ਯੈੱਸ ਪੰਜਾਬ
ਨਵੀਂ ਦਿੱਲੀ, 28 ਨਵੰਬਰ, 2020:
ਪੰਜਾਬ ਤੋਂ ਚੱਲ ਕੇ 40 ਕਿਲੋਮੀਟਰ ਤੋਂ ਵੀ ਵੱਡਾ 2 ਲੱਖ ਲੋਕਾਂ ਦਾ ਕਾਫ਼ਿਲਾ ਲੈ ਕੇ ਦਿੱਲੀ ਵੱਲ ਕੂਚ ਕਰ ਰਹੇ ਭਾਰਤੀ ਕਿਸਾਨ ਯੂਨੀਅਨ ਉਗਰਾਹਾਂ ਦੇ ਪ੍ਰਧਾਨ ਸ: ਜੋਗਿੰਦਰ ਸਿੰਘ ਉਗਰਾਹਾਂ ਨੂੰ ਕੇਂਦਰੀ ਗ੍ਰਹਿ ਮੰਤਰੀ ਸ੍ਰੀ ਅਮਿਤ ਸ਼ਾਹ ਨੇ ਫ਼ੋਨ ਕਰਕੇ ਉਨ੍ਹਾਂ ਨੂੰ ਬੁਰਾੜੀ ਵਿਖ਼ੇ ਦਿੱਤੇ ਗਏ ਨਿਰੰਕਾਰੀ ਮੈਦਾਨ ਵਿੱਚ ਹੀ ਆਪਣੇ ਪ੍ਰਦਰਸ਼ਨ ਲਈ ਪੁੱਜਣ ਵਾਸਤੇ ਕਿਹਾ ਹੈ।
ਜ਼ਿਕਰਯੋਗ ਹੈ ਕਿ ਦਿੱਲੀ ਵੱਲ ਜਾ ਰਹੇ ਉਗਰਾਹਾਂ ਜੱਥੇਬੰਦੀ ਦੇ ਕਾਫ਼ਲੇ ਦੀ ਅਗਵਾਈ ਕਰ ਰਹੇ ਸ: ਉਗਰਾਹਾਂ ਨੇ ਪਹਿਲਾਂ ਹੀ ਐਲਾਨ ਕਰ ਦਿੱਤਾ ਸੀ ਕਿ ਉਹਨਾਂ ਨੂੰ ਬੁਰਾੜੀ ਵਿਖ਼ੇ ਬੈਠਣਾ ਮਨਜ਼ੂਰ ਨਹੀਂ ਅਤੇ ਉਹ ਜੰਤਰ ਮੰਤਰ ਵਿਖ਼ੇ ਧਰਨਾ ਦੇਣਗੇ। ਉਨ੍ਹਾਂ ਆਖ਼ਿਆ ਸੀ ਕਿ ਜੇ ਉਨ੍ਹਾਂ ਨੂੰ ਜੰਤਰ ਮੰਤਰ ਵਿਖ਼ੇ ਬੈਠਣ ਜਾਂ ਜਾਣ ਦੀ ਇਜਾਜ਼ਤ ਨਾ ਦਿੱਤੀ ਗਈ ਤਾਂ ਉਹ ਦਿੱਲੀ ਸਰਹੱਦ ’ਤੇ ਸੜਕਾਂ ਰੋਕ ਕੇ ਬੈਠਣ ਨੂੰ ਮਜਬੂਰ ਹੋਣਗੇ।
ਸ: ਉਗਰਾਹਾਂ ਜਿਨ੍ਹਾਂ ਦਾ ਦਾਅਵਾ ਹੈ ਕਿ 5 ਹਜ਼ਾਰ ਵਾਹਨ ਅਤੇ 2 ਲੱਖ ਲੋਕ ਲੈ ਕੇ ਉਹ ਦਿੱਲੀ ਵੱਲ ਜਾ ਰਹੇ ਹਨ ਅਤੇ ਬੁਰਾੜੀ ਦਾ ਮੈਦਾਨ ਉਨ੍ਹਾਂ ਦੀ ਜੱਥੇਬੰਦੀ ਲਈ ਢੁਕਵਾਂ ਨਹੀਂ ਹੈ ਇਸ ਲਈ ਜੱਥੇਬੰਦੀ ਜੰਤਰ ਮੰਤਰ ’ਤੇ ਧਰਨੇ ਦੀ ਥਾਂ ਲਈ ਮੰਗ ਕਰ ਰਹੀ ਹੈ।
