ਅੱਜ-ਨਾਮਾ
ਕਾਂਗਰਸ ਪਾਰਟੀ ਅੰਦਰ ਨਾ ਸੁੱਖ ਲੱਗਦੀ,
ਆਗੂ ਵਾਰੀ ਨਾਲ ਰਹੇ ਈ ਭੜਕ ਮਿੱਤਰ।
ਕੋਈ ਕਹਿੰਦਾ ਕਿ ਆਈ ਗਰਾਂਟ ਹੈ ਨਹੀਂ,
ਚੱਲਣ ਜੋਗੀ ਨਾ ਕੋਈ ਵੀ ਸੜਕ ਮਿੱਤਰ।
ਦੂਜੇ ਕਿਹਾ ਕਿ ਅਫਸਰ ਨਾ ਮਿਲਣ ਸਾਨੂੰ,
ਅਕਾਲੀ ਲੀਡਰਾਂ ਦੀ ਪੂਰੀ ਮੜ੍ਹਕ ਮਿੱਤਰ।
ਸਰਕਾਰ ਸਾਡੀ ਤੇ ਟੌਹਰ ਅਕਾਲੀਆਂ ਦਾ,
ਸਾਨੂੰ ਏਸ ਦੀ ਬਾਹਲੀ ਹੈ ਰੜਕ ਮਿੱਤਰ।
ਚਰਚਾ ਅੰਦਰ ਅਖਬਾਰਾਂ ਦੇ ਬਹੁਤ ਹੁੰਦੀ,
ਕਰਦੇ ਲੋਕ ਵੀ ਗੱਲਾਂ ਕਈ ਵੱਖ ਮਿੱਤਰ।
ਚੰਡੀਗੜ੍ਹ ਵਿੱਚ ਕੋਈ ਨਾ ਫਿਕਰ ਕਰਦਾ,
ਪੜ੍ਹਦੇ ਖਬਰਾਂ ਤੇ ਦੇਂਦੇ ਹਨ ਰੱਖ ਮਿੱਤਰ।
-ਤੀਸ ਮਾਰ ਖਾਂ
18 ਫਰਵਰੀ, 2020