Thursday, December 1, 2022

ਵਾਹਿਗੁਰੂ

spot_img


‘ਤੂੰ ਕੀ ਕੀਤਾ?’, ਥੱਪੜਕਾਂਡ ਅਤੇ ਉਸਤੋਂ ਬਾਅਦ ਦੀ ਸਿਆਸਤ ਬਾਰੇ ਇਕ ਨਜ਼ਰੀਆ ਇਹ ਵੀ – ਐੱਚ.ਐੱਸ. ਬਾਵਾ

ਬੀਤੇ ਦਿਨੀਂ ਆਪਣੇ ਹਲਕੇ ਦੇ ਇਕ ਪਿੰਡ ਵਿੱਚ ਕਿਸੇ ਪ੍ਰੋਗਰਾਮ ’ਤੇ ਗਏ ਕਾਂਗਰਸ ਦੇ ਭੋਆ ਤੋਂ ਵਿਧਾਇਕ ਸ੍ਰੀ ਜੋਗਿੰਦਰ ਪਾਲ ਵੱਲੋਂ ਇਕ ਨੌਜਵਾਨ ਨੂੰ ‘ਸੁਆਲ ਪੁੱਛਣ ਕਾਰਨ’ ਥੱਪੜ ਮਾਰਨ ਦਾ ਮਾਮਲਾ ਪਿਛਲੇ ਦਿਨਾਂ ਵਿੱਚ ਕਾਫ਼ੀ ਭਖ਼ਿਆ ਰਿਹਾ ਹੈ। ਜਦ ਉਹਨਾਂ ਨੇ ਥੱਪੜ ਮਾਰਿਆ ਤਾਂ ਵਿਧਾਇਕ ਦੇ ਸਕਿਉਰਿਟੀ ਗਾਰਡ ਅਤੇ ਕੁਝ ਹੋਰਨਾਂ ਲੋਕਾਂ ਨੇ ਵੀ ਵਿਧਾਇਕ ਦੇ ਥੱਪੜ ਦੇ ਸਮਰਥਨ ਵਿੱਚ ਆਪਣੇ ਹੱਥ ਗ਼ਰਮ ਕਰ ਲਏ।

ਵਿਧਾਇਕ ਦੇ ਇਸ ਵਤੀਰੇ ਦੀ ਜਿੰਨੀ ਨਿੰਦਾ ਕੀਤੀ ਜਾਵੇ ਉਨੀ ਘੱਟ ਹੈ। ਵਿਧਾਇਕ ਨੂੰ ਹੱਥ ਚੁੱਕਣਾ ਸੋਭਦਾ ਨਹੀਂ ਸੀ ਅਤੇ ਸਭਿਅਕ ਸਮਾਜ ਵਿੱਚ ਕਿਸੇ ਵੀ ਗੱਲਬਾਤ ਦੌਰਾਨ ਹਿੰਸਕ ਹੋ ਜਾਣਾ ਸਹੀ ਨਹੀਂ, ਖ਼ਾਸਤੌਰ ’ਤੇ ਜਦ ਕੋਈ ਆਮ ਵਿਅਕਤੀ ਆਪਣੇ ਚੁਣੇ ਹੋਏ ਨੁਮਾਇੰਦੇ ਨੂੂੰ ਸਵਾਲ ਪੁੱਛੇ ਤਾਂ ਉਸ ਉੱਤੇ ਹਿੰਸਕ ਹਮਲਾ ਪ੍ਰਵਾਨ ਨਹੀਂ ਕੀਤਾ ਜਾ ਸਕਦਾ।

ਇਸ ਘਟਨਾ ਲਈ ਵਿਧਾਇਕ ਜੋਗਿੰਦਰ ਪਾਲ ਹੁਰਾਂ ਦੀ ਸਿਰਫ਼ ਨਿਖੇਧੀ ਹੀ ਨਹੀਂ ਹੋਈ, ਉਨ੍ਹਾਂ ਦੇ ਘਰ ਦਾ ਘੇਰਾਉ ਵੀ ਹੋਇਆ। ਉਨ੍ਹਾਂ ਦੇ ਖਿਲਾਫ਼ ਰੱਜਵੀਂ ਬਿਆਨਬਾਜ਼ੀ ਵੀ ਹੋਈ। ਸਿਆਸੀ ਵਿਰੋਧੀਆਂ ਵੱਲੋਂ ਉਨ੍ਹਾਂ ਨੂੰ ਕਾਂਗਰਸ ਵਿੱਚੋਂ ਮੁਅੱਤਲ ਕਰਨ, ਬਰਖ਼ਾਸਤ ਕਰਨ, ਉਨ੍ਹਾਂ ਖਿਲਾਫ਼ ਕੇਸ ਦਰਜ ਕਰਨ ਅਤੇ ਉਨ੍ਹਾਂ ਦੀ ਗ੍ਰਿਫ਼ਤਾਰੀ ਤਕ ਦੀ ਮੰਗ ਹੋਈ।

