ਯੈੱਸ ਪੰਜਾਬ
ਲੁਧਿਆਣਾ, 16 ਮਈ, 2021:
ਜਿਸ ਵੇਲੇ ਕੋਰੋਨਾ ਦੀ ਮਹਾਂਮਾਰੀ ਦੇ ਪ੍ਰਕੋਪ ਦੇ ਮੱਦੇਨਜ਼ਰ ਪੰਜਾਬ ਵਿੱਚ ਵੀਕੈਂਡ ਲਾਕਡਾਊਨ ਲਾਗੂ ਹੈ, ਉਸ ਵੇਲੇ ਐਤਵਾਰ ਸਵੇਰੇ ਲੁਧਿਆਣਾ ਵਿੱਚ ਵਾਪਰੀ ਇਕ ਘਟਨਾ ਨੇ ਇਹ ਸਾਬਿਤ ਕਰ ਦਿੱਤਾ ਹੈ ਕਿ ਸਾਰੀਆਂ ਪਾਬੰਦੀਆਂ ਅਤੇ ਕਾਇਦੇ ਕੇਵਲ ਆਮ ਲੋਕਾਂ ਲਈ ਹਨ ਨਾ ਕਿ ਰਾਜਸੀ ਆਗੂਆਂ ਲਈ।
ਲੋਕ ਇਨਸਾਫ਼ ਪਾਰਟੀ ਦੇ ਪ੍ਰਧਾਨ ਅਤੇ ਵਿਧਾਇਕ ਸ: ਸਿਮਰਜੀਤ ਸਿੰਘ ਬੈਂਸ ਅਤੇ ਯੂਥ ਅਕਾਲੀ ਦਲ ਲੁਧਿਆਣਾ ਦੇ ਪ੍ਰਧਾਨ ਸ: ਗੁਰਦੀਪ ਸਿੰਘ ਗੋਸ਼ਾ ਦੀ ਅਗਵਾਈ ਵਿੱਚ ਲੋਕ ਇਨਸਾਫ਼ ਪਾਰਟੀ ਅਤੇ ਸ਼੍ਰੋਮਣੀ ਅਕਾਲੀ ਦਲ ਦੇ ਵਰਕਰ ਆਹਮੋ ਸਾਹਮਣ ਹੋ ਗਏ। ਇਸ ਮਾਮਲੇ ਵਿੱਚ ਸ: ਬੈਂਸ ਅਤੇ ਸ: ਗੋਸ਼ਾ ਤੋਂ ਲੈ ਕੇ ਬਾਕੀ ਵਰਕਰਾਂ ਵਿਚਾਲੇ ਹੱਥੋਪਾਈ ਹੋਈ ਅਤੇ ਘੱਟੋ ਘੱਟ ਇਕ ਵਰਕਰ ਦੀ ਪੱਗ ਵੀ ਲੱਥੀ।
ਇਸ ਘਟਨਾ ਦੌਰਾਨ ਗਾਲ੍ਹ ਮੰਦਾ ਵਰਿ੍ਹਆ, ਲਲਕਾਰੇ ਮਾਰੇ ਗਏ ਅਤੇ ਹੱਥੋਂ ਪਾਈ ਵਿੱਚ ਕੁਝ ਲੋਕ ਮਾਮੂਲੀ ਜ਼ਖ਼ਮੀ ਹੋਏ ਜਦਕਿ ਕੋਰੋਨਾ ਨਿਯਮਾਂ ਦੀਆਂ ਵੀ ਧੱਜੀਆਂ ਉਡਾਈਆਂ ਗਈਆਂ। ਇਸ ਬਾਰੇ ਵਾਇਰਲ ਹੋਏ ਵੀਡੀਓ ਵਿੱਚ ਸ:ਬੈਂਸ ਅਤੇ ਸ: ਗੋਸ਼ਾ ਸਣੇ ਵਧੇਰੇ ਲੋਕ ਬਿਨਾਂ ਕਿਸੇ ਮਾਸਕ ਦੇ ਨਜ਼ਰ ਆਏ ਜਦਕਿ ਕੁਝ ਇਕ ਪੁਲਿਸ ਕਰਮੀ ਟਕਰਾਅ ਨੂੰ ਟਾਲਣ ਦੀ ਕੋਸ਼ਿਸ਼ ਕਰਦੇ ਨਜ਼ਰ ਆਏ ਜਿਸ ਵਿੱਚ ਉਹ ਸਫ਼ਲ ਨਹੀਂ ਹੋਏ। ਇਕ ਵੀਡੀਓ ਵਿੱਚ ਸ: ਬੈਂਸ ਅਤੇ ਉਨ੍ਹਾਂ ਦੇ ਸਾਥੀਆਂ ਵੱਲੋਂ ਲਲਕਾਰੇ ਜਾਣ ਮਗਰੋਂ ਅਕਾਲੀ ਮੌਕੇ ਤੋਂ ਖਿਸਕਦੇ ਵੀ ਨਜ਼ਰ ਆਏ।
