ਯੈੱਸ ਪੰਜਾਬ
ਜਲੰਧਰ, 27 ਜੁਲਾਈ, 2021 –
ਕੋਰੋਨਾ ਮਹਾਂਮਾਰੀ ਕਾਰਨ ਮੌਤ ਦੇ ਮੂੰਹ ‘ਚ ਜਾ ਪਈਆਂ ਕੀਮਤੀ ਜ਼ਿੰਦਗੀਆਂ ਦੇ ਦਰਦ ਅਤੇ ਪਿੱਛੇ ਰਹਿ ਗਏ ਪਰਿਵਾਰਕ ਮੈਂਬਰਾਂ ਦੇ ਮਨ ਦੀ ਪੀੜਾਂ ਤੋਂ ਲੈ ਕੇ ਪ੍ਰਵਾਸੀ ਮਜ਼ਦੂਰਾਂ ਦੀ ਆਪਣੇ ਘਰਾਂ ਨੂੰ ਹਿਜਰਤ ਅਤੇ ਆਪਣੇ ਹੱਕਾਂ ਲਈ ਦਿੱਲੀ ਦੀਆਂ ਸਰਹੱਦਾਂ ‘ਤੇ ਸੰਘਰਸ਼ ਕਰ ਰਹੇ ਕਿਸਾਨਾਂ ਦੀਆਂ ਔਕੜਾਂ ਨੂੰ ਆਪਣੇ ਗੀਤਾਂ ਅਤੇ ਗਜ਼ਲਾਂ ਰਾਹੀਂ ਆਪਣੇ ਜਜ਼ਬਾਤ ਦੀ ਤਰਜ਼ਮਾਨੀ ਕਰਨ ਵਾਲੇ ਉੱਘੇ ਪੱਤਰਕਾਰ ਸਤਨਾਮ ਸਿੰਘ ਮਾਣਕ ਵਲੋਂ ਹਾਲ ਹੀ ‘ਚ ਆਪਣੀਆਂ ਭਾਵਨਾਵਾਂ ਨੂੰ ਇਕ ਹੋਰ ਪੰਜਾਬੀ ਗਜ਼ਲ ‘ਇਹ ਦਿਲ ਮੇਰਾ’ ਦੇ ਰਾਹੀਂ ਪ੍ਰਗਟਾਉਣ ਦਾ ਯਤਨ ਕੀਤਾ ਹੈ।
ਇਸ ਗਜ਼ਲ ਨੂੰ ਉੱਘੇ ਪੰਜਾਬੀ ਗਾਇਕ ਸੁਨੀਲ ਡੋਗਰਾ ਨੇ ਆਵਾਜ਼ ਦਿੱਤੀ ਹੈ, ਜਦਕਿ ਇਸ ਨੂੰ ਇੰਡੀਅਨ ਮੈਲੋਡੀਜ਼ ਕੰਪਨੀ ਵਲੋਂ ਜਾਰੀ ਕੀਤਾ ਗਿਆ ਹੈ।
ਇਸ ਗੀਤ ਨੂੰ ਸ਼ੋਸ਼ਲ ਮੀਡੀਆ ‘ਤੇ ਕਾਫੀ ਪਸੰਦ ਕੀਤਾ ਜਾ ਰਿਹਾ ਹੈ ਤੇ ਕੁੱਝ ਦਿਨਾਂ ‘ਚ ਹੀ ਇਸ ਗਜ਼ਲ ਨੂੰ ਵੱਡੀ ਗਿਣਤੀ ‘ਚ ਸੰਗੀਤ ਪ੍ਰੇਮੀਆਂ ਵਲੋਂ ਦੇਖਿਆ-ਸੁਣਿਆ ਗਿਆ ਹੈ। ਇਸ ਗਜ਼ਲ ਬਾਰੇ ਗੱਲ ਕਰਦੇ ਹੋਏ ਸਤਨਾਮ ਸਿੰਘ ਮਾਣਕ ਨੇ ਕਿਹਾ ਕਿ ਖੁਸ਼ੀ ਅਤੇ ਉਦਾਸੀ ਮਨ ਦੀਆਂ ਦੋ ਅਜਿਹੀਆਂ ਅਵਸਥਾਵਾਂ ਹਨ, ਜੋ ਧੁੱਪ ਅਤੇ ਛਾਂ ਵਾਂਗ ਹਮੇਸ਼ਾ ਸਾਡੇ ਨਾਲ ਰਹਿੰਦੀਆਂ ਹਨ ਤੇ ਇਹ ਰਚਨਾ ਉਦਾਸ ਪਲਾਂ ਦੇ ਕੁੱਝ ਅਨੁਭਵਾਂ ਦੀ ਪੇਸ਼ਕਾਰੀ ਕਰਦੀ ਹੈ।
