲ ਸਾਈਕੋਲਾਜੀ ਅਕਾਦਮਿਕ ਰੁਚੀ ਨੂੰ ਵਧਾਉਣ ਦੇ ਨਾਲ-ਨਾਲ ਉਨ੍ਹਾਂ ਦੇ ਵਿਅਕਤੀਗਤ ਵਿਕਾਸ ਅਤੇ ਜਾਗਰੂਕਤਾ ਨੂੰ ਵਧਾਉਣ ਵਿੱਚ ਸਹਾਈ ਹੋਵੇਗਾ।
ਸਮਾਰੋਹ ਦੇ ਮੁੱਖ ਬੁਲਾਰੇ ਵਜੋਂ ਬੋਲਦਿਆਂ ਦੀਪਤੀ ਨਵਲ ਨੇ ਥੀਏਟਰ ਵਿੱਚ ਮਨੋਵਿਗਿਆਨ ਦੀ ਭੂਮਿਕਾ ਬਾਰੇ ਆਪਣੇ ਵਿਚਾਰ ਸਾਂਝੇ ਕੀਤੇ। ਉਨ੍ਹਾਂ ‘‘ਮਨੋਵਿਗਿਆਨ ਅਤੇ ਰੰਗਮੰਚ ਸਾਥ-ਸਾਥ, ਦੀਪਤੀ ਨਵਲ ਨਾਲ ਲਮ੍ਹਾ ਲਮ੍ਹਾ” ਵਿਸ਼ੇ ਉੱਤੇ ਹੋਏ ਸੈਸ਼ਨ ਨੂੰ ਸੰਬੋਧਨ ਕੀਤਾ। ਉਨ੍ਹਾਂ ਆਪਣੀ ਜੀਵਨੀ ਸਬੰਧੀ ਲਿਖੀ ਪੁਸਤਕ ਵਿੱਚੋਂ ਵੀ ਵਿਦਿਆਰਥੀਆਂ ਨਾਲ ਸੰਵਾਦ ਰਚਾਇਆ। ਉਨ੍ਹਾਂ ਕਿਹਾ ਕਿ ਮਨੋਵਿਗਿਆਨ ਅਤੇ ਥੀਏਟਰ ਵਿਚਕਾਰ ਡੂੰਘੀ ਸਾਂਝ ਹੈ ਅਤੇ ਅਦਾਕਾਰਾਂ ਨੂੰ ਉਹਨਾਂ ਦੇ ਕਿਰਦਾਰ ਨਿਭਾਉਣ ਲਈ ਮਨੋਵਿਗਿਆਨਕ ਤੌਰ ਤੇ ਤਿਆਰ ਹੋਣਾ ਪੈਂਦਾ ਹੈ।
ਉੱਘੀ ਥੈਰੇਪਿਸਟ, ਸਾਈਕੋਡਰਾਮੈਟਿਸਟ ਅਤੇ ਈਸਟ ਵੈਸਟ ਸੈਂਟਰ ਫ਼ਾਰ ਕੌਂਸਲਿੰਗ ਦੀ ਸੰਸਥਾਪਕ ਸ੍ਰੀਮਤੀ ਮੈਗਡੇਲੀਨ ਜੈਰਥਨਮ ਨੇ ਇਸ ਮੌਕੇ ਬੋਲਦਿਆਂ ਵਿਦਿਆਰਥੀਆਂ ਨੂੰ ਮਨੋਵਿਗਿਆਨ ਦੀ ਡੂੰਘੀ ਸਮਝ ਪ੍ਰਾਪਤ ਕਰਨ ਅਤੇ ਸਵੈ ਜਾਗਰੂਕ ਹੋਣ ਲਈ ਆਪਣੇ ਤਜਰਬੇ ਸਾਂਝੇ ਕੀਤੇ।
ਨਾਮਵਰ ਹੈਂਡਰਾਈਟਿੰਗ ਐਨਾਲਿਸਟ ਰਾਜੇਸ਼ ਐਸ. ਕੋਠਾਰੀ ਨੇ ਵਿਦਿਆਰਥੀਆਂ ਨੂੰ ਆਪਣੀਆਂ ਸ਼ਕਤੀਆਂ ਦੀ ਪੜਚੋਲ ਕਰਨ ਅਤੇ ਲਗਾਤਾਰ ਸਿੱਖਦੇ ਰਹਿਣ ਦੇ ਹੁਨਰ ਨੂੰ ਅਪਣਾ ਕੇ ਆਪਣੀ ਸਖਸ਼ੀਅਤ ਉਸਰੀ ਕਰਨ ਲਈ ਪ੍ਰੇਰਿਆ।