ਇਸ ਘਟਨਾ ਦਾ ਇਕ ਪਹਿਲੂ ਹੋਰ ਹੈ ਜੋ ਅਣਗੌਲਿਆ ਕਰ ਦਿੱਤਾ ਗਿਆ ਹੈ।

ਇਕ ਵਾਰ ਫ਼ਿਰ ਇਹ ਕਹਿੰਦੇ ਹੋਏ ਕਿ ਵਿਧਾਇਕ ਦਾ ਹੱਥ ਚੁੱਕਣਾ ਗ਼ਲਤ ਸੀ, ਰਤਾ ਇਹ ਵੇਖ਼ੀਏ ਕਿ ਕੀ ਕਿਸੇ ਜਨਤਾ ਦੇ ਚੁਣੇ ਹੋਏ ਪ੍ਰਤੀਨਿਧ ਨੂੰ ਕੀ ਕਿਸੇ ਵੱਲੋਂ ਇਹ ਪੁੱਛਣਾ ਸਹੀ ਹੈ ‘ਤੂੰ ਕੀ ਕੀਤਾ?’। ਤੁਸੀਂ ਕਹਿ ਸਕਦੇ ਹੋ ਇਸ ਵਿੱਚ ਕੀ ਗ਼ਲਤ ਹੈ, ਸਵਾਲ ਕਰਨਾ ਤਾਂ ਬਣਦਾ ਹੀ ਹੈ। ਮੈਂ ਸਵਾਲ ਦੀ ਗੱਲ ਨਹੀਂ ਕਰ ਰਿਹਾ। ਸਵਾਲ ਤਾਂ ਹੋਣੇ ਹੀ ਚਾਹੀਦੇ ਹਨ, ਹੋਰ ਜ਼ਿਆਦਾ ਹੋਣੇ ਚਾਹੀਦੇ ਹਨ, ਸਾਰਿਆਂ ਚੁਣਿਆਂ ਨੁਮਾਇੰਦਿਆਂ ਨੂੰ ਅਤੇ ਜ਼ਿੰਮੇਵਾਰ ਅਧਿਕਾਰੀਆਂ ਨੂੰ ਹੋਣੇ ਚਾਹੀਦੇ ਹਨ ਪਰ ਉਹ ਸਵਾਲ ਹੋਣੇ ਚਾਹੀਦੇ ਹਨ, ਸ਼ਬਦੀ ਹਮਲੇ ਨਹੀਂ।

ਪੰਜਾਬੀ ਵਿੱਚ ‘ਤੂੰ ਕੀ ਕੀਤਾ?’ ਕਿਸੇ ਬਜ਼ੁਰਗ ਦੇ ਮੂੰਹੋਂ ਜਾਂ ਅਹੁਦੇ ਵਿੱਚ ਵੱਡੇ ਬੰਦੇ ਤੋਂ ਤਾਂ ਪ੍ਰਵਾਨ ਕੀਤਾ ਜਾ ਸਕਦਾ ਹੈ ਪਰ 20 ਸਾਲ ਕਰੀਬ ਦੀ ਉਮਰ ਵਾਲੇ ਇਕ ਨੌਜਵਾਨ ਦੇ ਮੂਹੋਂ ਕਿਸੇ ਵਿਧਾਇਕ ਨੂੰ ਇਹ ਪੁੱਛਣਾ, ‘ਤੂੰ ਕੀ ਕੀਤਾ?’ ਕੁਝ ਜਚਦਾ ਨਹੀਂ। ਵਿਧਾਇਕ ਉਸ ਮੁੰਡੇ ਤੋਂ ਉਮਰ ਵਿੱਚ ਵੀ ਵੱਡਾ ਹੈ ਅਤੇ ਰੁਤਬੇ ਵਿੱਚ ਵੀ। ਇਹੀ ਗੱਲ ਕਿਸੇ ਬਜ਼ੁਰਗ ਨੇ ਕਹੀ ਹੁੰਦੀ ਤਾਂ ਵਿਧਾਇਕ ਨੇ ਵੀ ਬੇਇਜ਼ਤੀ ਮਹਿਸੂਸ ਨਹੀਂ ਕਰਨੀ ਸੀ ਅਤੇ ਸ਼ਾਇਦ ਉਹ ਉਸ ਤਰ੍ਹਾਂ ‘ਰਿਐਕਟ’ ਵੀ ਨਾ ਕਰਦਾ, ਜਿਸ ਤਰ੍ਹਾਂ ਉਸਨੇ ਕੀਤਾ।

