ਬਈ ਸਲਮਾਨ ਖੁਰਸ਼ੀਦ ਹੁਰਾਂ ਕਮਾਲ ਕਰ ਦਿੱਤੀ। ਸੱਚ ਬੋਲਣ ਲਈ ਜਿਗਰਾ ਤਾਂ ਚਾਹੀਦੈ ਪਰ ਸੱਚ ਜਾਣਿਉਂ ਮਗਰੋਂ ਯੂ ਟਰਨ ਮਾਰਣ ਨੂੰ ਉਸਤੋਂ ਵੀ ਜ਼ਿਆਦਾ ਜਿਗਰਾ ਚਾਹੀਦੈ।
ਇਦੂੰ ਅਗਲਾ ਸੱਚ ਇਹ ਹੈ ਬਈ ਜਿਹੜੀ ਚੀਜ਼ ਤੋਂ ਇਕ ਵਾਰ ਪਰਦਾ ਚੱਕ ਦਈਏ ਨਾ, ਉਹਦੇ ’ਤੇ ਮੁੜ ਭਾਵੇਂ ਜਿੰਨੇ ਮਰਜ਼ੀ ਪਰਦੇ ਪਾਈਏ, ਕੱਜ ਨਹੀਂ ਹੁੰਦੀ। ਮੂੰਹੋਂ ਨਿਕਲੀ ਗੱਲ ਵਾਪਿਸ ਮੂੰਹ ’ਚ ਨਹੀਂ ਪੈਂਦੀ, ਭਾਵੇਂ ਯੂ ਟਰਨ ਛੱਡ ਕੇ ‘ਏ’ ਤੋਂ ਲੈ ਕੇ ‘ਜ਼ੈਡ’ ਤਕ ਸਾਰੀਆਂ ਟਰਨਾਂ ਟਰਾਈ ਕਰ ਲਉ। ਕੂਕਰ ਤੋਂ ਢੱਕਣ ਇਕ ਵੇਰਾਂ ਚੱਕ ਦਿਉ, ਮੁੜ ਕੇ ਭਾਫ਼ ਕੂਕਰ ’ਚ ਨਹੀਂ ਪਾਈ ਜਾਂਦੀ।
ਖ਼ੈਰ, ਸਲਮਾਨ ਖੁਰਸ਼ੀਦ ਜੀ ਨੇ ਫ਼ੁਰਮਾਇਆ ਬਈ ਕਾਂਗਰਸ ਦੇ ਹੱਥ ਖ਼ੂਨ ਨਾਲ ਰੰਗੇ ਹੋਏ ਨੇ। ਮੈਨੂੰ ਪੁੱਛਦਾ ਸੀ ਕਾਕਾ, ਅਖ਼ੇ ਇਹ ‘ਅੰਕਲ’ ਕੌਣ ਨੇ, ਬੜੀ ‘ਬੋਲਡ’ ਗੱਲ ਕੀਤੀ ਐ।
ਦੱਸਿਆ ਮੈਂ ਫ਼ਿਰ। ਬਈ ਸੀਨੀਅਰ ਨੇ, ਵੱਡੇ ਸੂਝਵਾਨਾਂ ’ਚ ਗਿਣੇ ਜਾਂਦੇ ਨੇ, ਅੰਦਰਲੀਆਂ ਬਾਹਰਲੀਆਂ ਸਾਰੀਆਂ ਜਾਣਦੇ ਹੋਣਗੇ ਤਦੇ ਈ ਹੀ ਮੂੰਹੋਂ ਨਿਕਲਿਆ ਹੋਣੈ। ਨਾਲੇ ਕੋਈ ਕਾਂਗਰਸੀ ਭਾਜਪਾ ਨੂੰ ਕਹੇ ਜਾਂ ਭਾਜਪਾਈ ਕਾਂਗਰਸੀ ਨੂੰ ਕਹੇ ਬਈ ਉਹਨਾਂ ਦੀ ਪਾਰਟੀ ਦੇ ਹੱਥ ਖ਼ੂਨ ਨਾਲ ਰੰਗੇ ਹੋਏ ਨੇ, ਇਹ ਥੋੜ੍ਹਾ ਕੋਈ ਖ਼ਬਰ ਹੁੰਦੀ ਐ। ਦੂਜੀ ਧਿਰ ਫੱਟ ਕਹਿ ਦਿਦੀ ਹੈ ‘ਗੰਦੀ…ਗੰਦੀ…ਗੰਦੀ..