ਅੱਜ-ਨਾਮਾ
ਆਖਿਆ ਮਿੱਤਰ ਸੀ ਇੱਕ ਨੇ ਦੂਸਰੇ ਨੂੰ,
ਮੇਰਾ ਏ ਦਿੱਲੀ ਦੇ ਵੱਲ ਧਿਆਨ ਮਿੱਤਰ।
ਸੁਣੀਆਂ ਵਸਤਾਂ ਹਨ ਸਸਤੀਆਂ ਕਈ ਓਥੇ,
ਲਿਆਉਣਾ ਹੱਟੀ ਦਾ ਕੁਝ ਸਾਮਾਨ ਮਿੱਤਰ।
ਦੂਜੇ ਆਖਿਆ ਸੰਭਲ ਕੇ ਜਾਈਂ ਮਿੱਤਰ,
ਕਿਧਰੇ ਹੋਵੇ ਨਾ ਤੇਰਾ ਨੁਕਸਾਨ ਮਿੱਤਰ।
ਹੋਇਆ ਈ ਅਮਨ-ਕਾਨੂੰਨ ਦਾ ਹਾਲ ਮੰਦਾ,
ਚੌਧਰਾਂ ਕਰਨ ਕਈ ਗੁੰਡੇ ਜਾਂ ਡਾਨ ਮਿੱਤਰ।
ਔਡ-ਈਵਨ ਜਿਹਾ ਲੱਗਾ ਫਿਰ ਹੋਣ ਲਾਗੂ,
ਹੋਇਆ ਈ ਸੁਣੀਂਦਾ ਕੋਈ ਐਲਾਨ ਮਿੱਤਰ।
ਜੁਰਮਾਨਾ ਹੋਇਆ ਤਾਂ ਓਦੋਂ ਵੀ ਵੱਧ ਹੋਊ,
ਲਿਆਉਣਾ ਜਿੰਨੇ ਦਾ ਕੁੱਲ ਸਾਮਾਨ ਮਿੱਤਰ।
-ਤੀਸ ਮਾਰ ਖਾਂ
ਅਕਤੂਬਰ 14, 2019
