ਯੈੱਸ ਪੰਜਾਬ
ਮੁੰਬਈ, 23 ਮਾਰਚ, 2023:
ਬਾਲੀਵੁੱਡ ਅਦਾਕਾਰਾ ਪ੍ਰਨੀਤੀ ਚੋਪੜਾ ਅੱਜ ‘ਆਮ ਆਦਮੀ ਪਾਰਟੀ’ ਦੇ ਸੀਨੀਅਰ ਨੇਤਾ ਅਤੇ ਰਾਜ ਸਭਾ ਮੈਂਬਰ ਸ੍ਰੀ ਰਾਘਵ ਚੱਢਾ ਨਾਲ ਲੰਚ ’ਤੇ ਮਿਲਣ ਤੋਂ ਬਾਅਦ ਇਕੱਠੇ ਨਜ਼ਰ ਆਏ।
ਇਸ ਤੋਂ ਪਹਿਲਾਂ ਦੋਵੇਂ ਇਕ ‘ਡਿਨਰ ਡੇਟ’ ਮੌਕੇ ਵੀ ਵੇਖ਼ੇ ਗਏ ਸਨ।
ਪਹਿਲਾਂ ਦੋਵੇਂ ਮੁੰਬਈ ਵਿੱਚ ਗੋਰੇਗਾਉਂ ਦੇ ‘ਵੈਸਟ ਇੰਨ’ ਹੋਟਲ ਵਿੱਚ ‘ਡਿਨਰ’ ਮੌਕੇ ਵੇਖ਼ੇ ਗਏ ਸਨ ਅਤੇ ਅੱਜ ਦੋਵੇਂ ਬਾਂਦਰਾ ਦੇ ਇੱਕ ਰੈਸਟੋਰੈਂਟ ਵਿੱਚ ਲੰਚ ਤੋਂ ਬਾਅਦ ਬਾਹਰ ਆਉਂਦੇ ਵੇਖ਼ੇ ਗਏ।
ਇਸ ਮੌਕੇ ਸ੍ਰੀ ਰਾਘਵ ਚੱਢਾ ਤਾਂ ਬਾਹਰ ਆਉਂਦਿਆਂ ਹੀ ਐੱਸ.ਯੂ.ਵੀ. ਦੀ ਪਿਛਲੀ ਸੀਟ ’ਤੇ ਬੈਠ ਗਏ ਪਰ ਪ੍ਰਨੀਤੀ ਚੋਪੜਾ ਨੇ ਗੱਡੀ ’ਤੇ ਚੜ੍ਹਣ ਤੋਂ ਪਹਿਲਾਂ ਤਸਵੀਰਾਂ ਖ਼ਿਚਾਈਆਂ ਅਤੇ ਫ਼ਿਰ ਸ੍ਰੀ ਚੱਢਾ ਦੇ ਨਾਲ ਦੀ ਸੀਟ ’ਤੇ ਬੈਠ ਕੇ ਰਵਾਨਾ ਹੋ ਗਈ। ਇਸ ਮੌਕੇ ਸ੍ਰੀ ਚੱਢਾ ਨੇ ‘ਫ਼ੌਰਮਲ’ ਪੈਂਟ ਸ਼ਰਟ ਪਾਈ ਹੋਈ ਸੀ ਜਦਕਿ ਪ੍ਰਨੀਤੀ ਚੋਪੜਾ ਨੇ ਇੱਕ ਕੈਯੂਅਲ ਕਾਲੀ ਡਰੈੱਸ ਪਾਈ ਹੋਈ ਸੀ।
ਇਨ੍ਹਾਂ ਦੋਹਾਂ ਦੀ ਲੰਚ ਮੀਟਿੰਗ ਦੀਆਂ ਵੀਡੀਓ ਸੋਸ਼ਲ ਮੀਡੀਆ ’ਤੇ ਵਾਇਰਲ ਹੋ ਰਹੀਆਂ ਹਨ ਜਿਸ ’ਤੇ ਇਹ ਕਿਆਫ਼ ਲਗਾਏ ਜਾ ਰਹੇ ਹਨ ਕਿ ਕੀ ਦੋਹਾਂ ਵਿੱਚਕਾਰ ਕੁਝ ਚੱਲ ਰਿਹਾ ਹੈ।
ਪ੍ਰਨੀਤੀ ਚੋਪੜਾ ਕੌਮਾਂਤਰੀ ਪ੍ਰਸਿੱਧੀ ਪ੍ਰਾਪਤ ਅਭਿਨੇਤਰੀ ਪ੍ਰਿਅੰਕਾ ਚੋਪੜਾ ਦੀ ਚਚੇਰੀ ਭੈਣ ਹੈ ਅਤੇ 2011 ਤੋਂ ਖ਼ੁਦ ਵੀ ਬਾਲੀਵੁੱਡ ਵਿੱਚ ਕੰਮ ਕਰ ਰਹੀ ਹੈ ਜਦਕਿ ਰਾਘਵ ਚੱਢਾ ‘ਆਪ’ ਦੇ ਸੀਨੀਅਰ ਆਗੂ ਹੋਣ ਦੇ ਨਾਲ ਨਾਲ ਰਾਜ ਸਭਾ ਵਿੱਚ ਸਭ ਤੋਂ ਛੋਟੀ ਉਮਰ ਦੇ ਮੈਂਬਰ ਹਨ।
ਪ੍ਰਨੀਤੀ ਚੋਪੜਾ ਨੇ ‘ਇਸ਼ਕਜ਼ਾਦੇ’, ‘ਲੇਡੀਜ਼ ਵਰਸਿਜ਼ ਰਿੱਕੀ ਬਹਿਲ’, ‘ਸ਼ੁੱਧ ਦੇਸੀ ਰੋਮਾਂਸ’, ‘ਹੱਸੀ ਤੋਹ ਫ਼ੱਸੀ’, ‘ਗੋਲਮਾਲ ਅਗੇਨ’ ਅਤੇ ‘ਸੰਦੀਪ ਔਰ ਪਿੰਕੀ ਫ਼ਰਾਰ’ ਜਿਹੀਆਂ ਫ਼ਿਲਮਾਂ ਵਿੱਚ ਕੰਮ ਕਰ ਚੁੱਕੀ ਹੈ।
ਅਗਲੇ ਸਮੇਂ ਵਿੱਚ ਪ੍ਰਨੀਤੀ ਚੋਪੜਾ ਅਤੇ ਦਿਲਜੀਤ ਦੋਸਾਂਝ ਦੀ ਪੰਜਾਬੀ ਦੇ ਮਰਹੂਮ ਗਾਇਕ ਅਮਰ ਸਿੰਘ ਚਮਕੀਲਾ ਦੀ ਜ਼ਿੰਦਗੀ ’ਤੇ ਬਣੀ ਫ਼ਿਲਮ ‘ਚਮਕੀਲਾ’ ਤੋਂ ਇਲਾਵਾ ‘ਕੈਪਸੂਲ ਗਿੱਲ’ ਆਦਿ ਫ਼ਿਲਮਾਂ ਆ ਰਹੀਆਂ ਹਨ।
ਯੈੱਸ ਪੰਜਾਬ ਦੀਆਂ ਅਹਿਮ ਖ਼ਬਰਾਂ ਦੇ ਅਪਡੇਟਸ ਲਈ ਇੱਥੇ ਕਲਿੱਕ ਕਰਕੇ ਸਾਡੇ ਟੈਲੀਗਰਾਮ ਚੈਨਲ ਨਾਲ ਜੁੜੋ
