ਯੈੱਸ ਪੰਜਾਬ
ਮੋਗਾ, 18 ਅਪ੍ਰੈਲ, 2021:
‘ਆਮ ਆਦਮੀ ਪਾਰਟੀ’ ਯੂਥ ਵਿੰਗ ਦੇ ਜੁਆਇੰਟ ਸਕੱਤਰ ਅਮਿਤ ਪੁਰੀ ’ਤੇ ਅੱਜ ਮੋਗਾ ਵਿੱਚ ਹਮਲਾ ਹੋਣ ਦੀ ਖ਼ਬਰ ਹੈ।
ਅਮਿਤ ਪੁਰੀ ਅੱਜ ਆਪਣੇ ਮੋਟਰ ਸਾਈਕਲ ’ਤੇ ਸਵਾਰ ਹੋ ਕੇ ਜਾ ਰਿਹਾ ਸੀ ਤਾਂ ਕੁਝ ਲੋਕਾਂ ਨੇ ਸਾਂਈਂ ਮੰਦਰ ਕੋਲ ਉਸਨੂੰ ਘੇਰ ਲਿਆ। ਪਤਾ ਲੱਗਾ ਹੈ ਕਿ ਘੇਰਣ ਵਾਲੇ ਵਿਅਕਤੀ ਅਮਿਤ ਪੁਰੀ ਨੂੰ ਇਕ ਪਾਸੇ ਲੈ ਗਏ ਅਤੇ ਉਸਦੀ ਬੁਰੀ ਤਰ੍ਹਾਂ ਕੁੱਟਮਾਰ ਕੀਤੀ ਗਈ। ਕੁੱਟਮਾਰ ਵਿੱਚ ਬੇਸਬਾਲ ਆਦਿ ਦੀ ਵਰਤੋਂ ਕੀਤੀ ਗਈ।
ਇਸ ਘਟਨਾ ਦਾ ਮੰਤਵ ਅਜੇ ਕੁਝ ਸਪਸ਼ਟ ਨਹੀਂ ਹੈ। ਇਹ ਵੀ ਕਿਹਾ ਜਾ ਰਿਹਾ ਹੈ ਕਿ ਅਮਿਤ ਪੁਰੀ ਨੇ ਕੁੱਟਮਾਰ ਕਰਨ ਵਾਲਿਆਂ ਨੂੰ ਵੀਹ ਹਜ਼ਾਰ ਰੁਪਏ ਦੇ ਕੇ ਖ਼ਹਿੜਾ ਛੁਡਾਇਆ।
ਇਕ ਪਾਸੇ ਅਮਿਤ ਪੁਰੀ ਵੱਲੋਂ ਇਹ ਕਿਹਾ ਜਾ ਰਿਹਾ ਹੈ ਕਿ ਕੁੱਟ ਮਾਰ ਕਰਨ ਵਾਲੇ ਕੋਈ ਨਸ਼ੇੜੀ ਸਨ, ਪਰ ਦੂਜੇ ਬੰਨੇ ਇਹ ਵੀ ਕਿਹਾ ਜਾ ਰਿਹਾ ਹੈ ਕਿ ਹਮਲਾਵਰਾਂ ਨੇ ਅਮਿਤ ਪੁਰੀ ਦੇ ਮੂੰਹ ’ਤੇ ਕਪੜਾ ਪਾ ਕੇ ਉਸਦੀ ਕੁੱਟਮਾਰ ਕੀਤੀ ਇਸ ਲਈ ਉਹ ਹਮਲਾਵਰਾਂ ਨੂੰ ਨਹੀਂ ਜਾਣਦੇ।
ਅਮਿਤ ਪੁਰੀ ਨੂੰ ਇਸ ਘਟਨਾ ਤੋਂ ਬਾਅਦ ਮੋਗਾ ਦੇ ਸਿਵਲ ਹਸਪਤਾਲ ਵਿੱਚ ਦਾਖ਼ਲ ਕਰਵਾਇਆ ਗਿਆ ਹੈ।