ਗੰਦੀ..ਗੰਦੀ ਬਾਤ’ ਭਾਵ ‘ਗੰਦੀ ਰਾਜਨੀਤੀ’ ਹੋ ਰਹੀ ਐ। ਖ਼ਬਰ ਤਾਂ ਉਦੋਂ ਹੀ ਬਣਦੀ ਐ, ਵਾਇਰਲ ਹੁੰਦੀ ਐ ਜਦ ਕੋਈ ਸਲਮਾਨ ਖੁਰਸ਼ੀਦ ਕਹਿੰਦੈ ਕਿ ਸਾਡੀ ਪਾਰਟੀ ਦੇ ਹੱਥ ਖ਼ੂਨ ਨਾਲ ਰੰਗੇ ਹੋਏ ਨੇ।
ਖ਼ੈਰ ਦੁਨੀਆਂ ਬੜੀ ਬਾਗੋ ਬਾਗ ਹੋਈ ਫ਼ਿਰਦੀ ਐ, ਬਈ ਚੱਲੋ ਸੱਚ ਤਾਂ ਬੋਲਿਐ ਸਲਮਾਨ ਖੁਰਸ਼ੀਦ ਹੁਣਾਂ ਨੇ। ਚੈਨਲਾਂ ਦੀ ਦਿਹਾੜੀ ਪੈ ਗਈ, ਅਖ਼ਬਾਰਾਂ ਨੇ ਵੀ ਚੱਕ ਲਿਆ ਬਿਆਨ, ਛਾਪਿਐ ਪਹਿਲੇ ਪੰਨਿਆਂ ’ਤੇ ਟਾਪੋ ਟਾਪ। ਭਾਜਪਾ ਦੀ ਤਾਂ ਜਿਵੇਂ ਲਾਟਰੀ ਨਿਕਲ ਆਈ ਐ। ਉੱਧਰ ਤਾਂ ਇਦਾਂ ਦੀਆਂ ਚੀਜ਼ਾਂ ਦੀ ‘ਡਿਮਾਂਡ’ ਈ ਬੜੀ ਐ।
ਪਰ ਮੈਨੂੰ ਸਮਝਾਉਣਾ ਪਿਆ ਕਾਕੇ ਨੂੰ। ਬਈ ਐਨੇ ਖੁਸ਼ ਹੋਣ ਵਾਲੀ ਗੱਲ ਨਹੀਂ। ਬੰਦੇ ਸਲਮਾਨ ਖੁਰਸ਼ੀਦ ਹੁਣੀ ਚੰਗੇ ਆ, ‘ਬੋਲਡ’ ਨਿਕਲੇ ਆ ਪਰ ਅੱਖ ਇਨ੍ਹਾਂ ਕੋਲ ਖ਼ਵਰੇ ਇਕੋ ਸੀ। ਉਂਜ ਦੋ ਹੁੰਦੀਆਂ ਤਾਂ ਹੋਰ ਵੀ ਚੰਗਾ ਹੁੰਦਾ। ਉਹਨੇ ਧਿਆਨ ਨਾਲ ਸਲਮਾਨ ਖੁਰਸ਼ੀਦ ਹੁਰਾਂ ਦੀਆਂ ਐਨਕਾਂ ’ਚੋਂ ਝਾਕਦੀਆਂ ਦੋ ਚਮਕੀਲੀਆਂ ਅੱਖਾਂ ਵੱਲ ਵੇਖ਼ਿਆ ਤੇ ਅਗਲਾ ਸਵਾਲ ਦਾਗਿਆ, ਅਖ਼ੇ ਉਹ ਕਿਵੇ?
