ਯੈੱਸ ਪੰਜਾਬ
ਜਲੰਧਰ, 15 ਸਤੰਬਰ, 2021:
ਭਾਰਤੀ ਕਿਸਾਨ ਯੂਨੀਅਨ (ਲੱਖੋਵਾਲ) ਦੇ ਇਸਤਰੀ ਵਿੰਗ ਦੀ ਸਲਾਹਕਾਰ ਬੀਬੀ ਰਾਜਵਿੰਦਰ ਕੌਰ ਰਾਜੂ ਨੇ ਪੰਜਾਬ ਭਾਜਪਾ ਵਿੱਚ ਤਾਜ਼ਾ ਸ਼ਾਮਲ ਹੋਏ ਆਲ ਇੰਡੀਆ ਸਿੱਖ ਸਟੂਡੈਂਟਸ ਫੈਡਰੇਸ਼ਨ ਦੇ ਸਾਬਕਾ ਖ਼ਾਲਿਸਤਾਨੀ ਹਰਿੰਦਰ ਕਾਹਲੋਂ ਵੱਲੋਂ ਹੱਕੀ ਮੰਗਾਂ ਲਈ ਮੋਦੀ ਸਰਕਾਰ ਵਿਰੁੱਧ ਅੰਦੋਲਨ ਕਰ ਰਹੇ ਕਿਸਾਨਾਂ ਖ਼ਿਲਾਫ਼ ਬੇਹੱਦ ਅਭੱਦਰ ਤੇ ਨਿੰਦਣਯੋਗ ਭਾਸ਼ਾ ਵਰਤਣ ਦਾ ਸਖ਼ਤ ਨੋਟਿਸ ਲੈਂਦਿਆਂ ਕਿਹਾ ਹੈ ਕਿ ਦੇਸ਼ ਦੇ ਅੰਨਦਾਤਿਆਂ ਨੂੰ ਡਾਂਗਾਂ ਨਾਲ ਕੁੱਟਣ ਤੋਂ ਪਹਿਲਾਂ ਇਸ ਨਵੇਂ ਸਜੇ ਭਾਜਪਾਈ ਨੂੰ ਦੂਜੀ ਵਾਰ ਕੁੱਖ ਤੋਂ ਜਨਮ ਲੈਣਾ ਪਵੇਗਾ।
ਇੱਕ ਬਿਆਨ ਵਿੱਚ ਮਹਿਲਾ ਕਿਸਾਨ ਨੇਤਾ ਨੇ ਕਿਹਾ ਕਿ ਤਿੰਨ ਦਹਾਕੇ ਪਹਿਲਾਂ ਚੱਲੇ ਸੰਘਰਸ਼ ਦੌਰਾਨ ਫੈਡਰੇਸ਼ਨ ਅਤੇ ਕੌਮ ਨਾਲ ਦੋਗਲੀਆਂ ਚਾਲਾਂ ਰਾਹੀਂ ਦਗਾ ਕਮਾਉਣ ਪਿੱਛੋਂ ਆਖਰੀ ਉਮਰੇ ਖ਼ਾਲਿਸਤਾਨੀ ਚੋਲਾ ਲਾਹ ਕੇ ਭਾਜਪਾ ਵਿੱਚ ਸ਼ਾਮਲ ਹੋਏ ਇਸ ਭਗਵੇਂ ਬਲੈਕ ਕੈਟ ਦੀ ਬਿੱਲੀ ਥੈਲਿਓਂ ਬਾਹਰ ਆ ਚੁੱਕੀ ਹੈ ਅਤੇ ਇਹ ਬੁਜ਼ਰਗ ਭਾਜਪਾਈ ਅਜਿਹੀ ਉਕਸਾਹਟ ਭਰੀ ਹੋਛੀ ਭਾਸ਼ਨਬਾਜ਼ੀ ਕਰਨ ਤੋਂ ਪਹਿਲਾਂ ਜ਼ਰੂਰ ਆਪਣੇ ਚਰਚਿਤ ਪਿਛੋਕੜ ਉਤੇ ਝਾਤ ਮਾਰਦਿਆਂ ਆਪਣੀ ਪੀੜ੍ਹੀ ਥੱਲੇ ਸੋਟਾ ਫੇਰ ਲਵੇ ਕਿਉਂਕਿ ਸ਼ੀਸ਼ਿਆਂ ਦੇ ਘਰਾਂ ਵਿੱਚ ਰਹਿਣ ਵਾਲੇ ਦੂਜਿਆਂ ਦੇ ਘਰਾਂ ਉਤੇ ਪੱਥਰ ਨਹੀਂ ਮਾਰਦੇ।
