ਯੈੱਸ ਪੰਜਾਬ
ਚੰਡੀਗੜ੍ਹ, 17 ਜਨਵਰੀ, 2022:
ਪੰਜਾਬ ਵਿੱਚ ਕਾਂਗਰਸ ਦਾ ਮੁੱਖ ਮੰਤਰੀ ਦਾ ਚਿਹਰਾ ਕੌਣ ਹੋਵੇਗਾ? ਕੀ ਕਾਂਗਰਸ ਨੇ ਅੱਜ ਮੁੱਖ ਮੰਤਰੀ ਦੇ ਚਿਹਰੇ ਬਾਰੇ ਕੋਈ ਇਸ਼ਾਰਾ ਦੇ ਦਿੱਤਾ ਹੈ?
ਤਿੰਨ ਚਿਹਰੇ ਤਾਂ ਹੁਣ ਤਕ ਸਪਸ਼ਟ ਤੌਰ ’ਤੇ ਪੇਸ਼ ਕਰਕੇ ਸਾਂਝੀ ਲੀਡਰਸ਼ਿਪ ਦੀ ਗੱਲ ਕੀਤੀ ਜਾ ਰਹੀ ਹੈ ਜਦਕਿ ਕੁਝ ਹੋਰ ਵੀ ਸੀਨੀਅਰ ਆਗੂ ਕਤਾਰ ਵਿੱਚ ਹਨ ਅਤੇ ਜੇ ‘ਦਾਅ’ ਲੱਗਣ ਵਾਲੀ ਗੱਲ ਆਵੇ ਤਾਂ ਗੁਣਾ ਉਨ੍ਹਾਂ ਵਿੱਚੋਂ ਕਿਸੇ ’ਤੇ ਵੀ ਪੈ ਸਕਦਾ ਸਮਝਿਆ ਜਾਂਦਾ ਹੈ।
ਜਿਹੜੇ ਤਿੰਨਾਂ ਨੂੰ ਕਾਂਗਰਸ ਦੇ ਕੌਮੀ ਬੁਲਾਰੇ ਮੁੱਖ ਮੰਤਰੀ ਦਾ ਚਿਹਰਾ ਪੁੱਛੇ ਜਾਣ ’ਤੇ ਪੇਸ਼ ਕਰਦੇ ਹਨ ਉਨ੍ਹਾਂ ਵਿੱਚ ਮੁੱਖ ਮੰਤਰੀ ਸ: ਚਰਨਜੀਤ ਸਿੰਘ ਚੰਨੀ, ਪ੍ਰਦੇਸ਼ ਕਾਂਗਰਸ ਪ੍ਰਧਾਨ ਸ: ਨਵਜੋਤ ਸਿੰਘ ਸਿੱਧੂ ਅਤੇ ਸਾਬਕਾ ਪ੍ਰਦੇਸ਼ ਕਾਂਗਰਸ ਪ੍ਰਧਾਨ ਸ੍ਰੀ ਸੁਨੀਲ ਜਾਖ਼ੜ ਨੂੰ ਮੰਨਿਆ ਜਾ ਰਿਹਾ ਹੈ।
ਅਜੇ ਤਕ ਕਹਾਣੀ ਇੰਜ ਹੀ ਚੱਲ ਰਹੀ ਹੈ ਕਿ ਪਾਰਟੀ ਕਿਸੇ ਵੀ ਇਕ ਇਕੱਲੇ ਆਗੂ ਦਾ ਨਾਂਅ ਅੱਗੇ ਕਰਨ ਤੋਂ ਕਤਰਾ ਰਹੀ ਹੈ ਅਤੇ ਪੰਜਾਬ ਕਾਂਗਰਸ ਦੇ ਵੱਡੇ ਆਗੂਆਂ ਵੱਲੋਂ ਵੀ ਇਹੀ ਕਿਹਾ ਜਾ ਰਿਹਾ ਹੈ ਕਿ ਕਾਂਗਰਸ ਨੇ ਪਿਛਲੀ ਵਾਰ ਕੈਪਟਨ ਅਮਰਿੰਦਰ ਸਿੰਘ ਨੂੰ ਚਿਹਰਾ ਐਲਾਨ ਕੇ ਚੋਣ ਲੜਨ ਤੋਂ ਇਲਾਵਾ ਕਦੇ ਮੁੱਖ ਮੰਤਰੀ ਦਾ ਚਿਹਰਾ ਪੇਸ਼ ਕਰਕੇ ਚੋਣ ਨਹੀਂ ਲੜੀ।
