ਯੈੱਸ ਪੰਜਾਬ
ਨਿਊ ਯਾਰਕ, 4 ਅਕਤੂਬਰ, 2022:
ਕੈਲੀਫ਼ੋਰਨੀਆ ਵਿੱਚ ਰਹਿੰਦੇ ਭਾਰਤੀ ਮੂਲ ਦੇ ਇਕ ਪੰਜਾਬੀ ਪਰਿਵਾਰ ਦੇ 4 ਮੈਂਬਰਾਂ ਨੂੰ ਅਗਵਾ ਕਰ ਲਏ ਜਾਣ ਦੇ ਮਾਮਲੇ ਦਾ ਭੇਤ ਲਗਾਤਾਰ ਡੂੰਘਾ ਹੁੰਦਾ ਜਾ ਰਿਹਾ ਹੈ। ਅਗਵਾ ਕੀਤੇ ਗਏ ਲੋਕਾਂ ਵਿੱਚ ਇਕ 8 ਮਹੀਨੇ ਦਾ ਬੱਚਾ ਵੀ ਸ਼ਾਮਲ ਹੈ।
ਪੁਲਿਸ, ਪਰਿਵਾਰ ਅਤੇ ਜਾਣਕਾਰ ਚਾਰਾਂ ਦੀ ਭਾਲ ਵਿੱਚ ਲੱਗੇ ਹੋਏ ਹਨ ਪਰ ਉਨ੍ਹਾਂ ਦੀ ਸੁੱਖ ਸਾਂਦ ਅਤੇ ਪਤੇ ਟਿਕਾਣੇ ਦਾ ਭੇਤ ਅਜੇ ਬਰਕਰਾਰ ਹੈ।
ਅਗਵਾ ਕੀਤੇ ਗਏ ਸਮਝੇ ਜਾਂਦੇ ਪੰਜਾਬੀ ਪਰਿਵਾਰ ਵਿੱਚ 36 ਸਾਲਾ ਜਸਦੀਪ ਸਿੰਘ 36, ਉਸਦੀ 27 ਸਾਲਾ ਪਤਨੀ ਜਸਲੀਨ ਕੌਰ, ਉਨ੍ਹਾਂ ਦੀ 8 ਮਹੀਨੇ ਦੀ ਬੱਚੀ ਆਰੂਹੀ ਢੇਰੀ ਅਤੇ ਅਮਨਦੀਪ ਸਿੰਘ ਨਾਂਅ ਦਾ 39 ਸਾਲਾਂ ਦਾ ਇਕ ਰਿਸ਼ਤੇਦਾਰ ਸ਼ਾਮਲ ਹਨ।
ਮਰਸਡ ਕਾਊਂਟੀ ਦੇ ਸ਼ੈਰਿਫ਼ ਵਾਰਨਕੇ ਨੇ ਇਕ ਵੀਡੀਓ ਸੁਨੇਹੇ ਵਿੱਚ ਕਿਹਾ ਹੈ ਕਿ ਅਗਵਾਕਾਰ ਹਥਿਆਰਬੰਦ ਅਤੇ ਖ਼ਤਰਨਾਕ ਹੈ।
ਉਨ੍ਹਾਂ ਕਿਹਾ ਕਿ ਅਜੇ ਤਾਂਈਂ ਸਾਨੂੰ ਇਸ ਅਗਵਾ ਦੀ ਘਟਨਾ ਦੇ ਮੰਤਵ ਦਾ ਅੰਦਾਜ਼ਾ ਨਹੀਂ ਹੈ ਅਤੇ ਨਾ ਹੀ ਅਗਵਾਕਾਰ ਨੇ ਕੋਈ ਸੰਪਰਕ ਸਾਧਿਆ ਹੈ, ਫ਼ਿਰੌਤੀ ਦੀ ਵੀ ਕੋਈ ਮੰਗ ਨਹੀਂ ਕੀਤੀ ਗਈ।
ਸ਼ੈਰਿਫ਼ ਦੇ ਦਫ਼ਤਰ ਵੱਲੋਂ ਅਗਵਾ ਕੀਤੇ ਗਏ ਲੋਕਾਂ ਅਤੇ ਅਗਵਾਕਾਰ ਦੀਆਂ ਤਸਵੀਰਾਂ ਜਾਰੀ ਕਰਕੇ ਲੋਕਾਂ ਤੋਂ ਮਦਦ ਮੰਗੀ ਗਈ ਹੈ। ਤਸਵੀਰ ਵਿੱਚ ਅਗਵਾਕਾਰ ਗੰਜੇ ਸਿਰ ਵਾਲਾ, ਹੁੱਡੀ ਪਾਈ ਅਤੇ ਮਾਸਕ ਤੇ ਫ਼ਿਰ ਮਾਸਕ ਤੋਂ ਬਗੈਰ ਵੀ ਨਜ਼ਰ ਆਉਂਦਾ ਹੈ।
ਜਿਵੇਂ ਜਿਵੇਂ ਸਮਾਂ ਬੀਤਦਾ ਜਾ ਰਿਹਾ ਹੈ, ਪਰਿਵਾਰ ਦੀ ਸੁਰੱਖ਼ਿਆ ਬਾਰੇ ਚਿੰਤਾ ਵਧਦੀ ਜਾ ਰਹੀ ਹੈ।
ਯੈੱਸ ਪੰਜਾਬ ਦੀਆਂ ਪੰਜਾਬੀ ਖ਼ਬਰਾਂ ਲਈ ਇੱਥੇ ਕਲਿੱਕ ਕਰਕੇ ਸਾਡਾ ਫ਼ੇਸਬੁੱਕ ਪੇਜ ਲਾਈਕ ਕਰੋ