ਚਿਤਕਾਰਾ ਸਕੂਲ ਆਫ਼ ਸਾਈਕੋਲਾਜੀ ਐਂਡ ਕੌਂਸਲਿੰਗ (ਸੀਐੱਸਪੀਸੀ) ਨੇ ਬੀਏ (ਆਨਰਜ਼), ਅਪਲਾਈਡ ਸਾਈਕੋਲਾਜੀ, ਬੀਐੱਸਸੀ ਕਲੀਨੀਕਲ ਸਾਈਕੋਲਾਜੀ, ਐਮਏ ਅਪਲਾਈਡ ਸਾਈਕੋਲਾਜੀ ਅਤੇ ਐਮਐਸਸੀ ਕਲੀਨਿਕਲ ਸਾਈਕੋਲਾਜੀ ਦੇ ਵਿਦਿਆਰਥੀਆਂ ਦਾ ਪ੍ਰੋਗਰਾਮ ਦੇ ਪਹਿਲੇ ਦਿਨ ਭਰਵਾਂ ਸਵਾਗਤ ਕੀਤਾ। ਵਿਦਿਆਰਥੀਆਂ ਨੂੰ ਇਸ ਮੌਕੇ ਮਨੋਵਿਗਿਆਨ ਦੀਆਂ ਬਾਰੀਕੀਆਂ, ਮਨੋਵਿਗਿਆਨ ਅਤੇ ਰੰਗ-ਮੰਚ ਦੇ ਸਬੰਧਾਂ ਸਬੰਧੀ ਵੱਖ-ਵੱਖ ਬੁਲਾਰਿਆਂ ਨੇ ਵਿਸਥਾਰ ਵਿੱਚ ਜਾਣਕਾਰੀ ਦਿੱਤੀ ਗਈ।
ਇਸ ਮੌਕੇ ਬੋਲਦਿਆਂ ਚਿਤਕਾਰਾ ਯੂਨੀਵਰਸਿਟੀ ਦੀ ਪ੍ਰੋ ਚਾਂਸਲਰ ਡਾ ਮਧੂ ਚਿਤਕਾਰਾ ਨੇ ਆਖਿਆ ਕਿ ਯੂਨੀਵਰਸਿਟੀ ਸਿਹਤ ਸੰਭਾਲ ਖੇਤਰ ਲਈ ਉਚੇਚੇ ਹੁਨਰਮੰਦ ਮਨੋਵਿਗਿਆਨੀ ਤਿਆਰ ਕਰੇਗੀ। ਉਨ੍ਹਾਂ ਕਿਹਾ ਕਿ ਇਸ ਖੇਤਰ ਵਿੱਚ ਮੁਹਾਰਤ ਹਾਸਿਲ ਕਰਨ ਦੇ ਇਛੁੱਕ ਵਿਦਿਆਰਥੀਆਂ ਲਈ ਇਸ ਪ੍ਰੋਗਰਾਮ ਦੇ ਰਾਹੀਂ ਯੋਗਤਾਵਾਂ, ਨਵੀਨਤਾਕਾਰੀ ਸਿਧਾਂਤਕ ਪਹੁੰਚ ਅਤੇ ਤਕਨੀਕਾਂ ਸਬੰਧੀ ਮੁਹਾਰਿਤ ਹਾਸਿਲ ਕਰਨ ਵਿੱਚ ਮੱਦਦ ਮਿਲੇਗੀ, ਜਿਹੜੀ ਕਿ ਇੱਕ ਕਲੀਨਿਕਲ ਸਾਈਕੋਲਾਜਿਸਟ ਦੇ ਰੂਪ ਵਿੱਚ ਪ੍ਰੈਕਟਿਸ ਕਰਨ ਲਈ ਜ਼ਰੂਰੀ ਹੁੰਦੀ ਹੈ।
ਉਨ੍ਹਾਂ ਕਿਹਾ ਕਿ ਮਨੋਵਿਗਿਆਨ ਦੇ ਸਾਰੇ ਪ੍ਰੋਗਰਾਮ ਅੰਤਰ-ਅਨੁਸ਼ਾਸ਼ਨੀ ਵਿਕਾਸ ਦੀ ਭਾਵਨਾ ਨਾਲ ਆਰੰਭ ਕੀਤੇ ਗਏ ਹਨ, ਜਿਨ੍ਹਾਂ ਰਾਹੀਂ ਵਿਦਿਆਰਥੀ ਆਪਣੇ ਵਿਸ਼ੇਸ਼ਕਿ੍ਰਤ ਖੇਤਰ ਵਿੱਚ ਅਕਾਦਮਿਕ ਜਾਣਕਾਰੀ ਅਤੇ ਖੋਜ ਕਰ ਸਕਣਗੇ।
ਯੈੱਸ ਪੰਜਾਬ ਦੀਆਂ ਪੰਜਾਬੀ ਖ਼ਬਰਾਂ ਲਈ ਇੱਥੇ ਕਲਿੱਕ ਕਰਕੇ ਸਾਡਾ ਫ਼ੇਸਬੁੱਕ ਪੇਜ ਲਾਈਕ ਕਰੋ