ਇਸ ਦੇ ਉਲਟ ਪ੍ਰਦੇਸ਼ ਕਾਂਗਰਸ ਪ੍ਰਧਾਨ ਸ: ਨਵਜੋਤ ਸਿੰਘ ਸਿੱਧੂ ਬਹੁਤ ਹੀ ਖੁਲ੍ਹ ਕੇ ਆਪਣੇ ਆਪ ਨੂੰ ਮੁੱਖ ਮੰਤਰੀ ਦੇ ਚਿਹਰੇ ਵਜੋਂ ਪੇਸ਼ ਕਰਦੇ ਨਜ਼ਰ ਆਉਂਦੇ ਹਨ। ਭਾਵੇਂ ਉਹ ਕਿਸੇ ਵੇਲੇ ਇਹ ਵੀ ਕਹਿ ਜਾਂਦੇ ਹਨ ਕਿ ਉਹ ਕਿਸੇ ਦੌੜ ਵਿੱਚ ਨਹੀਂ ਹਨ, ਪਰ ਹੁਣ ਉਨ੍ਹਾਂ ਦੀ ਰੋਜ਼ ਦੀ ਬੋਲ ਬਾਣੀ ਤੋਂ ਇਹ ਸਪਸ਼ਟ ਹੈ ਕਿ ਉਹ ਆਪਣਾ ਨਾਂਅ ਅੱਗੇ ਕਰ ਰਹੇ ਹਨ। ਕਈ ਵਾਰ ਤਾਂ ਉਹ ਹਾਈਕਮਾਨ ਨੂੰ ਇਹ ਸਮਝਾਉਂਦੇ ਵੀ ਨਜ਼ਰ ਆਉਂਦੇ ਹਨ, ਕਿ ਫ਼ਿਰ ਵੇਖ਼ ਲਿਓ! ਉੱਧਰ ਪਿਛਲੇ ਦਿਨਾਂ, ਭਾਵ ਚੋਣ ਜ਼ਾਬਤਾ ਲੱਗਣ ਤੋਂ ਬਾਅਦ ਸ: ਚੰਨੀ ਵੀ ਆਪਣੇ ਕੀਤੇ ਕੰਮਾਂ ਦਾ ਹਵਾਲਾ ਦੇ ਕੇ ਆਪਣੇ ਆਪ ਨੂੰ ਮੁੱਖ ਮੰਤਰੀ ਦੇ ਚਿਹਰੇ ਵਜੋਂ ਪੇਸ਼ ਕਰਦੇ ਨਜ਼ਰ ਆਉਂਦੇ ਹਨ।
ਪਰ ਅੱਜ ਕੁਝ ਐਸਾ ਹੋਇਆ ਹੈ, ਜਿਸ ਨੂੰ ਆਧਾਰ ਬਣਾ ਕੇ ਜੇ ਕਿਸੇ ਪੱਕੀ ਗੱਲ ’ਤੇ ਨਹੀਂ ਪਹੁੰਚਿਆ ਜਾ ਸਕਦਾ ਤਾਂ ਅੰਦਾਜ਼ਾ ਲਗਾਉਣ ਤੋਂ ਪਿਛਾਂਹ ਵੀ ਨਹੀਂ ਰਿਹਾ ਜਾ ਸਕਦਾ। ਕਿਉਂਕਿ ਆਧਾਰ ਪੰਜਾਬ ਵਿੱਚ ਕਿਸੇ ਕਾਂਗਰਸ ਆਗੂ ਜਾਂ ਕਿਸੇ ਸੂਤਰ ਦੀ ਆਖ਼ੀ ਕੋਈ ਗੱਲ ਨਹੀਂ ਹੈ ਸਗੋਂ ਖ਼ੁਦ ਕਾਂਗਰਸ ਪਾਰਟੀ ਵੱਲੋਂ ਆਪਣੇ ਕੌਮੀ ਟਵਿੱਟਰ ਖ਼ਾਤੇ ਤੋਂ ਟਵੀਟ ਕੀਤਾ ਇਕ ਵੀਡੀਓ ਹੈ ਜਿਸ ਵਿੱਚ ਸੋਨੂੰ ਸੂਦ ਦੀਆਂ ਕਹੀਆਂ ਕੁਝ ਗੱਲਾਂ ਬਹੁਤ ਹੀ ਮਹੱਤਵਪੂਰਨ ਹਨ।
