ਯੈੱਸ ਪੰਜਾਬ
ਜਲੰਧਰ, 30 ਨਵੰਬਰ, 2021:
ਕਾਂਗਰਸ ਹਾਈਕਮਾਨ ਦੇ ਆਦੇਸ਼ ’ਤੇ ਸ: ਨਵਜੋਤ ਸਿੰਘ ਸਿੱਧੂ ਲਈ ਪ੍ਰਦੇਸ਼ ਕਾਂਗਰਸ ਪ੍ਰਧਾਨਗੀ ਦਾ ਰਾਹ ਬੜੀ ਸ਼ਾਇਸਤਗੀ ਨਾਲ ਪੱਧਰਾ ਕਰਨ ਵਾਲੇ ਸ੍ਰੀ ਸੁਨੀਲ ਜਾਖ਼ੜ ਇਸ ਵੇਲੇ ਕਾਂਗਰਸ ਹਾਈਕਮਾਨ ਅਤੇ ਸ: ਨਵਜੋਤ ਸਿੰਘ ਸਿੱਧੂ ਨਾਲ ਨਾਰਾਜ਼ ਚੱਲ ਰਹੇ ਹਨ। ਉਂਜ ਹਾਈਕਮਾਨ ਨਾਲ ਉਨ੍ਹਾਂ ਦਾ ਕੋਈ ਵੱਟ ਦਾ ਰੌਲਾ ਨਹੀਂ ਹੈ, ਹਾਈਕਮਾਨ ਨਾਲ ਨਾਰਾਜ਼ਗੀ ਵੀ ਸ: ਸਿੱਧੂ ਨੂੰ ਲੈ ਕੇ ਹੀ ਹੈ।
ਸ੍ਰੀ ਜਾਖ਼ੜ ਦੀ ਸੋਚ ਸੀ ਕਿ ਜੇ ਉਹ ਕਾਂਗਰਸ ਹਾਈਕਮਾਨ ਦੇ ਕਹਿਣ ’ਤੇ ਸ: ਸਿੱਧੂ ਲਈ ‘ਗਰੇਸਫ਼ੁਲੀ’ ਥਾਂ ਖ਼ਾਲੀ ਕਰਦੇ ਹਨ ਤਾਂ ਨਾ ਕੇਵਲ ਉਹ ਹਾਈਕਮਾਨ ਦੇ ਹੋਰ ‘ਲਾਡਲੇ’ ਹੋ ਜਾਣਗੇ ਸਗੋਂ ਸ: ਸਿੱਧੂ ਅਤੇ ਉਨ੍ਹਾਂ ਦਾ ਧੜਾ ਵੀ ਉਨ੍ਹਾਂ ਦੀ ਇੱਜ਼ਤ ਰੱਖੇਗਾ ਪਰ ਸ੍ਰੀ ਜਾਖ਼ੜ ਦੇ ਨੇੜਲੇ ਸੂਤਰਾਂ ਅਨੁਸਾਰ ਇਨ੍ਹਾਂ ਵਿੱਚੋਂ ਕੁਝ ਵੀ ਨਹੀਂ ਹੋਇਆ।
ਕੈਪਟਨ ਅਮਰਿੰਦਰ ਸਿੰਘ ਨੂੰ ਮੁੱਖ ਮੰਤਰੀ ਦੇ ਅਹੁਦੇ ਤੋਂ ਲਾਂਭੇ ਕਰਕੇ ਮੁੱਖ ਮੰਤਰੀ ਵਾਲਾ ਤਾਜ ਕਿਸੇ ਹੋਰ ਸਿਰ ਸਜਾਉਣ ਦੀ ਗੱਲ ਆਈ ਤਾਂ ਨਾਂਅ ਸ੍ਰੀ ਜਾਖ਼ੜ ਦਾ ਵੀ ਚੱਲਿਆ ਪਰ ਕਈਆਂ ਨਾਂਵਾਂ ’ਤੇ ਵਿਚਾਰਾਂ ਤੋਂ ਬਾਅਦ ਗੁਣਾ ਸ: ਚਰਨਜੀਤ ਸਿੰਘ ਚੰਨੀ ’ਤੇ ਪਿਆ।