ਕਿਸਾਨ ਆਗੂ ਨੇ ਦਾਅਵਾ ਕੀਤਾ ਕਿ ਉਨ੍ਹਾਂ ਨੂੰ ਆਈ ਫ਼ੋਨ ਕਾਲ ਮੌਕੇ ਸ੍ਰੀ ਅਮਿਤ ਸ਼ਾਹ ਦਾ ਜ਼ੋਰ ਇਸ ਗੱਲ ’ਤੇ ਸੀ ਕਿ ਦਿੱਤੇ ਜਾ ਰਹੇ ਬੁਰਾੜੀ ਗਰਾਊਂਡ ਵਿੱਚ ਹੀ ਕਿਸਾਨ ਆਪਣਾ ਕਾਫ਼ਲਾ ਲੈ ਕੇ ਜਾਣ ਪਰ ਇਹ ਸਾਨੂੰ ਮਨਜ਼ੂਰ ਨਹੀਂ। ਉਹਨਾਂ ਕਿਹਾ ਕਿ ਉਨ੍ਹਾਂ ਨਾਲ ਦਿੱਲੀ ਪੁਲਿਸ ਦੇ ਕਿਸੇ ਆਈ.ਜੀ. ਨੇ ਗੱਲ ਕੀਤੀ ਸੀ, ਜੋ ਕਹਿ ਰਿਹਾ ਸੀ ਕਿ ਜੰਤਰ ਮੰਤਰ ਵਿਖ਼ੇ ਤਾਂ ਕੇਵਲ 300 ਵਿਅਕਤੀ ਬੈਠ ਸਕਦੇ ਹਨ ਜਦਕਿ ਸ੍ਰੀ ਅਮਿਤ ਸ਼ਾਹ ਕਹਿ ਰਹੇ ਸਨ ਕਿ ਜੰਤਰ ਮੰਤਰ ’ਤੇ ਤਾਂ ਕੇਵਲ 2 ਹਜ਼ਾਰ ਵਿਅਕਤੀ ਬੈਠ ਸਕਦੇ ਹਨ। ਉਨ੍ਹਾਂ ਆਖ਼ਿਆ ਕਿ ਜੇ ਕੋਈ ਗੱਲ ਸਿਰੇ ਨਹੀਂ ਚੜ੍ਹਦੀ ਤਾਂ ਉਹ ਦਿੱਲੀ ਬਾਰਡਰ ’ਤੇ ਹੀ ਬੈਠਣਗੇ।
ਇਹ ਪੁੱਛੇ ਜਾਣ ’ਤੇ ਕਿ ਕੀ ਸ੍ਰੀ ਅਮਿਤ ਸ਼ਾਹ ਨਾਲ ਖ਼ੇਤੀ ਕਾਨੂੂੰਨਾਂ, ਬਿਜਲੀ ਸੋਧ ਬਿੱਲ ਜਾਂ ਪਰਾਲੀ ਐਕਟ ਬਾਰੇ ਵੀ ਕੋਈ ਗੱਲ ਹੋਈ ਹੈ, ਸ: ਉਗਰਾਹਾਂ ਨੇ ਸਪਸ਼ਟ ਕੀਤਾ ਕਿ ਇਸ ਬਾਰੇ ਕੋਈ ਗੱਲ ਨਹੀਂ ਹੋਈ, ਅਜੇ ਤਾਂ ਕੇਵਲ ਧਰਨੇ ’ਤੇ ਬੈਠਣ ਵਾਲੀ ਥਾਂ ਬਾਰੇ ਹੀ ਗੱਲ ਹੋਈ ਹੈ।