ਦੱਸਣਯੋਗ ਹੈ ਕਿ ਗਾਇਕ ਸੁਨੀਲ ਡੋਗਰਾ ਇਸ ਤੋਂ ਪਹਿਲਾਂ ਵੀ ਸੰਘਰਸ਼ ਕਰ ਰਹੇ ਕਿਸਾਨਾਂ ਦੀਆਂ ਔਕੜਾਂ ਤੇ ਦੁਸ਼ਵਾਰੀਆਂ ਨੂੰ ਪੇਸ਼ ਕਰਦੀ ਸਰੀ ਮਾਣਕ ਦੀ ਰਚਨਾ ‘ਦਰਦ ਸਿਹਾ ਨਹੀਂ ਜਾਂਦਾ’ ਨੂੰ ਵੀ ਆਪਣੀ ਆਵਾਜ਼ ਦੇ ਚੁੱਕੇ ਹਨ।
ਜਦਕਿ ਉੱਘੇ ਪੰਜਾਬੀ ਗਾਇਕ ਅਨਾਦੀ ਮਿਸ਼ਰਾ ਦੀ ਆਵਾਜ਼ ‘ਚ ਸਤਨਾਮ ਸਿੰਘ ਮਾਣਕ ਦੀ ਰਚਨਾ ‘ਆ ਦਿਲਾ’ ਕੋਰੋਨਾ ਕਾਰਨ ਵਾਤਾਰਣ ‘ਚ ਆਈਆਂ ਤਬਦੀਲੀਆਂ ਦਾ ਖੂਬਸੂਰਤ ਚਿਤਰਣ ਸੀ ਤੇ ਇਸੇ ਤਰ੍ਹਾਂ ਪ੍ਰਵਾਸੀ ਮਜ਼ਦੂਰਾਂ ਦੀ ਹਿਜਰਤ ਦੇ ਦਰਦ ਨੂੰ ਪੇਸ਼ ਕਰਦੇ ਗੀਤ ‘ਦਰਦ ਦਾ ਦਰਿਆ’ ਅਤੇ ਕੋਰੋਨਾ ਕਾਰਨ ਚਾਰੇ ਪਾਸੇ ਛਾਈ ਉਦਾਸੀ ਨੂੰ ਆਪਣੇ ਗੀਤ ‘ਹਾਲ ਆਪਣੇ ਸ਼ਹਿਰ ਦਾ’ ਨੂੰ ਉੱਘੇ ਸੂਫੀ ਗਾਇਕ ਯਾਕੂਬ ਗਿੱਲ ਨੇ ਬਹੁਤ ਹੀ ਭਾਵਪੂਰਤ ਤਰੀਕੇ ਨਾਲ ਸੰਗੀਤ ਪ੍ਰੇਮੀਆਂ ਦੇ ਸਾਹਮਣੇ ਪੇਸ਼ ਕੀਤਾ ਸੀ।
ਹਾਲ ਹੀ ‘ਚ ਵਿਛੜ ਗਏ ਨੌਜਵਾਨ ਗਾਇਕ ਦਿਲਜਾਨ ਦੀ ਆਵਾਜ਼ ‘ਚ ਕਿਸਾਨਾਂ ਦੇ ਹੌਂਸਲੇ ਅਤੇ ਜਜ਼ਬੇ ਨੂੰ ਦਰਸਾਉਂਦਾ ਗੀਤ ‘ਜਿੰਦਾਬਾਦ’ ਵੀ ਸਤਨਾਮ ਸਿੰਘ ਮਾਣਕ ਦੀ ਵੱਖ-ਵੱਖ ਮੁੱਦਿਆਂ ਪ੍ਰਤੀ ਉਨ੍ਹਾਂ ਦੀ ਪਹੁੰਚ ਤੇ ਸੰਵੇਦਨਸ਼ੀਲਤਾ ਦਾ ਪ੍ਰਗਟਾਵਾ ਹੈ। ਗਾਇਕ ਜੇ. ਰਿਆਜ਼ ਦੀ ਆਵਾਜ਼ ‘ਚ ‘ਕੋਰੋਨਾ ਦੇ ਸੰਤਾਪ ਨੂੰ ਪੇਸ਼ ਕਰਦਾ ਸਤਨਾਮ ਸਿੰਘ ਮਾਣਕ ਦਾ ਇਕ ਹੋਰ ਗੀਤ ‘ਇਹ ਕੇਹੀ ਰੁੱਤ ਆਈ’ ਵੀ ਲੋਕ ਮਨਾਂ ਨੂੰ ਝੰਜੋੜਨ ‘ਚ ਸਫਲ ਰਿਹਾ ਸੀ।
ਯੈੱਸ ਪੰਜਾਬ ਦੀਆਂ ਅਹਿਮ ਖ਼ਬਰਾਂ ਦੇ ਅਪਡੇਟਸ ਲਈ ਇੱਥੇ ਕਲਿੱਕ ਕਰਕੇ ਸਾਡੇ ਟੈਲੀਗਰਾਮ ਚੈਨਲ ਨਾਲ ਜੁੜੋ