ਯੈੱਸ ਪੰਜਾਬ
ਲੰਦਨ, 22 ਸਤੰਬਰ, 2020:
ਪੰਜਾਬ ਦੇ ਜੰਮਪਲ ਇਕ ਸਿੱਖ ਟੈਕਸੀ ਡਰਾਈਵਰ ਨਾਲ ਇੰਗਲੈਂਡ ਵਿੱਚ ਬਰਕਸ਼ਾਇਰ ਵਿਖ਼ੇ ਚਾਰ ਅੰਗਰੇਜ਼ਾਂ ਵੱਲੋਂ ਕੁੱਟਮਾਰ ਕੀਤੇ ਜਾਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਉਸਦੀ ਪੱਗ ਉਤਾਰਣ ਦੀ ਕੋਸ਼ਿਸ਼ ਕੀਤੀ ਗਈ ਅਤੇ ਉਸਦੀ ਟੈਕਸੀ ਨੂੰ ਵੀ ਨੁਕਸਾਨ ਪੁਚਾਇਆ ਗਿਆ।
ਚਾਰਾਂ ਹਮਲਾਵਰ ਵਿਅਕਤੀਆਂ ਵੱਲੋਂ ਉਸਤੋਂ ਇਹ ਵੀ ਪੁੱਛਿਆ ਗਿਆ ਕਿ ਕੀ ਉਹ ‘ਤਾਲਿਬਾਨ’ ਹੈ ਪਰ ਉਸ ਵੱਲੋਂ ਇਹ ਦੱਸੇ ਜਾਣਦੇ ਬਾਵਜੂਦ ਕਿ ਉਹ ਇਕ ਸਿੱਖ ਹੈ, ਉਸ ਦੀ ਕੁੱਟਮਾਰ ਕੀਤੀ ਗਈ ਅਤੇ ਨਸ਼ਾ ਉਸਦੇ ਸੰਘੋਂ ਹੇਠਾਂ ਲਾਹੁਣ ਦੀ ਕੋਸ਼ਿਸ਼ ਵੀ ਹੋਈ।
ਰੀਡਿੰਗ ਟਾਊਨ ਦੇ ਕਸਬਾ ਟਾਈਲਹਰਸਟ ਦੇ ਰਹਿਣ ਵਾਲੇ 41 ਸਾਲਾ ਵਨੀਤ ਸਿੰਘ ਅਨੁਸਾਰ ਉਹ ਟੈਕਸੀ ਚਲਾਉਣ ਦੇ ਨਾਲ ਨਾਲ ਇਕ ਤਬਲਾਵਾਦਕ ਵੀ ਹੈ ਅਤੇ ਬਰਕਸ਼ਾਇਰ ਵਿੱਚ ਬੱਚਿਆਂ ਨੂੰ ਤਬਲਾ ਸਿਖ਼ਾਉਂਦਾ ਹੈ।
ਵਨੀਤ ਸਿੰਘ ਨੂੰ ਜਾਪਦਾ ਹੈ ਕਿ ਚਾਰੇ ਹਮਲਾਵਰ ਜਾਂ ਤਾਂ ਸਕਾਟਲੈਂਡ ਤੋਂ ਹੋਣਗੇ ਜਾਂ ਫ਼ਿਰ ਆਇਰਲੈਂਡ ਤੋਂ।
ਉਸਨੇ ਪੁਲਿਸ ਨੂੰ ਦੱਸਿਆ ਕਿ ਚਾਰੋ ਜਣੇ ਬਰਕਸ਼ਾਇਰ ਦੇ ਇਕ ਕੈਸੀਨੋ ਵਿੱਚੋਂ ਨਿਕਲਣ ਉਪਰੰਤ ਉਸਦੀ ਟੈਕਸੀ ਵਿੱਚ ਸਵਾਰ ਹੋਏ ਸਨ ਅਤੇ ਉਨ੍ਹਾਂ ਵਿੱਚੋਂ ਇਕ ਨੇ ਉਸਨੂੰ ਬਰੈਮਲੇ ਵਿਖ਼ੇ ਲਾਹ ਦੇਣ ਲਈ ਕਿਹਾ ਸੀ।
ਇਸ ਘਟਨਾ ਵਿੱਚ ਜ਼ਖ਼ਮੀ ਹੋਏ ਵਨੀਤ ਸਿੰਘ ਨੇ ਦੱਸਿਆ ਕਿ ਉਸ ਦੇ ਨੱਕ ਵਿੱਚ ਕੋਈ ‘ਡਰੱਗ’ ਪਾਉਣ ਦੀ ਕੋਸ਼ਿਸ਼ ਕੀਤੀ ਗਈ, ਉਸਦੀ ਟੈਕਸੀ ਭੰਨੀ ਗਈ ਅਤੇ ਉਸਦੀ ਪੱਗ ਉਤਾਰਣ ਦੀ ਕੋਸ਼ਿਸ਼ ਵੀ ਕੀਤੀ ਗਈ।
ਵਨੀਤ ਸਿੰਘ ਅਨੁਸਾਰ ਬਰੈਮਲੇ ਵਿੱਚ ਜਦ ਉਕਤ ਵਿਅਕਤੀ ਉੱਤਰÇਆ ਤਾਂ ਉਸਨੇ ਕਾਲੇ ਰੰਗ ਦੇ ਡੱਬੇ ਵਿੱਚੋਂ ਕੋਈ ਡਰੱਗ ਕੱਢ ਕੇ ਉਸਨੂੰ ਪੇਸ਼ ਕੀਤੀ ਪਰ ਉਸਨੇ ਜਦ ਹਮਲਾਵਰ ਨੂੰ ਦੱਸਿਆ ਕਿ ਇਹ ਉਸਦੇ ਧਰਮ ਦੇ ਖਿਲਾਫ਼ ਹੈ ਤਾਂ ਉਸਨੇ ਉਹ ਡਰੱਗ ਉਸਦੀਆਂ ਨਾਸਾਂ ਵਿੱਚ ਤੁੰਨ ਦਿੱਤੀ।
