ਯੈੱਸ ਪੰਜਾਬ
ਖੰਨਾ, 27 ਮਈ, 2022:
ਖੰਨਾ ਵਿੱਚ ਸ਼ੁੱਕਰਵਾਰ ਨੂੰ ਇਕ ਦਰਦਨਾਕ ਹਾਦਸਾ ਵਾਪਰ ਗਿਆ ਜਿਸ ਨਾਲ ਇਕ ਹੀ ਪਰਿਵਾਰ ਦੇ ਤਿੰਨ ਜੀਆਂ ਦੀ ਮੌਤ ਹੋ ਗਈ ਜਦਕਿ ਦੋ ਹੋਰ ਗੰਭੀਰ ਰੂਪ ਵਿੱਚ ਜ਼ਖ਼ਮੀ ਹੋ ਗਏ।
ਹਾਦਸਾ ਕੌਮੀ ਸ਼ਾਹਮਾਰਗ ’ਤੇ ਪਿੰਡ ਅਲੌੜ ਨੇੜੇ ਵਾਪਰਿਆ ਜਦ ਇਕ ਕੰਟੇਨਰ ਕੋਲੋਂ ਲੰਘ ਰਹੀ ਇਕ ਕਾਰ ’ਤੇ ਜਾ ਡਿੱਗਿਆ ਜਿਸ ਨਾਲ ਪਰਿਵਾਰ ਦੇ ਪੰਜ ਮੈਂਬਰਾਂ ਵਾਲੀ ਇਹ ਮੰਦਭਾਗੀ ਕਾਰ ਕੰਟੇਨਰ ਹੇਠਾਂ ਇਸ ਕਦਰ ਦਬ ਗਈ ਕਿ ਕਾਰ ਨੂੰ ਕੰਟੇਨਰ ਹੇੇਠੋਂ ਕੱਢਣਾ ਅਤੇ ਕਾਰ ਸਵਾਰਾਂ ਨੂੰ ਇਸ ਵਿੱਚੋਂ ਕੱਢਣਾ ਇਕ ਵੱਡਾ ਕਾਰਜ ਹੋ ਨਿੱਬੜਿਆ ਜਿਸ ਲਈ ਕਰੇਨਾਂ ਦੀ ਸਹਾਇਤਾ ਲਈ ਗਈ।
ਜਦ ਤਕ ਇਹ ਰਾਹਤ ਕਾਰਜ ਸਿਰੇ ਚੜ੍ਹਦਾ ਕਾਰ ਵਿੱਚ ਸਵਾਰ ਦੋ ਜੁੜਵਾਂ ਬੱਚੇ, ਇਕ ਭਰਾ ਤੇ ਇਕ ਭੈਣ, ਅਤੇ ਉਨ੍ਹਾਂ ਦੀ ਮਾਂ ਦਮ ਤੋੜ ਚੁੱਕੀਆਂ ਸਨ ਜਦਕਿ ਗੰਭੀਰ ਹਾਲਤ ਵਿੱਚ ਬੱਚਿਆਂ ਦੇ ਬਾਪ ਅਤੇ ਦਾਦੀ ਨੂੰ ਹਸਪਤਾਲ ਪੁਚਾਇਆ ਗਿਆ।
ਸੂਚਨਾ ਮਿਲਦੇ ਹੀ ਥਾਣਾ ਸਿਟੀ ਅਤੇ ਥਾਣਾ ਸਿਟੀ 2 ਤੋਂ ਫ਼ੋਰਸ ਮੌਕੇ ’ਤੇ ਪੁੱਜੀ ਜਿਸਨੇ ਮ੍ਰਿਤਕਾਂ ਦੀਆਂ ਲਾਸ਼ਾਂ ਖੰਨਾ ਸਿਵਲ ਹਸਪਤਾਲ ਪੁਚਾਈਆਂ।
ਇਹ ਪਰਿਵਾਰ ਪਿੰਡ ਨਸਰਾਲੀ ਨਾਲ ਸੰਬੰਧਤ ਦੱਸਿਆ ਜਾ ਰਿਹਾ ਹੈ ਜੋ ਕਿ ਫ਼ਤਹਿਗੜ੍ਹ ਸਾਹਿਬ ਮੱਥਾ ਟੇਕਣ ਗਿਆ ਸੀ ਅਤੇ ਜਦ ਵਾਪਸ ਆਪਣੇ ਪਿੰਡ ਨਸਰਾਲੀ ਜਾ ਰਹੇ ਸਨ ਤਾਂ ਇਹ ਦਰਦਨਾਕ ਹਾਦਸਾ ਵਾਪਰ ਗਿਆ।
ਕਾਰ ਚਲਾ ਰਹੇ ਪਰਿਵਰ ਦੇ ਮੁਖ਼ੀ ਦੀ ਪਛਾਣ ਗੁਰਿੰਦਰ ਸਿੰਘ ਬੌਬੀ ਵਜੋਂ ਹੋਈ ਹੈ। ਬੌਬੀ ਅਤੇ ਉਸਦੀ ਮਾਤਾ ਕਮਲਜੀਤ ਕੌਰ ਜ਼ਖ਼ਮੀ ਹਨ।
ਮ੍ਰਿਤਕਾਂ ਵਿੱਚ ਬੌਬੀ ਦੀ ਪਤਨੀ ਨਵਪ੍ਰੀਤ ਕੌਰ, ਦੱਸ ਸਾਲਾ ਲੜਕਾ ਹਰਸਿਮਰਨਸਿੰਘ ਅਤੇ ਲੜਕੀ ਹਰਸੀਰਤ ਕੌਰ ਸ਼ਾਮਲ ਹਨ।
ਯੈੱਸ ਪੰਜਾਬ ਦੀਆਂ ਅਹਿਮ ਖ਼ਬਰਾਂ ਦੇ ਅਪਡੇਟਸ ਲਈ ਇੱਥੇ ਕਲਿੱਕ ਕਰਕੇ ਸਾਡੇ ਟੈਲੀਗਰਾਮ ਚੈਨਲ ਨਾਲ ਜੁੜੋ