ਇਸ ਗੱਲ ਨੂੰ ਇੰਜ ਪੇਸ਼ ਕੀਤਾ ਜਾ ਰਿਹਾ ਹੈ ਕਿ ਵਿਧਾਇਕ ਨੇ ਸਵਾਲ ਪੁੱਛਣ ’ਤੇ ਮੁੰਡੇ ਨੂੰ ਥੱਪੜ ਕੱੱਢ ਮਾਰਿਆ। ਨਹੀਂ, ਜੇ ਵੀਡੀਓ ਧਿਆਨ ਨਾਲ ਵੇਖ਼ਿਆ ਜਾਵੇ ਤਾਂ ਮੁੰਡੇ ਨੇ ਸਵਾਲ ਪੁੱਛਣ ਦੀ ਗੱਲ ਕੀਤੀ ਜਿਸ ’ਤੇ ਵਿਧਾਇਕ ਨੇ ਕਿਹਾ ਕਿ ਇਸਨੂੰ ਅੱਗੇ ਭੇਜ ਦਿਉ। ਜੇ ਵਿਧਾਇਕ ਨੇ ਜਵਾਬ ਨਾ ਦੇਣਾ ਹੁੰਦਾ ਤਾਂ ਉਹ ਉਸ ਮੁੰਡੇ ਨੂੰ ਅੱਗੇ ਭੇਜਣ ਅਤੇ ਉਸਨੂੰ ਸੁਆਲ ਪੁੱਛਣ ਲਈ ਨਾ ਕਹਿੰਦੇ। ਵਿਧਾਇਕ ਦੇ ਕਹਿਣ ’ਤੇ ਹੀ ਮੁੰਡਾ ਅੱਗੇ ਆਇਆ ਅਤੇ ਉਸਨੇ ਜੋ ਸਵਾਲ ਕੀਤਾ ਉਸ ਦੀ ਭਾਸ਼ਾ ਅਤੇ ਲਹਿਜ਼ਾ ਸ਼ਾਲੀਨਤਾ ਦੇ ਦਾਇਰੇ ਵਿੱਚ ਨਹੀਂ ਸੀ।

ਮੀਡੀਆ ਵਿੱਚ ਤਾਂ ਇਹ ਜਿਸ ਤਰ੍ਹਾਂ ਆਇਆ ਸੋ ਆਇਆ, ਵਿਰੋਧੀ ਧਿਰਾਂ ਨੇ ਇਸ ਨੂੰ ਬੜਾ ਵੱਡਾ ਅਤੇ ਇਕਪਾਸੜ ਮੁੱਦਾ ਬਣਾ ਕੇ ਪੇਸ਼ ਕੀਤਾ। ਇੱਥੋਂ ਤਕ ਕਿ ਵਿਧਾਇਕ ਦੇ ਘਰ ਦੇ ਘੇਰਾਉ ਦਾ ਸੱਦਾ ਦੇ ਦਿੱਤਾ ਗਿਆ ਅਤੇ ਘੇਰਾਉ ਕੀਤਾ ਗਿਆ। ਇਸ ਤੋਂ ਇਲਾਵਾ ਹੈਸ਼ਟੈਗ ‘ਤੂੰ ਕੀ ਕੀਤਾ?’ ਮੁਹਿੰਮ ਸ਼ੁਰੂ ਕਰ ਦਿੱਤੀ ਗਈ। ਇਹ ਵੀ ਕਿਹਾ ਗਿਆ ਕਿ ਅਸੀਂ ਤਾਂ ਮੁੱਖ ਮੰਤਰੀ ਸ: ਚਰਨਜੀਤ ਸਿੰਘ ਚੰਨੀ ਨੂੰ ਪੁੱਛਦੇ ਹਾਂ ਕਿ ‘ਤੂੰ ਕੀ ਕੀਤਾ?’

ਸਵਾਲ ਇਹ ਹੈ ਕਿ ਵਿਧਾਇਕ ਦਾ ਮੁੰਡੇ ਨੂੰ ਥੱਪੜ ਕੀ ਉਸਦੇ ਸਵਾਲ ਵਿੱਚੋਂ ਉਪਜਿਆ ਸੀ? ਇੰਜ ਜਾਪਦਾ ਤਾਂ ਨਹੀਂ। ਜੇ ਇੰਜ ਹੁੰਦਾ ਤਾਂ ਵਿਧਾਇਕ ਉਸਨੂੰ ਇਹ ਨਾ ਕਹਿੰਦਾ ਕਿ ਇਸਨੂੰ ਅੱਗੇ ਭੇਜੋ ਤਾਕਿ ਇਹ ਅੱਗੇ ਆ ਕੇ ਉਹਨਾਂ ਨੂੰ ਸਵਾਲ ਪੁੱਛ ਲਵੇ। ਵਿਧਾਇਕ ਦਾ ਥੱਪੜ ਨੌਜਵਾਨ ਦੇ ਜਨਤਕ ਤੌਰ ’ਤੇ ਬੋਲੇ ਗਏ ‘ਤੂੰ’ ਦਾ ਜਵਾਬ ਸੀ, ਪਰ ਫ਼ਿਰ ਵੀ ਗ਼ਲਤ ਸੀ। ਸਵਾਲ ਸਵਾਲ ਵਾਂਗ ਪੁੱਛਿਆ ਜਾਣਾ ਚਾਹੀਦਾ ਹੈ, ਗਾਲ੍ਹ ਵਾਂਗ ਕਿਸੇ ਦੇ ਮੂੰਹ ’ਤੇ ਮਾਰਿਆ ਨਹੀਂ ਜਾਣਾ ਚਾਹੀਦਾ।