ਸ੍ਰੀ ਜਾਖ਼ੜ ਦੇ ਮਨ ਦੀ ਕਸਕ ਇਹ ਰਹੀ ਕਿ ਨਾ ਤਾਂ ਸ: ਸਿੱਧੂ ਨੇ ਉਹਨਾਂ ਦੇ ਨਾਂਅ ਦਾ ਸਮਰਥਨ ਦਿੱਤਾ ਅਤੇ ਕਾਂਗਰਸ ਹਾਈਕਮਾਨ ਨੇ ਵੀ ਸ੍ਰੀਮਤੀ ਅੰਬਿਕਾ ਸੋਨੀ ਦੇ ਤਰਕ ਨੂੰ ਭਾਰ ਦਿੰਦਿਆਂ ਸ੍ਰੀ ਜਾਖ਼ੜ ਦੇ ਨਾਂਅ ਨੂੂੰ ‘ਵੀਟੋ’ ਕਰ ਦਿੱਤਾ।
ਸ੍ਰੀ ਜਾਖ਼ੜ ਤਦ ਤੋਂ ਕਾਂਗਰਸ ਦੇ ਅੰਦਰ ਚੁੱਪ ਰਹਿ ਕੇ ਇਹ ਇੰਤਜ਼ਾਰ ਕਰ ਰਹੇ ਸਨ ਕਿ ਕਾਂਗਰਸ ਹਾਈਕਮਾਨ ਉਨ੍ਹਾਂ ਲਈ ਕੋਈ ਢੁਕਵੀਂ ਭੂਮਿਕਾ ਲੱਭਣ ਦੀ ਕੋਸ਼ਿਸ਼ ਕਰੇਗੀ ਪਰ ਇੰਜ ਵੀ ਨਹੀਂ ਹੋਇਆ।
ਇਸੇ ਦੌਰਾਨ ਸ੍ਰੀ ਜਾਖ਼ੜ ਅਤੇ ਸ: ਸਿੱਧੂ ਵਿਚਾਲੇ ਦੂਰੀਆਂ ਵਧੀਆਂ ਹਨ ਅਤੇ ਇੱਥੇ ਤਕ ਵਧੀਆਂ ਹਨ ਕਿ ਸ੍ਰੀ ਜਾਖ਼ੜ ਟਵੀਟ ਕਰਕੇ ਕੁਝ ਨਾ ਕੁਝ ਕਹਿ ਜਾਂਦੇ ਹਨ ਅਤੇ ਟਵੀਟ ਕਰਨ ਵਾਲੇ ਸ: ਸਿੱਧੂ ਨੇ ਤਾਂ ਇਕ ਪੱਤਰਕਾਰ ਸੰਮੇਲਨ ਵਿੱਚ ਹੀ ਇਹ ਕਹਿ ਦਿੱਤਾ ਕਿ ਸਾਡਾ ਸਾਬਕਾ ਪ੍ਰਧਾਨ ਹੁਣ ਟਵੀਟ ਕਰਦਾ ਹੈ, ਉਹਨੇ ਕਦੇ ਮੁੱਦਿਆਂ ਦੀ ਗੱਲ ਨਹੀਂ ਸੀ ਕੀਤੀ।
ਭਾਵੇਂ ਮੁੱਖ ਮੰਤਰੀ ਸ: ਚਰਨਜੀਤ ਸਿੰਘ ਚੰਨੀ ਅਤੇ ਪ੍ਰਦੇਸ਼ ਕਾਂਗਰਸ ਪ੍ਰਧਾਨ ਸ: ਨਵਜੋਤ ਸਿੰਘ ਸਿੱਧੂ ਦੀ ਸੱਜੇ-ਖੱਬੇ ਖਿੱਚ ਪਾਉਂਦੀ ਗੱਡੀ ਦਾ ਸੰਤੁਲਨ ਬਣਾਈ ਰੱਖਣ ਲਈ ਕਾਂਗਰਸ ਹਾਈਕਮਾਨ ਨੇ ਪਹਿਲੀ ਵਾਰ ਕਿਸੇ ਦੂਜੇ ਸੂਬੇ ਦੇ ਮੰਤਰੀ ਦੇ ਅਹੁਦੇ ਤੋਂ ਅਸਤੀਫ਼ਾ ਦੁਆ ਕੇ ਪੰਜਾਬ ਕਾਂਗਰਸ ਮਾਮਲਿਆਂ ਦੇ ਇੰਚਾਰਜ ਨੂੰ ਡੈਪੂਟੇਸ਼ਨ ’ਤੇ ਹੀ ਨਹੀਂ ਭੇਜਿਆ ਸਗੋਂ ਪੱਕੇ ਚੰਡੀਗੜ੍ਹ ਵਾਸੀ ਬਣਾ ਦਿੱਤਾ ਹੈ ਪਰ ਇਸ ਸਭ ਦੇ ਬਾਵਜੂਦ ਚੰਨੀ-ਸਿੱਧੂ ਦੀ ਜੋੜੀ ਬਣਦੀ ਨਜ਼ਰ ਨਹੀਂ ਆ ਰਹੀ ਜਿਸ ਨਾਲ ਪਾਰਟੀ ਦੇ ਕੈਡਰ ਵਿੱਚ ਭੰਬਲਭੂਸੇ ਵਾਲੀ ਸਥਿਤੀ ਹੈ।
ਸ੍ਰੀ ਜਾਖ਼ੜ ਵੱਲੋਂ ਮੰਗਲਵਾਰ ਕੀਤਾ ਗਿਆ ਟਵੀਟ ‘” Your monkey , your circus ” 9 follow this dictum – neither suggest anything nor interfere in other’s ‘show’ ! ਬੜਾ ਮਹੱਤਵਪੂਰਨ ਹੈ।
ਇਸ ਟਵੀਟ ਦਾ ਪੰਜਾਬੀ ਤਰਜਮਾ ਇਹੀ ਹੋਵੇਗਾ ਕਿ ‘‘ਤੁਹਾਡੇ ਬਾਂਦਰ, ਤੁਹਾਡੀ ਸਰਕਸ’, ਮੈਂ ਇਸ ਸਿਧਾਂਤ ’ਤੇ ਹੀ ਚਲਦਾ ਹਾਂਕਿ ਕਿਸੇ ਹੋਰ ਦੇ ਸ਼ੋਅ ਵਿੱਚ ਨਾ ਤਾਂ ਕੋਈ ਸੁਝਾਅ ਦਿਓ ਅਤੇ ਨਾ ਹੀ ਦਖ਼ਲਅੰਦਾਜ਼ੀ ਕਰੋ।’
ਜਾਣਕਾਰ ਸੂਤਰਾਂ ਦਾ ਕਹਿਣਾ ਹੈ ਕਿ ਉਕਤ ਟਵੀਟ ਤਾਂ ਥੋੜ੍ਹਾ ਦੇਰੀ ਨਾਲ ਆਇਆ ਹੈ। ਸ੍ਰੀ ਜਾਖ਼ੜ ਇਸ ਤੋਂ ਪਹਿਲਾਂ ਹੀ ਪਾਰਟੀ ਹਾਈਕਮਾਨ ਨੂੰ ਸਪਸ਼ਟ ਕਰ ਚੁੱਕੇ ਹਨ ਕਿ ਮੌਜੂਦਾ ਹਾਲਾਤ ਵਿੱਚ ਉਹ 2022 ਦੀਆਂ ਚੋਣਾਂ ‘ਪੈਵੀਲੀਅਨ’ ਵਿੱਚ ਬੈਠ ਕੇ ਹੀ ਵੇਖ਼ਣਗੇ।
ਯੈੱਸ ਪੰਜਾਬ ਦੀਆਂ ਅਹਿਮ ਖ਼ਬਰਾਂ ਦੇ ਅਪਡੇਟਸ ਲਈ ਇੱਥੇ ਕਲਿੱਕ ਕਰਕੇ ਸਾਡੇ ਟੈਲੀਗਰਾਮ ਚੈਨਲ ਨਾਲ ਜੁੜੋ