ਕਿਸਾਨ ਨੇਤਾ ਬੀਬੀ ਰਾਜਵਿੰਦਰ ਕੌਰ ਰਾਜੂ ਨੇ ਚਿਤਾਵਨੀ ਦਿੰਦਿਆਂ ਕਿਹਾ ਕਿ ਸੰਤ ਜਰਨੈਲ ਸਿੰਘ ਭਿੰਡਰਾਂਵਾਲੇ ਦਾ ਖਾਸਮਖਾਸ ਰਿਹਾ ਇਹ ਸਾਬਕਾ ਖਾਲਿਸਤਾਨੀ ਆਪਣੀ ਨਵੀਂ ਪਾਰਟੀ ਦੇ ਗਵਾਂਢੀ ਰਾਜ ਦੇ ਮੁੱਖੀ ਵੱਲੋਂ ਹਰਿਆਣੇ ਦੇ ਕਿਸਾਨ ਭਰਾਵਾਂ ਉੱਤੇ ਕਰਨਾਲ ਵਿੱਚ ਕੀਤੇ ਲਾਠੀਚਾਰਜ ਦੇ ਹਸ਼ਰ ਦਾ ਨਤੀਜਾ ਪੜ੍ਹ ਲਵੇ ਕਿ ਕਿਵੇਂ ਪਿਛਲੇ ਹਫ਼ਤੇ ਇੱਕ ਹੰਕਾਰੀ ਮੁੱਖ ਮੰਤਰੀ ਨੂੰ ਆਖਰਕਾਰ ਹੱਠ ਛੱਡ ਕੇ ਕਿਸਾਨਾਂ ਦੀ ਤਾਕਤ ਅੱਗੇ ਝੁਕਣਾ ਪਿਆ ਸੀ।
ਮਹਿਲਾ ਕਿਸਾਨ ਆਗੂ ਨੇ ਤੰਜ ਕੱਸਦਿਆਂ ਆਖਿਆ ਕਿ ਕਈ ਪਾਰਟੀਆਂ ਬਦਲ ਕੇ ਆਪਣੀ ਜ਼ਮੀਰ ਮਾਰ ਚੁੱਕਾ ਇਹ ਬਜ਼ੁਰਗ ਕਾਹਲੋਂ ਭਾਜਪਾ ਤੋਂ ਕੋਈ ਹੋਰ ਵੱਡਾ ਅਹੁਦਾ ਜਾਂ ਟਿਕਟ ਲੈਣ ਦੀ ਲਾਲਸਾ ਦੇ ਮੱਦੇਨਜ਼ਰ ਹਮਖਿਆਲੀ ਭਾਜਪਾਈ ਆਗੂਆਂ ਅੱਗੇ ਤੱਤੇ-ਤੱਤੇ ਲੱਛੇਦਾਰ ਭਾਸ਼ਨਾਂ ਨਾਲ ਖੁਸ਼ਨੂਦੀ ਬਨਣ ਦੇ ਦੰਭੀ ਕਾਰਨਾਮੇ ਨਾ ਕਰੇ ਕਿਉਂਕਿ ਇਸ ਦੋਗਲੇ ਕਿਰਦਾਰ ਵਾਲੇ ਸਾਬਕਾ ਖ਼ਾਲਿਸਤਾਨੀ ਦੇ ਪੋਤੜਿਆਂ ਬਾਰੇ ਸਾਰਾ ਜਗਤ ਬਹੁਤ ਕੁੱਝ ਜਾਣਦਾ ਹੈ ਪਰ ਅਜਿਹੇ ਭੜਕਾਹਟ ਵਾਲੇ ਬਿਆਨਾਂ ਨਾਲ ਪੁਲਿਸ ਦੀ ਸੁਰੱਖਿਆ ਛਤਰੀ ਜ਼ਰੂਰ ਲੈ ਲਵੇਗਾ।
ਉਨ੍ਹਾਂ ਨੇ ਸਿੱਖ ਸਟੂਡੈਂਟਸ ਫੈਡਰੇਸ਼ਨ ਦੇ ਸਾਬਕਾ ਪ੍ਰਧਾਨ ਤੋਂ ਭਾਜਪਾਈ ਬਣੇ ਕਾਹਲੋਂ ਨੂੰ ਚੈਲੇਂਜ ਕੀਤਾ ਕਿ ਉਹ ਕਾਲੇ ਖੇਤੀ ਕਾਨੂੰਨਾਂ ਉਤੇ ਬਹਿਸ ਕਰਨ ਲਈ ਆਪਣੀ ਮਰਜ਼ੀ ਦਾ ਸਮਾਂ, ਸਥਾਨ ਅਤੇ ਦਿਨ ਦੱਸੇ, ਉਹ ਮੋਦੀ ਵੱਲੋਂ ਖੇਤੀ ਕਾਨੂੰਨ ਲਾਗੂ ਕਰਨ ਦੇ ਮਾੜੇ ਮਨਸੂਬੇ ਤੇ ਇੰਨਾਂ ਕਾਨੂੰਨਾਂ ਵਿਚਲੀਆਂ ਢੇਰ ਸਾਰੀਆਂ ਖਾਮੀਆਂ ਦੱਸਦਿਆਂ ਉਸ ਦੀ ਸੌੜੀ ਸੋਚ ਦਾ ਜਨਾਜ਼ਾ ਕੱਢ ਕੇ ਸਹੀ ਅਰਥਾਂ ਵਿੱਚ ਕਾਨੂੰਨ ਪੜਨ ਲਈ ਉਸ ਦੀਆਂ ਅੱਖਾਂ ਤੋਂ ਕਾਲਾ ਮੋਤੀਆ ਵੀ ਲਾਹ ਦੇਣਗੇ।
ਨਾਲ ਹੀ ਮਹਿਲਾ ਕਿਸਾਨ ਆਗੂ ਨੇ ਸਮੁੱਚੇ ਪੰਜਾਬੀਆਂ ਖ਼ਾਸ ਕਰਕੇ ਦੰਭੀ ਕਾਹਲੋਂ ਦੇ ਨਜ਼ਦੀਕੀਆਂ ਅਤੇ ਸਾਕ-ਸਬੰਧੀਆਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਢਲਦੀ ਉਮਰੇ ‘ਮੋਦੀ ਪ੍ਰੇਮ’ ਵਿੱਚ ਰੰਗੇ ਇਸ ਕਿਸਾਨ-ਮਜ਼ਦੂਰ ਤੇ ਪੰਜਾਬ ਵਿਰੋਧੀ ਬੰਦੇ ਦਾ ਸਮਾਜਿਕ ਬਾਈਕਾਟ ਕਰਕੇ ਇਸ ਨਾਲ ਕੋਈ ਨਾਤਾ-ਰਿਸ਼ਤਾ ਨਾ ਰੱਖਣ।
ਉਨ੍ਹਾਂ ਆਖਿਆ ਕਿ ਦੇਸ਼ ਦੇ ਕਿਸਾਨ ਸ਼ਾਂਤਮਈ ਤਰੀਕਿਆਂ ਅਤੇ ਸੰਜਮ ਨਾਲ ਪਿਛਲੇ ਨੌੰ ਮਹੀਨਿਆਂ ਤੋਂ ਦਿੱਲੀ ਦੀਆਂ ਬਰੂਹਾਂ ਉਤੇ ਆਪਣਾ ਹੱਕੀ ਸੰਘਰਸ਼ ਕਾਮਯਾਬੀ ਨਾਲ ਲੜ ਰਹੇ ਹਨ ਭਾਂਵੇਂ ਪੰਜਾਬ ਨਾਲ ਧ੍ਰੋਹ ਕਮਾਉਣ ਵਾਲੇ ਕੁੱਝ ਭਾਜਪਾਈਆਂ ਨੇ ਕੇਂਦਰ ਸਰਕਾਰ ਕੋਲ ਇਸ ਇਤਿਹਾਸਕ ਕਿਸਾਨੀ ਅੰਦੋਲਨ ਬਾਰੇ ਤੱਥਾਂ ਤੋਂ ਉਲਟ ਗ਼ਲਤ ਅਨੁਮਾਨ ਪੇਸ਼ ਕਰਕੇ ਆਪਣੀ ਲੀਡਰਸ਼ਿਪ ਨੂੰ ਧੋਖੇ ਵਿੱਚ ਰੱਖਿਆ ਹੈ।
ਬੀਬੀ ਰਾਜਵਿੰਦਰ ਕੌਰ ਰਾਜੂ ਨੇ ਆਖਿਆ ਕਿ ਵਿਦੇਸ਼ਾਂ ਵਿੱਚ ਮਾਣ ਪ੍ਰਾਪਤ ਕਰ ਚੁੱਕੇ ਇਸ ਮਿਸਾਲੀ ਕਿਸਾਨ ਅੰਦੋਲਨ ਵਿਰੁੱਧ ਜ਼ਹਿਰ ਉਗਲਣ ਲਈ ‘ਨਾਗਪੁਰੀ’ ਪ੍ਰਸੰਗ ਵਿੱਚ ਰੰਗਿਆ ਇਹ ਨਵਾਂ ਭਾਜਪਾਈ ਕਾਹਲੋਂ ਵੀ ਆਪਣਾ ਪੂਰਾ ਜ਼ੋਰ ਲਾ ਲਵੇ ਜਿੰਨਾ ਕੁ ਉਸ ਦੀਆਂ ਲੱਤਾਂ ਭਾਰ ਝੱਲਦੀਆਂ ਨੇ ਪਰ ਦੇਸ਼ ਦੇ ਮਿਹਨਤਕਸ਼ ਕਿਸਾਨ ਆਪਣੀਆਂ ਹੱਕੀ ਮੰਗਾਂ ਮੰਨਵਾ ਕੇ ਹੀ ਘਰਾਂ ਨੂੰ ਪਰਤਣਗੇ।
ਯੈੱਸ ਪੰਜਾਬ ਦੀਆਂ ਅਹਿਮ ਖ਼ਬਰਾਂ ਦੇ ਅਪਡੇਟਸ ਲਈ ਇੱਥੇ ਕਲਿੱਕ ਕਰਕੇ ਸਾਡੇ ਟੈਲੀਗਰਾਮ ਚੈਨਲ ਨਾਲ ਜੁੜੋ