ਇਹ ਬਹਿਸ਼ ਦਾ ਵਿਸ਼ਾ ਹੋ ਸਕਦਾ ਹੈ ਕਿ ਇਸ ਵਰਤਾਰੇ ਵਿੱਚ ਬੋਲੇ ਗਏ ਸ਼ਬਦ ‘ਤੂੰ ਕੀ ਕੀਤਾ?’ ਸ਼ਾਲੀਨਤਾ ਦੇ ਦਾਇਰੇ ਵਿੱਚ ਆਉਂਦੇ ਹਨ ਜਾਂ ਨਹੀਂ। ਜਿਨ੍ਹਾਂ ਨੂੰ ‘ਤੂੰ ਕੀ ਕੀਤਾ?’ ਵਿੱਚ ਕੋਈ ਗ਼ਲਤ ਗੱਲ ਨਹੀਂ ਜਾਪਦੀ, ਉਨ੍ਹਾਂ ਦਾ ਵਿਚਾਰ ਵੀ ਠੀਕ ਹੋ ਸਕਦਾ ਹੈ। ਜਿਨ੍ਹਾਂ ਨੇ ਖ਼ੁਦ ਵਿਧਾਇਕ ਅਤੇ ਉਸ ਤੋਂ ਵੀ ਉੱਪਰਲੀਆਂ ਥਾਂਵਾਂ ’ਤੇ ਰਹਿ ਚੁੱਕਣ ਦੇ ਬਾਵਜੂਦ ਕੇਵਲ ਤੇ ਕੇਵਲ ਵਿਧਾਇਕ ਦੇ ਥੱਪੜ ਦਾ ਵਿਰੋਧ ਕੀਤਾ, ਇਸੇ ਨੂੰ ਮੁੱਦਾ ਬਣਾ ਲਿਆ ਪਰ ਇਸ ਗੱਲ ਦਾ ਖ਼ਿਆਲ ਨਹੀਂ ਕੀਤਾ ਕਿ ਮੁੰਡੇ ਦੀ ਭਾਸ਼ਾ ਕੀ ਸਭਿਅਕ ਸੀ, ਕੀ ਜਨਤਕ ਤੌਰ ’ਤੇ ਬੋਲੇ ਜਾਣ ਵਾਲੀ ਸੀ, ਉਨ੍ਹਾਂ ਨਾਲ ਵੀ ਦੋ ਗੱਲਾਂ ਕਰਨ ਦਾ ਮਨ ਹੈ।

ਮੈਂ ਬਹੁਤ ਸਾਰੇ ਵਿਧਾਇਕਾਂ, ਸੰਸਦ ਮੈਂਬਰਾਂ, ਸਾਬਕਾ ਵਿਧਾਇਕਾਂ ਤੇ ਸਾਬਕਾ ਸੰਸਦ ਮੈਂਬਰਾਂ ਨੂੰ ਜਾਣਦਾ ਹਾਂ ਜਿਹਨਾਂ ਵਿੱਚੋਂ ਕਈ ਤਾਂ ਐਸੇ ਹਨ ਕਿ ਜੇ ਉਨ੍ਹਾਂ ਨੂੰ ਕਿਸੇ ਨੇ ਇੰਜ ਤੂੰ ਕਹਿ ਦਿੱਤਾ ਹੁੰਦਾ ਤਾਂ ਸ਼ਾਇਦ ਕਹਾਣੀ ਵਿਧਾਇਕ ਜੋਗਿੰਦਰ ਪਾਲ ਦੇ ਥੱਪੜ ਵਾਲੇ ‘ਐਪੀਸੋਡ’ ਨਾਲੋਂ ਕਿਤੇ ਖ਼ਤਰਨਾਕ ਅਤੇ ਭਿਆਨਕ ਹੁੰਦੀ। ਚੱਲੋ, ਹੁੰਦੀ ਜਾਂ ਨਹੀਂ ਹੁੰਦੀ ਪਰ ਸਵਾਲ ਇਹ ਹੈ ਕਿ ਜਿਹੜੇ ਲੋਕ ਆਪ ਨੇਤਾ ਹਨ, ਆਗੂ ਹਨ, ਵਿਧਾਇਕ ਹਨ, ਸੰਸਦ ਮੈਬਰ ਹਨ, ਸਾਬਕਾ ਵਿਧਾਇਕ ਹਨ, ਸਾਬਕਾ ਸੰਸਦ ਮੈਬਰ ਹਨ, ਕੀ ਉਹ ਆਪਣੇ ਜਾਂ ਕਿਸੇ ਹੋਰ ਹਲਕੇ ਵਿੱਚ ਜਾ ਕੇ ਆਮ ਲੋਕਾਂ ਤੋਂ ‘ਤੂੰ’ ਅਖ਼ਵਾਉਣ ਨੂੰ ਤਿਆਰ ਹਨ।

ਜਿਹੜੇ ਵਿਧਾਇਕ ਦੇ ਥੱਪੜ ਦਾ ਵਿਰੋਧ ਕਰ ਰਹੇ ਹਨ ਤੇ ਮੁੰਡੇ ਦੇ ‘ਤੂੰ ਕੀ ਕੀਤਾ?’ ਨੂੰ ਹੀ ਹਥਿਆਰ ਬਣਾ ਰਹੇ ਹਨ, ਉਹ ਕੀ ਇਸ ਗੱਲ ਲਈ ਤਿਆਰ ਹਨ ਕਿ ਕੋਈ ਉਹਨਾਂ ਨੂੰ ਵੀ ‘ਤੂੰ’ ਕਰਕੇ ਹੀ ਸਵਾਲ ਕੀਤੇ ਜਾਣ?