ਹੋਰ ਹਮਲਾਵਰਾਂ ਨੇ ਉਸਦੀ ਟੈਕਸੀ ਦੀ ਨੰਬਰ ਪਲੇਟ ਲਾਹੁਣ ਦੀ ਕੋਸ਼ਿਸ਼ ਕੀਤੀ ਤਾਂ ਉਸਨੇ ਪੁਲਿਸ ਨੂੰੁ ਬੁਲਾਉਣ ਦੀ ਕੋਸ਼ਿਸ਼ ਕੀਤੀ ਪਰ ਨੈਟਵਰਕ ਸਹੀ ਨਾ ਹੋਣ ਕਾਰਨ ਉਸਦੀ ਕਾਲ ਨਹੀਂ ਮਿਲੀ। ਇਹ ਹਮਲਾਵਰ ਮੁੜ ਕਾਰ ਵਿੱਚ ਆ ਕੇ ਬੈਠ ਗਏ ਅਤੇ ਉਸਦੀ ਪਗੜੀ ਨਾਲ ਛੇੜ ਛਾੜ ਕਰਕੇ ਪਗੜੀ ਲਾਹੁਣ ਦੀ ਕੋਸ਼ਿਸ਼ ਕੀਤੀ।
ਇਸ ਤੋਂ ਇਲਾਵਾ ਉਹ ਉਸਨੂੰ ਮਗਰ ਬੈਠੇ ਹੀ ਲਗਾਤਾਰ ਮੁੱਕੇ ਮਾਰਦੇ ਰਹੇ ਅਤੇ ਉਸਦੀ ਸੀਟ ਬੈਲਟ ਖਿੱਚ ਕੇ ਜ਼ੋਰ ਪਾਉਂਦੇ ਰਹੇ। ਉਸਨੂੰ ਇਹ ਵੀ ਪੁੱਛਿਆ ਗਿਆ ਕਿ ਕੀ ਉਹ ਤਾਲਿਬਾਨ ਹੈ ਪਰ ਜਦ ਉਸਨੇ ਕਿਹਾ ਕਿ ਉਹ ਸਿੱਖ ਹੈ ਅਤੇ ਪਗੜੀ ਉਨ੍ਹਾਂ ਦਾ ਧਾਰਮਿਕ ਅਕੀਦਾ ਹੈ ਤਾਂ ਉਨ੍ਹਾਂ ਨੇ ਪਗੜੀ ਲਾਹੁਣ ਦੀ ਕੋਸ਼ਿਸ਼ ਕੀਤੀ। ਬਾਕੀ ਰਹਿ ਗਏ ਤਿੰਨ ਵਿਅਕਤੀ ਅੱਗੇ ਜਾ ਕੇ ਇਕ ਰੈਡ ਲਾਈਟ ’ਤੇ ਉੱਤਰ ਗਏ ਅਤੇ ਜਾਂਦੇ ਜਾਂਦੇ ਉਸਦੀ ਗੱਡੀ ਨੂੰ ਨੁਕਸਾਨ ਪੁਚਾ ਗਏ।
ਵਨੀਤ ਸਿੰਘ ਅਨੁਸਾਰ ਹੋਏ ਹਮਲੇ ਕਾਰਨ ਉਸਦੀ ਗਰਦਨ ਅਤੇ ਛਾਤੀ ਵਿੱਚ ਦਰਦ ਰਹਿ ਰਿਹਾ ਹੈ। ਉਸਨੇ ਦਾਅਵਾ ਕੀਤਾ ਕਿ ਇਹ 100 ਫ਼ੀਸਦੀ ਇਕ ਨਸਲਵਾਦੀ ਹਮਲਾ ਸੀ। ਉਸਨੇ ਇਹ ਵੀ ਕਿਹਾ ਕਿ ਉਹ ਆਮ ਤੌਰ ’ਤੇ ਮਿਲਾਪੜਾ ਅਤੇ ਹਰ ਵੇਲੇ ਹੱਸਣ ਖ਼ੇਡਣ ਵਾਲਾ ਇਨਸਾਨ ਹੈ ਪਰ ਇਸ ਹਮਲੇ ਤੋਂ ਬਾਅਦ ਉਸਦੇ ਮਨ ਵਿੱਚ ਸਹਿਮ ਬੈਠ ਗਿਆ ਹੈ।
ਥੇਮਸ ਵੈਲੀ ਪੁਲਿਸ ਅਨੁਸਾਰ ਉਹ ਕੇਸ ਦੀ ਜਾਂਚ ਕਰ ਰਹੇ ਹਨ ਪਰ ਅਜੇ ਤਾਂਈਂ ਕੋਈ ਗ੍ਰਿਫ਼ਤਾਰੀ ਨਹੀਂ ਹੋਈ ਹੈ।
ਇਸ ਨੂੰ ਵੀ ਪੜ੍ਹੋ:
ਖ਼ੇਤੀ ਆਰਡੀਨੈਂਸਾਂ ’ਤੇ ਅਕਾਲੀ ਦਲ ਦਾ ਮੋੜਾ: ਬਹੁਤ ਦੇਰ ਕੀ ਮੇਹਰਬਾਂ ਆਤੇ ਆਤੇ – ਐੱਚ.ਐੱਸ.ਬਾਵਾ
ਸਾਡਾ ਫ਼ੇਸਬੁੱਕ ਪੇਜ ਲਾਈਕ ਕਰਨ ਲਈ ਕਲਿੱਕ ਕਰੋ