ਮੈਂ ਦੱਸਿਆ ਬਈ ਭਾਈ ਇਹ ਸਲਮਾਨ ਖੁਰਸ਼ੀਦ ਹੁਰੀਂ ਵੀ ਇਕੋ ਅੱਖੋਂ ਹੀ ਸੁਜਾਖ਼ੇ ਨਿਕਲੇ ਨੇ। ਇਹਨਾਂ ਨੂੰ ਇਹ ਤਾਂ ਯਾਦ ਰਿਹਾ ਬਈ ਕਾਂਗਰਸ ਦੇ ਹੱਥ ਖ਼ੂਨ ਨਾਲ ਰੰਗੇ ਹੋਏ ਨੇੇ। ਹੋਵੇਗਾ ਇਹਨਾਂ ਦੇ ਦਿਮਾਗ ’ਚ ਰਿਕਾਰਡ ਕੋਈ ਜਿਸਨੂੰ ‘ਰੀਵਾਈਂਡ’ ਕਰਕੇ ਇਹਨਾਂ ਦੱਸਿਐ ਬਈ ਕਾਂਗਰਸ ਦੇ ਹੱਥ ਮੁਸਲਮਾਨਾਂ ਦੇ ਖ਼ੂਨ ਨਾਲ ਰੰਗੇ ਹੋਏ ਨੇ।
ਜੇ ਦੂਜੀ ਅੱਖ ਹੁੰਦੀ ਤਾਂ ਇਹ ਯਾਦ ਵੀ ਯਾਦ ਹੁੰਦਾ, ਨਜ਼ਰ ਆ ਜਾਂਦਾ ਕਿ 1984 ’ਚ ਜਿਹੜੇ ਹਜ਼ਾਰਾਂ ਸਿੱਖ ਦਿੱਲੀ ਅਤੇ ਹੋਰ ਥਾਂਵਾਂ ’ਤੇ ਧੂਹ ਧੂਹ ਕੇ ਤੇ ਲੂਹ ਲੂਹ ਕੇ ਮਾਰੇ ਗਏ ਸਨ ਉਨ੍ਹਾਂ ਮਗਰ ਵੀ ਨਾਂਅ ਕਾਂਗਰਸ ਦਾ ਹੀ ਬੋਲਦੈ। ਮਹਾਰਾਜ ਨੇ ਕਿਤੇ ਸਲਮਾਨ ਖੁਰਸ਼ੀਦ ਹੁਰਾਂ ਨੂੰ ਦੋ ਅੱਖਾਂ ਦਿੱਤੀਆਂ ਹੁੰਦੀਆਂ ਤਾਂ ਗੱਲ ਦਾ ਸਵਾਦ ਆ ਜਾਣਾ ਸੀ ਪਰ ਨਹੀਂ ਹੋਈ ਪੂਰੀ ਕਿਰਪਾ, ਨਹੀਂ ਬਣਨੀ ਸੀ ਪੂਰੀ ਗੱਲ।
ਸਲਮਾਨ ਖੁਰਸ਼ੀਦ ਹੁਣਾਂ ਦੀਆਂ ਵੀ ਸਾਰੀਆਂ ਨਹੀਂ ਸੁਣ ਲੈਣੀਆਂ ਰੱਬ ਨੇ, ਸਾਡਾ ਚਾਹਿਆ ਸਾਰਾ ਕੁਝ ਤਾਂ ਸਾਨੂੰ ਹਾਸਿਲ ਨਹੀਂ ਹੋ ਜਾਂਦਾ ਨਾ। ਮੇਰੇ ਵਰਗਿਆਂ ਕਈਆਂ ਦਾ ਦਿਲ ਕਰਦਾ ਸੀ ਬਈ ਕਿਤੇ ਸਿੱਖਾਂ ਵਿਚੋਂ ਵੀ ਕੋਈ ਸਲਮਾਨ ਖੁਰਸ਼ੀਦ ਨਿਕਲ ਆਉਂਦਾ। ਜਿਹੜਾ ਆਖ਼ਣ ਨੂੰ ਹੀ ਆਖ਼ ਦਿੰਦਾ ਬਈ ਸਾਡੀ ਪਾਰਟੀ ਦੇ ਹੱਥ… … .. । ਬੱਸ ਐਥੇ ਹੀ ਰੁਕ ਜਾਂਦੇ ਨੇ, ਜਿੱਥੇ ਮੈਂ ਰੁਕ ਗਿਆਂ। ਅੱਗੋਂ ਚੁੱਪ ਹੀ ਹੁੰਦੀ ਐ, ਜਿਵੇਂ ਮੈਂ ਬਿੰਦੀਆਂ ਜਿਹੀਆਂ ਵਾਹ ਦਿੱਤੀਆਂ ਨੇ।