ਸਾਰੀਆਂ ਪਾਰਟੀਆਂ ਨਾਲ ਸੰਬੰਧਤ ਵਿਧਾਇਕ ਆਪਣੇ ਮਾਨ ਸਨਮਾਨ ਲਈ ਇਕ ਦਲੀਲ ਹਮੇਸ਼ਾ ਦਿੰਦੇ ਹਨ ਕਿ ਚੁਣੇ ਹੋਏ ਵਿਧਾਇਕ ਦਾ ਰੁਤਬਾ ਤਾਂ ਮੁੱਖ ਸਕੱਤਰ ਤੋਂ ਵੀ ਉੱਪਰ ਹੁੰਦਾ ਹੈ। ਜੇ ਇਕ ਵਿਧਾਇਕ ਨੂੰ ਇਕ ਆਮ ਨਾਗਰਿਕ ‘ਤੂੰ ਕੀ ਕੀਤਾ?’ ਇਸ ਲਹਿਜ਼ੇ ਵਿੱਚ ਪੁੱਛ ਸਕਦਾ ਹੈ ਜਿਸ ਲਹਿਜ਼ੇ ਵਿੱਚ ਇਸ ਕੇਸ ਵਿੱਚ ਪੁੱਛਿਆ ਗਿਆ ਤਾਂ ਫ਼ਿਰ ਮੁੱਖ ਸਕੱਤਰ, ਡੀ.ਜੀ.ਪੀ., ਹੋਰ ਵੱਡੇ ਅਧਿਕਾਰੀ, ਡਿਪਟੀ ਕਮਿਸ਼ਨਰਾਂ ਅਤੇ ਐਸ.ਐਸ.ਪੀਜ਼ ਨੂੰ ਵੀ ਕੀ ‘ਤੂੰ ਕੀ ਕੀਤਾ?’ ਪੁੱਛਿਆ ਜਾ ਸਕੇਗਾ ਜਾਂ ਫ਼ਿਰ ‘ਤੂੰ’ ਕਹਿ ਕੇ ਸੰਬੋਧਨ ਕੀਤਾ ਜਾ ਸਕੇਗਾ?

ਮੇਰਾ ਮੰਨਣਾ ਹੈ ਕਿ ਵਿਰੋਧ ਦੇ ਨਾਂਅ ’ਤੇ ਵਿਰੋਧ ਕਰਦਿਆਂ ਕਈ ਵਾਰ ਨੇਤਾ ਅੱਧਾ ਮੁੱਦਾ ਚੁੱਕ ਪੂਰੇ ਮੁੱਦੇ ’ਤੇ ਸਿਆਸਤ ਕਰਨਾ ਚਾਹੁੰਦੇ ਹਨ। ਵਿਰੋਧ ਦੇ ਨਾਂਅ ’ਤੇ ਜਦ ਵੀ ਵਿਰੋਧ ਹੋਵੇਗਾ ਤਾਂ ਵਿਰੋਧ ਕਰਨ ਵਾਲੇ ਆਪਣੀ ‘ਕਰੈਡਿਬਿਲਟੀ’ ਹੀ ਦਾਅ ’ਤੇ ਲਾਉਂਦੇ ਹਨ। ਇਸ ਮਾਮਲੇ ਵਿੱਚ ਵੀ ਵਿਰੋਧ ਕਰਨ ਵਾਲੇ ਸ਼ਾਇਦ ਆਪਣੇ ਆਪ ਨੂੰ ਇਹ ਸਵਾਲ ਕਰਨਾ ਭੁੱਲ ਗਏ ਕਿ ਕੀ ਉਹ ਆਪ ‘ਤੂੰ’ ਸੁਣਨ ਨੂੰ ਤਿਆਰ ਹਨ?

ਜੇ ਅਜੇ ਵੀ ਕਿਸੇ ਵਿਧਾਇਕ, ਸਾਬਕਾ ਵਿਧਾਇਕ ਜਾਂ ਕਿਸੇ ਹੋਰ ਆਗੂ ਨੂੰ ਇਹ ਲੱਗਦਾ ਹੈ ਕਿ ਇਹ ‘ਤੂੰ’ ਵਾਲਾ ਸੰਬੋਧਨ ਸਹੀ ਸੀ ਤਾਂ ਉਹ ਆਪਣੀ ਸਹਿਮਤੀ ਲੋਕਾਂ ਨੂੰ ਦੇਵੇ ਕਿ ਉਸਨੂੰ ‘ਤੂੰ’ ਕਿਹਾ ਜਾ ਸਕਦਾ ਹੈ। ਵੇਖ਼ਦੇ ਹਾਂ ਕਿੰਨੇ ਵਿਧਾਇਕ, ਸਾਬਕਾ ਵਿਧਾਇਕ ਜਾਂ ਫ਼ਿਰ ਵਿਧਾਇਕੀ ਲਈ ਚੋਣ ਲੜ ਚੁੱਕੇ ਜਾਂ ਲੜਨ ਵਾਲੇ ਆਗੂ ਇਹ ਸਹਿਮਤੀ ਦਿੰਦੇ ਹਨ ਕਿ ਉਨ੍ਹਾਂ ਨੂੰ ਜਨਤਕ ਤੌਰ ’ਤੇ ਕਿਸੇ ਵੀ ਵੱਲੋਂ ‘ਤੂੰ’ ਕਹਿ ਕੇ ਬੁਲਾਏ ਜਾਣ ’ਤੇ ਕੋਈ ਇਤਰਾਜ਼ ਨਹੀਂ ਹੋਵੇਗਾ।