ਮਾਮਲਾ ਕੋਟ ਮੰਗਲ ਸਿੰਘ ਦੀ ਮੇਨ ਮਾਰਕੀਟ ਨੇੜੇ ਮੰਦਰ ਵਾਲੀ ਗਲੀ ਦਾ ਹੈ ਜਿੱਥੇ ਸ: ਬੈਂਸ ਆਪਣੇ ਸਮਰਥਕਾਂ ਨਾਲ ਉਦਘਾਟਨ ਕਰਨ ਪਹੁੰਚੇ ਤਾਂ ਸ: ਗੋਸ਼ਾ ਅਤੇ ਉਨ੍ਹਾਂ ਦੇ ਸਾਥੀ ਵੀ ਮੌਕੇ ’ਤੇ ਪਹੁੰਚ ਗਏ ਜਿਨ੍ਹਾਂ ਨੇ ਇਸ ਉਦਘਾਟਨ ’ਤੇ ਇਤਰਾਜ਼ ਜਤਾਇਆ।
ਸ: ਬੈਂਸ ਵੱਲੋਂ ਉਦਘਾਟਨ ਕੀਤੇ ਜਾਣ ਸੰਬੰਧੀ ਪਹਿਲਾਂ ਹੀ ਪਤਾ ਹੋਣ ਕਰਕੇ ਸ: ਗੋਸ਼ਾ ਇਹ ਇਤਰਾਜ਼ ਲੈ ਕੇ ਮੌਕੇ ’ਤੇ ਪੁੱਜੇ ਸਨ ਕਿ ਇਸ ਸੜਕ ਦੇ ਪ੍ਰਾਜੈਕਟ ਦੀ ਸ਼ੁਰੂਆਤ ਉਸ ਵੇਲੇ ਦੇ ਲੁਧਿਆਣਾ ਦੇ ਮੇਅਰ ਸ: ਹਰਚਰਨ ਸਿੰਘ ਗੋਹਲਵੜੀਆ ਵੱਲੋਂ 2016 ਵਿੱਚ ਕੀਤੀ ਗਈ ਸੀ ਇਸ ਲਈ ਸ: ਬੈਂਸ ਨੂੰ ਇਸ ਸੜਕ ਦੇ ਉਦਘਾਟਨ ਦਾ ਕੋਈ ਹੱਕ ਨਹੀਂ ਹੈ। ਉਨ੍ਹਾਂ ਇਹ ਵੀ ਦਾਅਵਾ ਕੀਤਾ ਕਿ ਸ: ਬੈਂਸ ਪਹਿਲਾਂ ਵੀ ਦੋ ਵਾਰ ਇਸ ਸੜਕ ਦਾ ਉਦਘਾਟਨ ਕਰ ਚੁੱਕੇ ਹਨ।
ਉੱਧਰ ਸ: ਬੈਂਸ ਦਾ ਕਹਿਣਾ ਹੈ ਕਿ ਲੋਕਾਂ ਦੇ ਨਕਾਰੇ ਹੋਏ ਅਕਾਲੀਆਂ ਨੂੰ ਇਸ ਗੱਲ ਦਾ ਕੋਈ ਹੱਕ ਨਹੀਂ ਹੈ ਕਿ ਉਹ ਇਸ ਤਰ੍ਹਾਂ ਉਨ੍ਹਾਂ ਦੇ ਕੰਮ ਵਿੱਚ ਬਖ਼ੇੜੇ ਖੜ੍ਹੇ ਕਰਨ। ਉਹਨਾਂ ਕਿਹਾ ਕਿ ਜਿਹੜੇ ਮੇਅਰ ਦੀ ਗੋਸ਼ਾ ਗੱਲ ਕਰ ਰਹੇ ਹਨ, ਉਹ 3000 ਤੋਂ ਵੱਧ ਵੋਟਾਂ ਨਾਲ ਹਾਰ ਚੁੱਕੇ ਹਨ।
ਇਸ ਤੋਂ ਬਾਅਦ ਦੋਹਾਂ ਧਿਰਾਂ ਵੱਲੋਂ ਇਕ ਦੂਜੇ ’ਤੈ ਇਲਜ਼ਾਮਬਾਜ਼ੀ ਦਾ ਦੌਰ ਜਾਰੀ ਹੈ ਜਦਕਿ ਖ਼ਬਰ ਹੈ ਕਿ ਸ: ਗੋਸ਼ਾ ਇਸ ਮਾਮਲੇ ਦੀ ਸ਼ਿਕਾਇਤ ਕਰਨ ਲਈ ਸ਼ੇਰਪੁਰ ਪੁਲਿਸ ਥਾਣੇ ਪੁੱਜੇ ਹਨ।
ਯੈੱਸ ਪੰਜਾਬ ਦੀਆਂ ਅਹਿਮ ਖ਼ਬਰਾਂ ਦੇ ਅਪਡੇਟਸ ਲਈ ਇੱਥੇ ਕਲਿੱਕ ਕਰਕੇ ਸਾਡੇ ਟੈਲੀਗਰਾਮ ਚੈਨਲ ਨਾਲ ਜੁੜੋ