ਕਾਕੇ ਦੀ ‘ਜਰਨੈਲ ਨਾਲਜ’ ਬੜੀ ਚੰਗੀ ਐ, ਨਾਲੇ ਯਾਦਦਾਸ਼ਤ ਵੀ ‘ਅੱਤ’ ਐ। ‘ਅੱਤ’ ਤੁਸੀਂ ਪੜ੍ਹਿਆ ਹੀ ਹੋਣੈ ਫ਼ੇਸਬੁੱਕ ’ਤੇ। ਮੈਂ ਵੀ ਉੱਥੋਂ ਹੀ ਸਿੱਖਿਐ, ‘ਅੱਤ’। ਉਹਨੇ ਮੈਨੂੰ ਯਾਦ ਕਰਾਇਆ ਬਈ ਕਾਂਗਰਸ ਅੰਦਰਲੇ ਕਈ ਸਿੱਖ ਆਗੂਆਂ ਨੇ ਵੀ ਬੜੀ ਦੇਰ ਪਹਿਲਾਂ ਸਲਮਾਨ ਖੁਰਸ਼ੀਦ ਬਣਨ ਦੀ ਕੋਸ਼ਿਸ਼ ਕੀਤੀ ਸੀ ਪਰ ਚਾਅ ਛੇਤੀ ਈ ਮੱਠੇ ਪੈ ਗਏ ਸੀ।
ਕਾਕਾ ਸਾਡਾ ‘ਪ੍ਰੈਕਟੀਕਲ’ ਵੀ ਬੜਾ ਜੇ। ‘ਪ੍ਰੈਕਟੀਕੈਲਿਟੀ’ ਦੇ ਮਾਮਲੇ ’ਚ ਤਾਂ ਪੂਰਾ ‘ਘੈਂਟ’ ਐ। ਗੁੱਸਾ ਨਾ ਕਰਿਉ ਇਹ ਅੱਤ, ਘੈਂਟ, ‘ਆਸਮ’ ਵਗੈਰਾ ਮੈਂ ਫ਼ੇਸਬੁੱਕ ਤੋਂ ਸਿੱਖੇ ਨੇ। ਪਤਾ ਨਹੀਂ ਕਿਉਂ, ਨਾ ਤਾਂ ਸਾਡੇ ਸਿਲੇਬਸ ’ਚ ਸਨ ਤੇ ਨਾ ਟੀਚਰਾਂ ਹੀ ਪੜ੍ਹਾਏ।
ਹੁਣ ਪ੍ਰੈਕਟੀਕਲ ਕਾਕਾ ਸੁਣ ਲਉ ਕੀ ਕਹਿੰਦੈ। ਅਖ਼ੇ, ਕੱਖ ਨਹੀਂ ਖੱਟਣਾ ਸਲਮਾਨ ਖੁਰਸ਼ੀਦ ਨੇ। ਪਾਰਟੀਆਂ ਨੀ ਬਖ਼ਸ਼ਦੀਆਂ ਇੱਦਾਂ ਦੀ ਗੱਲ ਕਹਿਣ ਵਾਲਿਆਂ ਨੂੰ।
ਹੁਣ ਮੈਨੂੰ ਸਮਝ ਆ ਗਈ ਐ ਬਈ ਸਾਡੇ ਆਲੇ ਸਲਮਾਨ ਖੁਰਸ਼ੀਦ ਕਿਉਂ ਨਹੀਂ ਬਣਦੇ, ਕਿਉਂ ਨਹੀਂ ਬਣਨਾ ਚਾਹੁੰਦੇ। ਜਿਹੜੇ ਬਣ ਕੇ ਵੇਖ਼ ਵੀ ਚੁੱਕੇ ਨੇ, ਵਾਪਸ ਮੁੜ ਕੇ ਪਹਿਲਾਂ ਵਾਲੇ ਸਲਮਾਨ ਖੁਰਸ਼ੀਦ ਬਣ ਚੁੱਕੇ ਨੇ।
ਸਾਡੇ ਵਾਲਿਆਂ ਨੂੰ ਤਾਂ ਪਤੈ, ਕਿਤੇ ਮੇਲ ਹੋਵੇ ਤਾਂ ਦੱਸਿਉ ਸਲਮਾਨ ਖੁਰਸ਼ੀਦ ਹੁਣਾਂ ਨੂੰ ਕਿ ਅਹੁਦੇ ਤੇ ਅਸੂਲ ਸੌਂਕਣਾਂ ਹੁੰਦੀਆਂ ਨੇ, ਤੇ ਸੌਂਕਣਾਂ ਇਕ ਦੂਜੇ ਨਾਲ ਕਦੇ ਨਹੀਂ ਰਹਿੰਦੀਆਂ।
ਐੱਚ.ਐੱਸ.ਬਾਵਾ
ਸੰਪਾਦਕ, ਯੈੱਸ ਪੰਜਾਬ
25 ਅਪ੍ਰੈਲ, 2018