ਐੱਚ.ਐੱਸ.ਬਾਵਾ
ਸੰਪਾਦਕ, ਯੈੱਸ ਪੰਜਾਬ ਡਾਟ ਕਾਮ

ਯੈੱਸ ਪੰਜਾਬ ਦੀਆਂ ਅਹਿਮ ਖ਼ਬਰਾਂ ਦੇ ਅਪਡੇਟਸ ਲਈ ਇੱਥੇ ਕਲਿੱਕ ਕਰਕੇ ਸਾਡੇ ਟੈਲੀਗਰਾਮ ਚੈਨਲ ਨਾਲ ਜੁੜੋ

- Advertisement -

ਅਹਿਮ ਖ਼ਬਰਾਂ

ਖ਼ਬਰ ਸਾਰ

ਸਿੱਖ ਜਗ਼ਤ

ਦਿੱਲੀ ਗੁਰਦੁਆਰਾ ਕਮੇਟੀ ਨੇ ਸ਼ਰਧਾ ਤੇ ਸਤਿਕਾਰ ਨਾਲ ਮਨਾਇਆ ਸ੍ਰੀ ਗੁਰੂ ਤੇਗ ਬਹਾਦਰ ਸਾਹਿਬ ਜੀ ਦਾ ਸ਼ਹੀਦੀ ਦਿਹਾੜਾ

ਯੈੱਸ ਪੰਜਾਬ ਨਵੀਂ ਦਿੱਲੀ, 28 ਨਵੰਬਰ, 2022: ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਨੇ ਨੌਵੇਂ ਪਾਤਸ਼ਾਹ ਸ੍ਰੀ ਗੁਰੂ ਤੇਗ ਬਹਾਦਰ ਸਾਹਿਬ ਜੀ ਦਾ ਸ਼ਹੀਦੀ ਦਿਹਾੜਾ ਸ਼ਰਧਾ ਤੇ ਸਤਿਕਾਰ ਨਾਲ ਮਨਾਇਆ। ਇਸ ਮੌਕੇ ਵੱਖ-ਵੱਖ...

ਜਥੇਦਾਰ ਬਲਜੀਤ ਸਿੰਘ ਦਾਦੂਵਾਲ ਦੇ ਮਾਤਾ ਬਲਬੀਰ ਕੌਰ ਅਕਾਲ ਚਲਾਣਾ ਕਰ ਗਏ

ਯੈੱਸ ਪੰਜਾਬ ਗੁਰਦਾਸਪੁਰ, 28 ਨਵੰਬਰ, 2022: ਹਰਿਆਣਾ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਪ੍ਰਧਾਨ ਜਥੇਦਾਰ ਬਲਜੀਤ ਸਿੰਘ ਦਾਦੂਵਾਲ ਦੇ ਮਾਤਾ ਬਲਬੀਰ ਕੌਰ ਸੋਮਵਾਰ ਸਵੇਰੇ ਅਕਾਲ ਚਲਾਣਾ ਕਰ ਗਏ। ਮਾਤਾ ਬਲਬੀਰ ਕੌਰ ਨੇ ਸਵੇਰੇ...

ਗੁਰੂ ਤੇਗ ਬਹਾਦਰ ਸਾਹਿਬ ਦਾ ਸ਼ਹੀਦੀ ਪੁਰਬ: ਹਰਿਆਣਾ ਵਿੱਚ ਸਰਕਾਰੀ ਕਰਮਚਾਰੀਆਂ ਲਈ ‘ਰਿਸਟ੍ਰਿਕਟਿਡ ਛੁੱਟੀ’ ਦਾ ਐਲਾਨ

ਯੈੱਸ ਪੰਜਾਬ ਚੰਡੀਗੜ੍ਹ, 27 ਨਵੰਬਰ, 2022: ਹਰਿਆਣਾ ਸਰਕਾਰ ਨੇ ਨੌਂਵੀਂ ਪਾਤਸ਼ਾਹੀ ਸ੍ਰੀ ਗੁਰੂ ਤੇਗ ਬਹਾਦਰ ਸਾਹਿਬ ਦੇ ਸ਼ਹੀਦੀ ਪੁਰਬ ਦੇ ਸੰਬੰਧ ਵਿੱਚ ਸੋਮਵਾਰ 28 ਨਵੰਬਰ ਨੂੰ ਰਾਜ ਦੇ ਸਰਕਾਰੀ ਕਰਮਚਾਰੀਆਂ ਲਈ...

ਸ੍ਰੀ ਗੁਰੂ ਤੇਗ ਬਹਾਦਰ ਸਾਹਿਬ ਦੇ ਸ਼ਹੀਦੀ ਦਿਹਾੜੇ ਸਬੰਧੀ ਸ੍ਰੀ ਅਕਾਲ ਤਖ਼ਤ ਸਾਹਿਬ ਤੋਂ ਸਜਾਇਆ ਨਗਰ ਕੀਰਤਨ

ਯੈੱਸ ਪੰਜਾਬ  ਅੰਮ੍ਰਿਤਸਰ, 26 ਨਵੰਬਰ, 2022 - ਨੌਵੇਂ ਪਾਤਸ਼ਾਹ ਸ੍ਰੀ ਗੁਰੂ ਤੇਗ ਬਹਾਦਰ ਸਾਹਿਬ ਜੀ ਦੇ ਸ਼ਹੀਦੀ ਦਿਹਾੜੇ ਸਬੰਧੀ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵੱਲੋਂ ਅੱਜ ਸ੍ਰੀ ਅਕਾਲ ਤਖ਼ਤ ਸਾਹਿਬ ਤੋਂ ਗੁਰਦੁਆਰਾ...