ਇਸ ਵੀਡੀਓ ਵਿੱਚ ਸੋਨੂੰ ਸੂਦ ਕਹਿੰਦੇ ਹਨ, ‘‘ਅਸਲੀ ਚੀਫ਼ ਮਨਿਸਟਰ ਵੋ, ਯਾ ਅਸਲੀ ਰਾਜਾ ਵੋ, ਜਿਸ ਕੋ ਜ਼ਬਰਦਸਤੀ ਕੁਰਸੀ ਪੇ ਲੇ ਕੇ ਆਇਆ ਜਾਏ, ਉਸਕੋ ਸਟਰੱਗਲ ਨਹੀਂ ਕਰਨੀ ਪੜੇ, ਉਸਕੋ ਬਤਾਨਾ ਨਹੀਂ ਪੜੇ ਕਿ ਮੈਂ ਚੀਫ਼ ਮਨਿਸਟਰ ਕੈਂਡੀਡੈਂਟ ਹੂੰ, ਮੈਂ ਡਿਜ਼ਰਵ ਕਰਤਾ ਹੂੰ, ਵੋ ਐਸਾ ਹੋਣਾ ਚਾਹੀਏ, ਜੋ ਬੈੱਕ ਬੈਂਚਰ ਹੋ ਔਰ ਉਸਕੋ ਪੀਛੇ ਸੇ ਉਠਾ ਕੇ ਲਾਏਂ ਔਰ ਬੋਲੇਂ ਕਿ ਤੂੰ ਡਿਜ਼ਰਵ ਕਰਤਾ ਹੈ, ਤੂ ਬਣ, ਵੋ ਜੋ ਬਣੇਗਾ ਵੋ ਦੇਸ਼ ਬਦਲ ਸਕਤਾ ਹੈ।’’
36 ਸੈਕਿੰਡ ਦੇ ਵੀਡੀਓ ਦੀ ਅਸਲ ਕਹਾਣੀ ਇਹ ਹੈ ਕਿ ਇਹ ਵੀਡੀਓ ਸਿੱਧੇ ਤੌਰ ’ਤੇ ਕੁਲ ਹਿੰਦ ਕਾਂਗਰਸ ਪਾਰਟੀ ਵੱਲੋਂ ਆਪਣੇ ਟਵਿੱਟਰ ਹੈਂਡਲ ’ਤੇ ਖ਼ੁਦ ਪੋਸਟ ਕੀਤਾ ਗਿਆ ਹੈ, ਕਿਸੇ ਦੇ ਵੀਡੀਓ ਨੂੰ ਰੀਟਵੀਟ ਨਹੀਂ ਕੀਤਾ ਗਿਆ।
ਇਸ ਵਿਚਲੀ ਹੋਰ ਵੀ ਵੱਡੀ ਗੱਲ ਇਹ ਹੈ ਕਿ ਸ: ਚੰਨੀ ਦੀ ਸ਼ਖਸ਼ੀਅਤ ਨਾਲ ਢੁਕਦੇ ਸੋਨੂੰ ਸੂਦ ਦੇ ਬੋਲਾਂ ਵਾਲੇ ਮਾਤਰ 36 ਸੈਕਿੰਡ ਦੇ ਵੀਡੀਓ ਵਿੱਚ ਕੇਵਲ ਤੇ ਕੇਵਲ ਸ: ਚੰਨੀ ਦੇ ਲਗਪਗ 8 ਵੱਖ ਵੱਖ ਸ਼ਾਟਸ ਲਗਾਏ ਗਏ ਹਨ ਅਤੇ ਕਿਸੇ ਹੋਰ ਆਗੂ ਦੀ ਕੋਈ ਤਸਵੀਰ ਨਹੀਂ ਵਿਖ਼ਾਈ ਗਈ ਹੈ।
बोल रहा पंजाब, अब पंजे के साथ- मजबूत करेंगे हर हाथ। pic.twitter.com/qQOZpnKItd
— Congress (@INCIndia) January 17, 2022
ਯੈੱਸ ਪੰਜਾਬ ਦੀਆਂ ਅਹਿਮ ਖ਼ਬਰਾਂ ਦੇ ਅਪਡੇਟਸ ਲਈ ਇੱਥੇ ਕਲਿੱਕ ਕਰਕੇ ਸਾਡੇ ਟੈਲੀਗਰਾਮ ਚੈਨਲ ਨਾਲ ਜੁੜੋ