ਸੱਚਖੰਡ ਸ੍ਰੀ ਹਰਿਮੰਦਰ ਸਾਹਿਬ ਦੇ ਮੁੱਖ ਗ੍ਰੰਥੀ ਗਿਆਨੀ ਜਗਤਾਰ ਸਿੰਘ ਨੂੰ ਸੇਵਾ-ਮੁਕਤ ਹੋਣ ’ਤੇ ਕੀਤਾ ਸਨਮਾਨਿਤ

ਯੈੱਸ ਪੰਜਾਬ  ਅੰਮ੍ਰਿਤਸਰ, 26 ਨਵੰਬਰ, 2022 - ਸੱਚਖੰਡ ਸ੍ਰੀ ਹਰਿਮੰਦਰ ਸਾਹਿਬ ਦੇ ਸੇਵਾ ਮੁਕਤ ਹੋਏ ਮੁੱਖ ਗ੍ਰੰਥੀ ਸਿੰਘ ਸਾਹਿਬ ਗਿਆਨੀ ਜਗਤਾਰ ਸਿੰਘ ਦੇ ਸਨਮਾਨ ਲਈ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਵੱਲੋਂ ਅੱਜ...

ਸਿੱਖ ਬੱਚੇ ’ਤੇ ਦਰਜ ਕੇਸ ਮੰਦਭਾਗਾ, ਸਰਕਾਰ ਪਹਿਲਾਂ ਹਥਿਆਰ ਪ੍ਰਮੋਟ ਕਰਨ ਵਾਲੀਆਂ ਫ਼ਿਲਮਾਂ ’ਤੇ ਰੋਕ ਲਗਾਵੇ: ਗਿਆਨੀ ਹਰਪ੍ਰੀਤ ਸਿੰਘ

ਯੈੱਸ ਪੰਜਾਬ ਅੰਮ੍ਰਿਤਸਰ, 26 ਨਵੰਬਰ, 2022: ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਜਥੇਦਾਰ ਗਿਆਨੀ ਹਰਪ੍ਰੀਤ ਸਿੰਘ ਨੇ ਹਥਿਆਰਾਂ ਦੇ ਪ੍ਰਦਰਸ਼ਨ ਸੰਬੰਧੀ ਇਕ ਸਿੱਖ ਬੱਚੇ ’ਤੇ ਕੇਸ ਦਰਜ ਕੀਤੇ ਜਾਣ ਦੇ ਮਾਮਲੇ ਵਿੱਚ...

ਮਨੋਰੰਜਨ

ਗਾਇਕ ਦਲੇਰ ਮਹਿੰਦੀ ਦੇ ਫ਼ਾਰਮ ਹਾਊਸ ਸਣੇ 3 ਫ਼ਾਰਮਹਾਊਸ ‘ਸੀਲ’

ਯੈੱਸ ਪੰਜਾਬ ਗੁਰੂਗ੍ਰਾਮ, 30 ਨਵੰਬਰ, 2022: ਕੌਮਾਂਤਰੀ ਪ੍ਰਸਿੱਧੀ ਵਾਲੇ ਬਾਲੀਵੁੱਡ ਗਾਇਕ ਹਰਿਆਣਾ ਦੇ ਗੁਰੂਗ੍ਰਾਮ ਵਿੱਚ ਸੋਹਨਾ ਵਿਖ਼ੇ ਦਮਦਮਾ ਝੀਲ ਨੇੜੇ ਡੇਢ ਏਕੜ ਜ਼ਮੀਨ ’ਤੇ ਬਣੇ ਫ਼ਾਰਮਹਾਊਸ ਸਣੇ 3 ਫ਼ਾਰਮਹਾਊਸ ‘ਸੀਲ’ ਕਰ ਦਿੱਤੇ ਗਏ ਹਨ। ਇਹ ਕਾਰਵਾਈ ਲੰਘੇ...

ਪੰਜਾਬੀ ਸਿਨੇਮਾ ਦੀ ਹਿੱਟ ਫ਼ਿਲਮ ‘ਤੇਰੀ ਮੇਰੀ ਗੱਲ ਬਣ ਗਈ’ ਨੂੰ ‘ਐਮਾਜ਼ਨ ਪ੍ਰਾਈਮ ਵੀਡਓ’ ਤੇ ਮਿਲ ਰਿਹੈ ਭਰਵਾਂ ਹੁੰਗਾਰਾ

ਯੈੱਸ ਪੰਜਾਬ ਚੰਡੀਗੜ੍ਹ, 29 ਨਵੰਬਰ, 2022: ਮਸ਼ਹੂਰ OTT ਪਲੇਟਫਾਰਮ ਐਮਾਜ਼ਾਨ ਪ੍ਰਾਈਮ ਵੀਡੀਓ ਨੇ ਪੰਜਾਬੀ ਸਿਨੇਮਾ ਦੀ ਸੁਪਰਹਿੱਟ ਫਿਲਮ, 'ਤੇਰੀ ਮੇਰੀ ਗਲ ਬਣ ਗਈ' ਹੁਣ ਸਾਨੂੰ ਦੇਖਣ ਨੂੰ ਮਿਲੇਗੀ। ਇਸ ਫਿਲਮ ਵਿੱਚ ਪੰਜਾਬੀ ਸਿਨੇਮਾ ਦੇ ਮਸ਼ਹੂਰ ਅਦਾਕਾਰ...

ਕਾਮੇਡੀਅਨ ਕਾਕੇ ਸ਼ਾਹ ਖਿਲਾਫ਼ ‘ਕਬੂਤਰਬਾਜ਼ੀ’ ਦਾ ਮਾਮਲਾ ਦਰਜ, ਯੂ.ਕੇ. ਲਿਜਾਣ ਲਈ ਲਏ 6 ਲੱਖ ਰੁਪਏ ਲੈਣ ਦਾ ਦੋਸ਼

ਯੈੱਸ ਪੰਜਾਬ ਜਲੰਧਰ, 28 ਨਵੰਬਰ, 2022: ਮਸ਼ਹੂਰ ਕਾਮੇਡੀਅਨ ਕਾਕੇ ਸ਼ਾਹ ਦੇ ਖਿਲਾਫ਼ ਜਲੰਧਰ ਪੁਲਿਸ ਨੇ ਕਬੂਤਰਬਾਜ਼ੀ ਦਾ ਮਾਮਲਾ ਦਰਜ ਕੀਤਾ ਹੈ। ਇਹ ਕੇਸ ਰਸਤਾ ਮੁਹੱਲਾ ਨਿਵਾਸੀ ਨਵਨੀਤ ਆਨੰਦ ਦੀ ਸ਼ਿਕਾਇਤ ’ਤੇ ਪੁਲਿਸ ਡਿਵੀਜ਼ਨ ਨੰਬਰ 3 ਵਿੱਚ ਦਰਜ...

ਮੁਹੱਬਤਾਂ ਦੀ ਬਾਤ ਪਾਉਂਦੀ ਇੱਕ ਰੁਮਾਂਟਿਕ, ਭਾਵਨਾਤਮਿਕ ਅਤੇ ਪਰਿਵਾਰਕ ਫ਼ਿਲਮ ‘ਤੇਰੇ ਲਈ’

ਹਰਜਿੰਦਰ ਸਿੰਘ ਜਵੰਦਾ ਬਦਲਦੇ ਦੌਰ ਵਿੱਚ ਦੁਨੀਆਂ ਦੇ ਰੰਗ ਹੀ ਨਹੀਂ ਬਦਲੇ ਸਿਨਮਾ ਦੇ ਵੀ ਰੰਗ ਬਦਲ ਗਏ ਹਨ। ਫਿਲਮਾਂ ਬਦਲ ਗਈਆਂ ਹਨ। ਕਹਾਣੀਆਂ ਬਦਲ ਗਈਆਂ ਹਨ। ਫਿਲਮਾਂ ਵਿਚਲੀ ਮੁਹੱਬਤ ਦੇ ਰੰਗ ਅਤੇ ਅੰਦਾਜ਼ ਵੀ...

ਗਾਇਕ ਫ਼ਾਜ਼ਿਲਪੁਰੀਆ ਨੂੰ ਪੁਲਿਸ ਨੇ ਹਿਰਾਸਤ ਵਿੱਚ ਲਿਆ

ਯੈੱਸ ਪੰਜਾਬ ਗੁਰੂਗ੍ਰਾਮ, 18 ਨਵੰਬਰ, 2022: ਹਰਿਆਣਵੀ ਗਾਇਕ ਫ਼ਾਜ਼ਿਲਪੁਰੀਆ ਨੂੰ ਗੁਰੂਗ੍ਰਾਮ ਪੁਲਿਸ ਨੇ ਹਿਰਾਸਤ ਵਿੱਚ ਲਿਆ ਹੈ। ਬੌਲੀਵੁੱਡ ਵਿੱਚ ਵੀ ਗ਼ੀਤ ਗਾ ਚੁੱਕੇ ਫ਼ਾਜ਼ਿਲਪੁਰੀਆ ਗੁਰੂਗ੍ਰਾਮ ਵਿੱਚ ਹੋ ਰਹੇ ਇਕ ਪ੍ਰਦਰਸ਼ਨ ਦੇ ਸਮਰਥਨ ਲਈ ਪੁੱਜੇ ਸਨ। ਇਹ ਪ੍ਰਦਰਸ਼ਨ ਅਹੀਰ...
- Advertisement -spot_img
- Advertisement -spot_img

ਸੋਸ਼ਲ ਮੀਡੀਆ

45,610FansLike
51,923FollowersFollow

ਅੱਜ ਨਾਮਾ – ਤੀਸ ਮਾਰ ਖ਼ਾਂ

ਮਹਿਮਾਨ ਲੇਖ਼

ਗੁਸਤਾਖ਼ੀ ਮੁਆਫ਼

error: Content is protected !!